سەيسەنبى, 17 مامىر 2022
قۇيىلسىن كوشىڭ 5406 2 پىكىر 12 شىلدە, 2017 ساعات 09:55

كوشى-قون پوليتسياسى تالدىقورعانعا «قاشىپ كەتتى»

7 شىلدە كۇنى تاڭەرتەڭ كوڭىلىمىز باياعىداي، الىپ ۇشىپ تاپقان-تايانعانىمىزدى تاكسيگە بەرىپ، وبلىستىق كوشى-قون مەكەمەسىنە قۇجات قاعازدارىمىزدى سۇرايىق دەپ بارعانبىز. بارا سالا ەسىكتەن ارى وتە الماي، كوڭىلىمىز سۋ سەپكەندەي باسىلدى.

دەنەسى ءالجۋازداۋ كەلگەن،   جۇقالتاڭ شۇڭىرەك كوزدى  كۇزەت فورماسىن كيگەن جىگىت «جۇمىستارىڭ بولسا، بارلىق سۇراقتارىڭىز بويىنشا تالدىقورعانعا بارىڭدار، ەندى ولار بۇل جەردە جوق. مىنا حابارلاندىرۋدى وقىڭدار» دەپ زىركىلدەدى، بۇلتتانىپ كۇركىرەدى.

ەسىككە سيىردىڭ تىلىندەي، «حابارلاندىرۋ» ورىس تىلىندە جازىلىپ جاپسىرۋلى تۇر. وندا نە جازىلعانىن تۇسىنە الماي دال بولدىق. بۇل سوندا ءبىزدى عانا ەمەس، قاسيەتتى انا ءتىلىمىزدى دە كوزگە ىلمەيتىن مەكەمە ەكەن عوي.  شەتتەن كەلگەن اعايىن وزگە ءتىلدى قايدان ءبىلسىن...

وڭتۇتىك استاناعا جاقىن ورنالاسقان سەگىز اۋدانعا كوشىپ كەلگەن قانداستارىمىزدىڭ قاتپارى قالىڭ قايعىسى مەن توڭى جىبىمەگەن قۇجات ماسەلەسىن كىم قارايدى؟ قۇزىرلى مەكەمە وزدەرى كوشىپ-قونىپ سارساڭعا ءتۇسىپ ءجۇر.

ىڭعايلارى مەن جاعدايلارىنا  قاراپ،  حالىققا ەسكەرتپەستەن ءبىر كۇندە الماتى قالاسىنان كابينەتتەرىن كوشىرىپ، ءىزىم-عايىم بولعان كوشى-قوندى قانداي  تۇلەن ءتۇرتتى ەكەن؟. وعان ازىرگە جاۋاپ تابا المادىق.

تۇسپالداۋىمىزشا  قاپىرىق اپتاپ ىستىقتا، ءتورت قاباتتى عيمارات پانا بولماعان سەكىلدى. جۇمىستارى  اۋىر عوي، تۇسىنۋگە بولار...

وزدەرى ءبىراۋزدان اقىلداسىپ،  نە دە بولسا قالانىڭ شۋىلىنان الىس وبلىس ورتالىعى تالدىقورعانعا كوشىپ كەتۋ ءجون دەپ شەشكەن سەكىلدى. وندا وبلىسقا قاراستى سەگىز اۋدانعا كەلگەن قانداستارىمىزدىڭ بارىپ-قايتۋىنا ءبىرشاما قيىندىقتار تۋعىزباي قالماسى انىق. جولاقى، جاتىن-ورىن، ءىشىپ-جەمنەن  قينالۋى دەگەندەي. سەبەبى ارعى بەتتەن ازەر ات ارىتىپ جەتكەندە، ءبىر جاپىراق قاعازدىڭ كوك ءمورى ءۇشىن، الاشاپقىن بولىپ ارلى-بەرلى جۇرۋگە كىمنىڭ جاعدايى جار بەرە قويسىن.

تاڭنان كەشكە دەيىن الماتى وبلىسى كوشى-قون پوليتسياسىنىڭ كوشكەن جۇرتىن سيپاعان جۇرت، كەنەزەلەرى كەۋىپ، دىعدىرى قۇرىعاندا تارقاستى. ءبارىنىڭ اڭساعانى  سول سيىرقۇيمىشاقتانعان قۇجاتتىڭ ماسەلەسىنىڭ تەز شەشىم تابۋى عوي.

مەكەمە قىزمەتكەرلەرىنىڭ ءبىر كۇندە استىلارىنان سۋ شىققانداي، الماتى وبلىسىنان تايىپ تۇرۋى «اش قۇلاقتان، تىش قۇلاق، ايداعانىم ەشكى لاق» دەپ، داڭعازاسى كوپ، شۋىلى باسىم ورتادان ءبىرجولا كەتىپ، شالعاي جاتقان تالدىقورعانعا تابان تىرەپ ارقالارىن كەڭگە سالۋ ما، ەشكىمنىڭ اتى جەتىپ كۇندە بارىپ  مازالامايتىنى انىق.

اتاجۇرتىنا ات ارتىپ ازەر جەتكەن قانداستارىمىزدىڭ ءبىر جاپىراق قاعاز ءۇشىن تەنتىرەپ، تابانىنان تاۋسىلىپ جۇرسە،  ازاماتتىق الۋدى ولارعا ۇلى ارمان ەتىپ، كۇرمەۋى كوپ ماسەلە جاساپ زاۋرەنىن سارعايتىپ، قاڭىرىعىن تۇتەتىپ قويۋ قۇزىرلى مەكەمەنىڭ وردەن تاققان ازاماتتارىنىڭ «حوببيى» سەكىلدى.

ولار نە دۇرىستاپ جاۋاپ بەرمەيدى، نە قۇلاقاسىپ ءسوزىڭدى تىڭدامايدى. سوندا بۇلارعا ەتيكا، مادەنيەت تۋرالى ايتپاعان كۇننىڭ وزىنە، ەلباسى نۇرسۇلتان نازارباەۆتىڭ جولداعان جولداۋى، جۇرگىزىپ وتىرعان ساليحالى ساياساتى، كۇنىگە ايتىپ جاتقان  سوزى اسەر ەتپەي مە.

دۇنيە  جۇزى قازاقتارىىنىڭ بەسىنشى قۇرىلتايىندا كوشى-قونداعى قوردالانعان تۇيتكىلدى ماسەلەلەردىڭ سەڭى بۇزىلىپ، كەدەرگى قامالداردىڭ الىناتىنى تۋرالى اقجولتاي حابار ايتىلىپ ءبىر قۋانتقان ەدى. ىلە -شالا اراعا كۇن سالماي جاتىپ، قۋانىش ۇزاققا بارماي قىزۋىنىڭ ساپ باسىلىپ جاتقانى  بىزدى قاتتى الاڭداتادى.

قالي ورىنباي

Abai.kz

 

 

2 پىكىر