بەيسەنبى, 2 ءساۋىر 2020
COVID-19 قازاقستاندا. جۇقتىرعاندار — 402. جازىلعاندار — 27. قايتىس بولعاندار — 3
انىق 4149 19 پىكىر 27 ماۋسىم, 2017 ساعات 11:14

ەۋرازيالىق مەديا فورۋمنىڭ ورنىنا جىلدا قۇرىلتاي وتكىزۋ كەرەك

قازاققا نەنىڭ قاجەت، نەنىڭ قاجەت ەمەس ەكەنى انىق بولا باستادى. دۇنيەجۇزى قازاقتارىنىڭ قۇرىلتايى ءوتىپ ەدى، بۇكىل جاھانعا جار سالىپ، ميللياردتاردى جەلگە ۇشىرىپ ساۋىن ايتقان ەۋرازيالىق مەديا فورۋمىمىز كولەڭكەدە قالدى. بارىمىزدى سالىپ، الەمگە تانىلۋ ءۇشىن وتكىزىپ جاتقان ەXPO-نىڭ ءوزى ەكىنشى پلانداعى تاقىرىپقا ىسىرىلىپ تاستالعانداي بولدى.

ەXPO-عا ايتار ءۋاجىمىز جوق. قازاق قازاق بولعالى تۇڭعىش رەت وسىنداي اۋقىمدى شارانى وتكىزىپ وتىر. ەلدى، جەردى، ۇلتتى تانىتۋ ءۇشىن بۇل شارا قاجەت ەكەنى داۋسىز. داۋ جاسايتىن ماسەلە – ەۋرازيالىق مەديا فورۋم. مىنە، 15 جىلدان بەرى الەمنىڭ 60 ەلىنەن جۋرناليست، ساياساتكەر ءھام وزگەلەردى شاقىرىپ الىپ، قازاق مەملەكەتىنە تۇك قاتىسى جوق، الەمدىك جۋرناليستيكانىڭ پروبلەمالارىن شەشپەك بولىپ تاڭىمىز ايرىلادى. اتام قازاق «كوتەرە المايتىن شوقپاردى بەلىڭە بايلاما» دەۋشى ەدى. ءنان شوقپاردى بەلىمىزگە بايلاپ العان 15 جىلدا نە وزگەردى؟ قازاقتى بىلاي قويىپ وسى داڭعازا فورۋم مەملەكەتكە نە بەردى؟ الەمنىڭ ەكولوگياسى استاناعا الپىس ەلدەن التىدان جۋرناليست كەلدى دەپ شەشىلىپ كەتە مە؟ ءوز ەلىمىزدە تولىق تسەنزۋرانى الىپ تاستاي الماي وتىرىپ، وزگەلەرگە جول كورسەتپەك بولعان قوجاناسىرلىعىمىزدى توقتاتار كەز جەتكەن جوق پا؟ اقپاراتتىق قاۋىپسىزدىك ماسەلەسىن قازاقستان شەشپەسە قاراڭ قالاتىنداي كۇپىنەتىنىمىز نە ءوزى؟

ەۋرازيانىڭ اقپارات سالاسىنىڭ دامۋى بىزگە قاراپ تۇرعان جوق. نە ەلگە، نە وزگەگە پايداسى تيمەيتىن، قازاق قازىناسىن وڭدى-سولدى شاشاتىن مۇنداي شارانىڭ ورىنا جىل سايىن دۇنيەجۇزى قازاقتارىنىڭ قۇرىلتايىن وتكىزسەك، الەمنىڭ بار قازاعىنىڭ قايماقتارى باس قوسىپ، قانداستار ماسەلەسىن تالقىعا سالسا، اسپايتىن اسۋ، المايتىن قامال قالماس ەدى.

23 ماۋسىم كۇنى باستالعان مەديا فورۋم جايلى حالىق تۇكتى دە بىلمەيدى. ءوتتى مە، وتپەي قالدى ما، نە ايتىلدى، نە ايتىلمادى، تالقىعا سالىپ ءماۋ دەگەن بىرەۋ جوق. ءتىپتى، «ءجۋرناليستپىز» دەپ جۇرگەن تىلشىلەردىڭ ءوزى بەس جولدىق اقپارات جازۋعا ەرىندى. ولار ارينە، «بەكەر مال شاشپاقتىڭ» ءىسىن اڭعارعاندىقتان دا قولىنا قالام الۋدى ار سانايدى. تۇككە قاجەتى جوق داڭعازادان گورى قۇرىلتايداعى جىلت ەتكەن جاڭالىقتى جازۋ – ابىروي. ەل مەن ۇلتتىڭ، مەملەكەتتىڭ الدىنداعى پارىز مەديا فورۋمدى جازۋمەن ەمەس، قازاقتىڭ قۇرىلتايىمەن ولشەنەدى. ءبىز ءۇشىن جاھاننىڭ اقپارات كەڭىستىگى مەن گەوساياساتتىڭ وزەكتى پروبلەمالارىن تالقىلايتىن ديالوگتان گورى قىتايدىڭ تەپكىسىن كورىپ جاتقان قازاقتىڭ تاعدىرىنا الاڭداۋ ميلليون ەسە قىمبات ءىس. ەلىمىزگە الەمدىك ماسس-مەديانىڭ الىپتارى، ساقا ساياساتكەرلەر، بيزنەس ەليتاسىنىڭ وكىلدەرى كەلگەننەن گورى قارا جاياۋ قانداستىڭ تۋعان جەرگە تابان تىرەۋى ميلليون ەسە پايدالى ءىس. مەديا فورۋمدا 600 دەلەگاتتى  قوناق ەتكەننەن گورى قارا قازاقتىڭ التى بالاسىنا قۇشاق جايعانىمىز ميلليون ەسە قۇرمەتتى ءىس.

پرەزيدەنتتىڭ قۇرىلتايدا سويلەگەن ءسوزى ابايدىڭ سوزىندەي ءار قازاققا ءوتىمدى بولعانىن ەشكىم جوققا شىعارا المايدى. بۇكىل باق سول ءسوزدى سۇيىنشىلەي جاريالادى. بىرنەشە كۇندە مىڭداعان ماقالانىڭ وزەگىنە اينالدى. الەمدەگى بار قازاقتىڭ جۇرەگىن ءدىر ەتكىزىپ، ەلگە دەگەن قۇرمەتىن ودان ارمەن ۇلعايتىپ جىبەردى. ال، مەديا فورۋمشىلاردىڭ وسى شارانىڭ اشىلۋىندا سويلەگەن ءسوزىن حالىق پىسقىرا ما؟ پىسقىرمايدى.

ءبىز مەديا فورۋمعا قانشا قارجى جۇمسالعانىن انىقتاي المادىق. سوندا دا قۇرىلتايعا كەتكەن شىعىننان بىرنەشە ەسە كوپ بولعانىن جۇرەگىمىز سەزەدى. داعدارىس القىمنان الىپ بۋىندىرىپ تۇرعان شاقتا قۇرىلتاي وتپەي قالا جازداعانى تاعى راس. ال، مەديا فورۋمدى وتكىزبەي-اق قويايىق دەۋگە ەشكىمنىڭ جۇرەگى داۋالامادى.

قوش! قيىننان قيىستىرىپ، ءبىر-بىرىنە قابىسپايتىن ەكى ماسەلەنى ءبىر تۇيىنگە تۇينەكتەپ تاستاعانداي بولارمىز. دەسە دە، اقيقاتى وسى. جىلدا ەۋرازيالىق مەديا فورۋم جاساعانشا، قازاقتىڭ قۇرىلتايىن وتكىزۋدى تالاپ ەتەيىك! مەملەكەت نە جاساسا دا ەلگە پايدالى ىسپەن شۇعىلدانسىن! ءسىز نە دەيسىز؟

قانات بىرلىكۇلى

Abai.kz

19 پىكىر