وتكەندە  جۋرناليست دجەيمس پالمەر دەيتىن ازامات  استانادا ءوتىپ جاتقان ەكسپو-2017 كورمەسىن سىناپ تاستادى. "Foreign Policy" جۋرنالىنا كولەمدى ماقالا جازىپ، استاناداعى ەكسپو-نى يلليۋزياعا تەڭەدى. كورمە عيماراتتارىن "قاڭىراپ تۇر" دەپ، كەلدى دەگەن تۋريستەردى "كەلمەدى" دەدى.

"قازاقستان حالىقارالىق كورمە وتكىزىپ، ەلدىڭ ابىرويىن كوتەرۋ ءۇشىن فۋتۋريستىك قالا سوقتى، بىراق ءبىر كىشىگىرىم پروبلەما بار: استانا قوناق شاقىرۋدى ۇمىتىپ كەتكەن. گرەكيانىڭ پاۆيلونىن مەن جالعىز ءوزىم ارالادىم. كوپشىلىك پاۆيلونداردا قىزمەت كورسەتۋشىلەردەن باسقا  ەشكىم بولمادى. تەك قىتاي، گەرمانيا، اقش سەكىلدى ءىرى ەلدەردىڭ پاۆيلوندارىندا ونداعان ادام بولدى. الايدا كوپشىلىك ەلدەردىڭ پاۆيلوندارىنىڭ سىرتىنان مەن بوس قورشاۋلار ارقىلى ءوتتىم. كورمەدەگى ءۇش ادامنىڭ ەكەۋى بەيدجيك تاققان", — دەپ جازدى دجەيمس پالمەر.

پالمەردىڭ ماقالاسى قىزۋ تالقىعا ءتۇستى. ءتۇرلى پىكىرلەر ايتىلدى.

بريتاندىق ءجۋرناليستتىڭ بۇل جازباسىنا قاتىستى "استانا ەكسپو-2017" ۇلتتىق كومپانياسى قوعاممەن بايلانىس دەپارتامەنتىنىڭ ديرەكتورى سەرگەي كۋيانوۆ پالمەردىڭ جازعانىن جالا دەدى.

كۋيانوۆتىڭ ايتۋىنشا، پالمەر دەيتىن ءتىلشى قازاقستانعا كەلمەگەن ەكەن.

«ءبىز ول ءجۋرناليستىڭ بار ەكەنىن انىقتادىق. بريتانيالىق دجەيمس پالمەر بىرنەشە باسىلىمعا ورتالىق ازيا مەن قىتاي تۋرالى جازادى ەكەن. الايدا ەكسپو-2017 كورمەسىندە ونداي جۋرناليست تىركەلگەن جوق. ول - ءبىر. ەكىنشىدەن، دجەيمس پالمەر دەگەن كىسى قازاقستان شەكاراسىنان وتپەگەن. ياعني كەدەندىك تىركەۋدە جوق. دەمەك، پالمەر مىرزا ءوز ماتەريالىن وزگە بىرەۋدىڭ پىكىرىنە سۇيەنىپ جازعان، يا بولماسا، رەپورتاجىن تاپسىرىس بويىنشا شىعارعان»، - دەيدى سەرگەي كۋيانوۆ.

ونان سوڭ، بريتاندىق جۋرناليست وزىنىڭ Twitter-پاراقشاسىنا قازاقستان شەكاراسىنان وتكەنىن راستايتىن ۆيزانىڭ سۋرەتىن، ەكسپو كورمەسىنە كىرگەنىن راستايتىن بيلەتتىڭ سۋرەتىن جۇكتەپ، ەكسپو وكىلىنىڭ وتىرىگىن اشكەرەلەدى.