سوڭعى اقپارات بويىنشا، ماسكەۋدە 731 ادام، سانكت-پەتەربۋرگتە شامامەن 500 ادام ۇستالعان. پوليتسيا ميتينگكە قاتىسۋشىلارعا كۇش قولدانعان. رەسەيدىڭ باسقا قالالارىندا 140 ادام ۇستالعان. قاماۋعا الىنعانداردىڭ جالپى سانى 1400-گە جەتكەن.

ناۆالنىيدىڭ ءوزىن ماسكەۋدەگى ءۇيىنىڭ الدىندا اكتسياعا شىعىپ بارا جاتقاندا ۇستاپ اكەتكەن. ول ميتينگ وتكىزۋدە زاڭدى بۇزدى دەگەن ايىپپەن 30 تاۋلىككە قامالۋى مۇمكىن. كوررۋپتسياعا قارسى كۇرەس قورىنىڭ كەڭسەسىندە ەلەكتر جارىعى مەن ينتەرنەتتى ءسوندىرىپ تاستاعان.

ميتينگ الدىندا ناۆالنىي اكادەميك ساحاروۆ داڭعىلىندا رۇقسات ەتىلگەن ميتينگتى تۆەرسك كوشەسىنە اۋىستىرۋ جونىندە مالىمدەگەن. ماسكەۋ مەرى قاتىسۋشىلار ۇرانسىز، پلاكاتسىز جۇرەتىن بولسا عانا ميتينگتى تۆەرسك كوشەسىنە وتكىزۋگە رۇقسات بەرگەن.

ميتينگ وتكىزۋگە رەسەيدىڭ ۇكىمەت باسشىسى دميتري مەدۆەدەۆكە تيەسىلى بولۋى مۇمكىن دەلىنگەن ءزاۋلىم ۇيلەر مەن جەر ۋچاسكەلەرى جونىندەگى زەرتتەۋ ءفيلمى سەبەپ بولدى.

Abai.kz