زاڭ بارىمىزگە ورتاق. دەگەنمەن سول زاڭدى بەلىنەن باسىپ جۇرگەن مەكتەپ ديرەكتورلارى قانشاما.

«Abai.kz» اقپاراتتىق پورتالىندا قاراساي اۋدانى مۇعالىمدەرىنەن سوعىس ارداگەرلەرىنە ارناپ ءساۋىر ايىنىڭ جالاقىسىنان اقشا ۇستاپ قالعاندىعى تۋرالى ايمان ساعيدۋللانىڭ ماقالاسى جارىق كورگەن بولاتىن. ماقالا جارىق كورگەننەن كەيىن ايمان ساعيدۋللا  مەكتەبىندە تۇسىنىكسىز جاعدايلار ورىن العانىن ايتىپ وتىر.

ايمان ساعيدۋللا، ۇستاز:

– سول ماقالادان سوڭ جاڭاتۇرمىس مەكتەبىنە اياق استى اۋدان اكىمىنىڭ ورىنباسارى  كەلىپ، ديرەكتوردىڭ ورىنباسارلارىنا جيىن اشىپتى. جيىندا قانداي ماسەلە قارالعانىن بىلمەيمىن. جيىننان سوڭ ديرەكتوردىڭ 3  ورىنباسارى دا، نەشە ءتۇرلى جەلەۋمەن تارتىپتىك شارالار الىپتى (تارتىپتىك شارا تۋرالى بۇيرىقتار مەكتەپ قۇجاتتارىندا تىركەلگەن).  سوڭعى كەزدە مەكتەپتە تۇسىنىكسىز جاعدايلار ورىن الا باستادى.  مەن بۇل ۋاقىتتاردا كۋرستا ءجۇر ەدىم.

8-مامىر بۇكىل قازاقستان دەمالعان كۇن. بىراق مەكتەپ ديرەكتورى قاسىموۆا ناعيما تولەۋبايقىزى 8-مامىر دەمالىس كۇن بولعاندىقتان، سول كۇنگى ساباقتاردى 10-مامىر كۇنگە جانە 11-مامىر كۇنگە قويىپ، مەكتەپ وقۋشىلارىن تاڭعى 8.00-دەن  كەشكى 5.30-عا دەيىن مەكتەپتە ۇستاپتى. تۇسكى اسقا 45 مينۋت قانا ۋاقىت بەرىپتى.  بالالار ۇيلەرىنە بارىپ تاماق ىشۋگە دە ۇلگەرمەيدى. بالالار ءۇشىن قالاي قيىن بولعانىن توپشىلاي بەرىڭىز. بالا تەمىر ەمەس قوي.  بۇل تۋرالى وبلىستىق ءبىلىم سالاسىنداعى باقىلاۋ دەپارتامەنتىنىڭ باسشىسى س.دوسماتوۆاعا ارنايى حات جولدادىم. 26-مامىر كۇنى مەكتەپكە تەكسەرۋ كەلدى. مەنىڭ ريزا بولعانىم ، مۇعالىمدەر تەك قانا شىندىقتى ايتتى. جاسىرىپ – جابۋ بولعان جوق. بۇگىن ماعان وبلىستىق ءبىلىمدى باقىلاۋ دەپارتامەنتىنەن مىنا جاۋاپ حات كەلدى. اركىم ءوز ىسىنە جاۋاپ بەرۋى كەرەك، – دەيدى مۇعالىمدەر قۇقىعى ءۇشىن كۇرەسىپ جۇرگەن ۇستاز ايمان ساعيدۋللا.

2016-2017 وقۋ جىلىنىڭ باسىندا قاسىموۆا ناعيما تولەۋبايقىزى قىرعاۋىلدى ورتا مەكتەبىندە ديرەكتورلىق قىزمەت اتقارعان. وسى جىلدىڭ ناۋرىز ايىندا جاڭاتۇرمىس مەكتەبىنە اۋىسىپ، ديرەكتور بولىپ كەلگەن. قىرعاۋىلدى مەكتەبىندە ديرەكتور بولىپ تۇرعانىندا، وقۋ جىلىنىڭ باسىندا عانا 30 مۇعالىمدى ساباقتارىنان بوساتىپ، ورىن تولتىرۋ ءۇشىن اۋدان اكىمى وتكىزگەن ءىس-شاراعا جىبەرگەن. بۇل جاعداي دا باقىلاۋ دەپارتامەنتىنىڭ تەكسەرۋىمەن دالەلدەنىپ، 15 ايلىق ەسەپتىك كورسەتكىش، ياعني 31815 تەڭگە ايىپپۇل تولەگەن ەكەن.

ءبىر جىلدا ەكى رەت زاڭسىزدىعى دالەلدەنىپ، جازالانعان ديرەكتور قالاي ءبىلىم ورداسىنىڭ باسشىسى بولا الادى؟

قۇقىعىڭىز تاپتالىپ جاتسا، ءبىلىمدى باقىلاۋ دەپارتامەنتىنە حات جولداڭىز. تەك قانا حات جولداعانىڭىزدى ەشكىمگە جاريالاماڭىز، تەكسەرۋگە كەدەرگى كەلتىرۋىڭىز مۇمكىن.

مەيىرجان تەمىربەك

Abai.kz