دۇيسەنبى, 25 مامىر 2020
COVID-19 قازاقستاندا. جۇقتىرعاندار — 8531. جازىلعاندار — 4352. قايتىس بولعاندار — 35
انىق 6175 7 پىكىر 7 ماۋسىم, 2017 ساعات 10:28

جامبىلدىق جىگىت مينيستر قاسىموۆتى ۇيلەنۋ تويىنا شاقىردى

قازاقستان رەسپۋبليكاسىنىڭ

ىشكى ىستەر ءمينيسترى،

پوليتسيا گەنەرال-لەيتەنانتى

ق.ن. قاسىموۆقا

قۇرمەتتى قالمۇحانبەت نۇرمۇحانبەتۇلى!

 

مەن 2015 جىلى تالدىقورعان قالاسىندا قحر-نىڭ ازاماتى ءيمانالى جازيرا اتتى قىزبەن تانىسىپ، ءبىر-ءبىرىمىزدى ۇناتىپ، الداعى كۇندەردە وتباسىن قۇرۋعا ۋاعدالاسىپ ەدىك.

وكىنىشكە وراي، بولاشاق جارىم ءيمانالى جازيرا 2016 جىلى 7 ماۋسىمدا  قر «اكىمشىلىك قۇقىق بۇزۋشىلىق تۋرالى» كودەكسىنىڭ 517 بابىنىڭ 2 بولىگىمەن كىنالى دەپ تانىلىپ، قازاقستان رەسپۋبليكاسىنىڭ شەگىنەن اكىمشىلىك جولمەن شىعارىلىپ جىبەرىلدى.

ەڭ قيىنى، «حالىقتىڭ كوشى-قونى تۋرالى» (2011 جىلعى 22 شىلدەدەگى № 477-IV) زاڭىنىڭ 49-بابىنىڭ «5) قازاقستان رەسپۋبليكاسىنىڭ شەتەلدىكتەردىڭ قۇقىقتىق جاعدايى تۋرالى زاڭناماسىن بىرنەشە رەت بۇزعان;» دەگەن نورماسى ەسكەرىلمەستەن، ءبىرىنشى مارتە اكىمشىلىك قۇقىق بۇزعانى ءۇشىن قازاقستان رەسپۋبليكاسىنىڭ شەگىنەن اكىمشىلىك جولمەن شىعارىلىپ جىبەرىلگەنى بولىپ تۇر.

مىنە، سودان بەرى ءبىر جىل ءوتتى. ەندى ءتورت جىلى بار. ءسوز بەرگەن سوڭ، جىگىت ادام ۋادەسىندە تۇرۋ كەرەك! جاقىندا قحر-عا بارىپ، ءيمانالى جازيرامەن زاڭدى نەكەگە تۇرىپ كەلدىم. شىنىمدى ايتسام، ءتورت جىل توسۋ مەن ءۇشىن وڭايعا سوعىپ تۇرعان جوق. بەيبىت كۇندە ەسكى زاماننىڭ قاتال زاڭىنا ۇشىراعان عاشىقتاردىڭ كۇيىن كەشۋ قيىن ەكەن، قالمۇحانبەت اعاتاي!

ونىڭ ۇستىنە، ۇيدەگى ۇلدىڭ كەنجەسى ەدىم.  اكەم نۇرساپا تۇرسىن ميىنا قان قۇيىلىپ، اۋىرىپ جاتىر. مەنىڭ تويىمدى جاساپ، قىزىعىمدى كورىپ كەتسەم دەپ كۇندە ارماندايدى. حالقىمىزدا «ەكى جاستى قوسقان العىس الادى، ەكى جاستى ايىرعان قارعىس الادى!» دەگەن اتالى ءسوز بارىن جاقسى بىلەسىز.

بۇگىن «نۇر وتان» پارتياسى رەسپۋبليكالىق قوعامدىق قابىلداۋ بولمەسىندە ءسىزدىڭ ورىنباسارىڭىز ر.ت. جاقىپوۆتىڭ قابىلداۋدا بولىپ، وسى حاتتى تاپسىردىم.

قر ىشكى ىستەر ءمينيسترى لاۋازىمىڭىزبەن، پوليتسيا گەنەرال-مايورى مارتەبەڭىزبەن مەنىڭ شارۋامدى ءوز قولىڭىزعا الىپ، الىستا قالعان كەلىنىڭىزدىڭ اتاجۇرتىنا ورالۋىنا، سىڭارىنا قوسىلۋىنا كومەكتەسۋىڭىزدى وتىنە سۇرايمىن!

سونىمەن قاتار ءسىزدى ومىردە ءبىر رەت قانا بولاتىن وتباسىن قۇرۋ تويىمىزدىڭ قۇرمەتتى قوناعى بولۋعا شاقىرام!

قۇرمەتپەن،

تۇرسىن ءبورىباي

Abai.kz

 

7 پىكىر