«استانا ەكسپو-2017» ۇلتتىق كومپانياسى جالعان اقپارات تاراتۋشىلارعا قاتىستى قىلمىستىق ءىس قوزعاۋدى سۇراپ وتىر. بۇل تۋرالى «Zakon.kz» پورتالى حابارلادى.

بىرنەشە كۇننەن بەرى «WhatsApp»  ارقىلى ەكسپو-2017 كورمەسى جايلى جۇرتقا تاراعان قاۋەسەت الەۋمەتتىك جەلىنى شۋلاتقان-دى.

اتالعان پورتالعا حابارلاسقان تۇلعانىڭ ايتۋىنشا، ەكسپو-2017 كورمەسىنىڭ اشىلۋ راسىمىنە دايىندىق ءجۇرىپ جاتىر. بىراق، وعان استانالىقتار مەن ەلوردا قوناقتارى جۇمىلدىرىلماعان. ءتىپتى، 4 ماۋسىم كۇنى دە جۇرت كورمە اۋماعىنا كىرە المايدى.

ايتا كەتەيىك، سوڭعى ءبىر-ەكى كۇننەن بەرى ەكسپو-2017 حالىقارالىق كورمەسىنە قاتىستى اقپار جەلىدە تاراي باستادى. وندا 4 ماۋسىم كۇنى حالىقارالىق كورمەنىڭ اشىلۋ سالتاناتىنا سوڭعى دايىندىق جۇمىستارى جۇرگىزىلەتىنى ايتىلعان.

سونداي-اق، الماتىدان ەسترادا جۇلدىزدارى ارنايى كەلىپ، مەرەكەلىك شارا وتكىزىپ، كورمە پاۆيلوندارىنىڭ رەسمي اشىلاتىنى ايتىلعان.

ەكسپو-2017 كورمەسى تۋرالى ەگجەي-تەگجەيلى اقپار جازىلعان حابارلامادا، ءىس-شارا 15:00 مەن 21:30 ارالىعىندا وتەدى دەپ كورسەتىلگەن. ءتىپتى، بۇل شاراعا كەز كەلگەن ەرەسەك جانە 10 جاستان اسقان بالالار كىرە الاتىنى انىق كورسەتىلگەن.

«حالقارالىق كورمەنىڭ اشىلۋى ءراسىمى 9 ماۋسىم كۇنى وتەدى. جانە وعان ارنايى شاقىرتۋى بار رەسمي وكىلدەر عانا قاتىسا الادى. ال شاقىرۋ بيلەتتەرى ساتىلىمعا شىقپاعان. سوندىقتان، كەلەمىن دەۋشىلەر 4 ماۋسىم كۇنى كورمە الاڭىنا كەلۋلەرىنە بولادى. كانسەرت بيلەتتەرى كىرەبەرىستەگى كاسسالاردا ساتىلادى»، دەپ جازىلىپتى الگى حابارلامادا.

جەلىدە گۋلەپ جۇرگەن بۇل اقپارعا قاتىستى رەسمي وكىل پىكىر ءبىلدىرىپ، اقپاراتتىڭ جالعان ەكەنىن جەتكىزىپ وتىر.

Abai.kz