جەكسەنبى, 16 ماۋسىم 2024
اقمىلتىق 5930 17 پىكىر 2 ماۋسىم, 2017 ساعات 11:54

راسۋل حالىق جاۋى بولسا، مەن دە جاۋمىن

سوڭعى بىرنەشە كۇن ىشىندە دوسىم، ارىپتەسىم راسۋل جۇمالىعا قارسى كەشەندى شابۋىل جاسالىپ جاتقانىن بارلىقتارىڭىز كورىپ تە، بايقاپ تا جۇرگەن بولارسىزدار. سوعان وراي، ءوزىمنىڭ كوزقاراسىمدى بىلدىرگىم كەلىپ وتىر.

1. شابۋىلدىڭ باستى سەبەبى - راسۋلدىڭ وسىعان دەيىنگى ەكىنشى دۇنيەجۇزىلىك سوعىس، جەڭىس كۇنىنە قاتىستى تىڭ ويلارى سەبەپ بولدى دەپ سانايمىن.
2. شابۋىلدىڭ ماقساتى - راسۋلدى ادام، ازامات، ساراپشى، مامان رەتىندە قارالاۋ بولىپ تابىلادى. شابۋىلدىڭ تاعى ءبىر ماقساتى اتالمىش كىتاپتى جاريالاۋعا مۇرىندىق بولعان ەرلان قارين دوسىمىزدى قارالاۋ، وعان كۇيە جاعۋ.
3. ەندى ايىپتاردىڭ مانىسىنە كەلسەك، رەكەڭ ءمان-جايدى ءوز پاراقشاسىندا ايتىپ شىقتى. وعان الىپ قوسارىم جوق.
الايدا مىنانى باسا ايتقىم كەلىپ وتىر.
راسۋل وتە ادال، جۇمىسىنا، ومىرىنە، ءسوزى مەن ىسىنە اسقان پرينتسيپپەن، كىرپيازدىقپەن قارايتىن تۇلعا. اتىشۋلى كىتابىنىڭ دۇنيەگە قالاي كەلگەنىن، قانداي ىزدەنىسپەن كەلگەنىن ءبىر ادامداي بىلەمىن. و باستا مىناداي تاڭداۋ تۇرعان بولاتىن; يا عىلىمي مونوگرافيا جازۋ، يا كوپشىلىككە ارنالعان، اعارتۋشىلىق باعىتتاعى شولۋ كىتاپ شىعارۋ. شىنىن ايتايىن، "رەكە، جالپى ءبىزدىڭ ەلدە اراب الەمىنە قاتىستى كوپتەگەن جاڭساق پىكىر بار. كوپشىلىك وقيتىن، كەڭ كولەمدى كىتاپ جوقتىڭ قاسى. بولاشاقتا تالاي مونوگرافيا كەلە جاتار، قازىر كوپشىلىككە ارنالعان دۇنيە كەرەك" دەپ ۇگىتتەگەندەردىڭ ءبىرى مەن ەدىم. مەنىڭ ويىمشا، راسۋل ءوز الدىنا قويعان ماقساتىن تولىق ورىندادى.
"ارابسكي پاسيانس" دەگەن كىتابى قالىڭ جۇرتقا جولىن تاپتى. ىشىندە اراب الەمىنە قاتىستى كوپتەگەن اقپارات بار شولۋ كىتاپ. ءاربىر دەرەككوزى تۋرالى اقپارات كىتاپتى ايقىن، انىق كورسەتىلگەن. كىتاپ جانرىنىڭ ءوزى ءاربىر بەتكە دەرەككوزىن كورسەتۋ، سىلتەمەسىن بەرۋ دەگەندى كوزدەمەيدى. راسۋل تەك وسى كىتاپتىڭ عانا اۆتورى ەمەس. تالاي عىلىمي دۇنيەنى، مونوگرافيانى جازدى. ەشبىرىنە ەشكىمنىڭ ايتار ءمىنى، تاعار ايىبى جوق دەپ ويلايمىن.
شابۋىلدى ۇيىمداستىرۋشىلار ادەيىلەپ وسى كىتاپتى نىسانا قىلعانى دا تەگىن ەمەس. اقپاراتى، دەرەگى كوپ كىتاپتا تىرناق استىنان كىر ىزدەيتىن ادام قاشان دا قاتەلىك تابا الادى. اسقان پرينتسيپكە بارسا، ءدال بۇگىن اق ەلىمىزدە جازىلعان عىلىمي ديسسەرتاتسيا مەن عىلىمي كىتاپتىڭ بارشا اۆتورىن ۇرى-قارى قىلىپ شىعارۋعا بولادى. الايدا ولاردىڭ ءبىرىنىڭ دە مۇرتىن بالتا شاپپاي وتىر عوي...
قىسقاسى، عابيتشە ايتساق، راسۋل حالىق جاۋى بولسا، مەن دە حالىق جاۋىمىن!
راسۋلدى تولىق قولدايمىن! وعان، ەرلانعا قارسى جاسالىپ جاتقان شابۋىلدى جالپى ءبىر بۋىنعا، قازاق ۇلتشىلدارىنا جاسالىپ جاتقان شابۋىل دەپ سانايمىن. وسىنداي جاعدايدا دوستارىمدى قولداۋ، قاسىنان تابىلۋدى ءوزىمنىڭ ادام، دوس، ساراپشى رەتىندەگى بورىشىم، پارىزىم دەپ ەسەپتەيمىن.

ايدوس سارىم

Abai.kz

17 پىكىر