سارسەنبى, 20 قاڭتار 2021
قاۋىپ ەتكەننەن ايتامىن 6286 19 پىكىر 30 مامىر, 2017 ساعات 13:02

رەسەيلىك ديپلوماتتارعا تەكسەرۋ جۇرگىزۋ كەرەك

مولدوۆا مىقتى شىقتى دەيمىز. بۇل جولى پوست-كەڭەستىك كەڭىستىكتەن كەرەگەسىن بولەك قۇرعان مولدوۆا رەسەي ەلشىلىگىنىڭ بەس بىردەي ديپلوماتىن دەپورتتادى.

مولودۆاداعى رەسەيلىك 5 شەنەۋنىك ەندى "نونگراتا تۇلعا". ولارعا مولدوۆا اۋماعىنان شىعۋعا  1 تاۋلىك ۋاقىت بەرىلىپتى. سويتسە، الگى رەسەي ەلشىلىگىندەگى بەسەۋى شپيوندىقپەن اينالىسىپ، مولدوۆانىڭ مەملەكەتتىك قۇپيالارىن جاريا ەتكەن كورىنەدى.

ەلدەن قۋىلعان ديپلوماتتاردىڭ ەسىم-سويلارى ەلگە جاريا بولماعانىمەن، مولدوۆا دەموكراتيالىق پارتياسىنىڭ بۇرىنعى دەپۋتاتى يۋري بولباچان مەن رف اسكەري اتتاشەسى اندرەي گرۋديننىڭ اراسىندا بايلانىس بولعاندىعى تۋرالى اقپارات تارادى.

ال ەكس-دەپۋتات بولباچان 17 ناۋرىز كۇنى تۇتقىندالىپ، وعان  ەلگە "جاسىرىن كىرگەن وفيتسەر" دەگەن ايىپ تاعىلعان.

رەسەيلىك 5 شەنەۋنىكتىڭ قۋىلعانىن  رەسەيدىڭ مولدوۆاداعى ەلشىسى فاريت مۋحامەتشين دە راستاپ وتىرعانعا ۇقسايدى.

ەستەرىڭىزگە سالا كەتەيىك، مولدوۆا پرەزيدەنتى  يگور دودون مامىر ايىندا ماسكەۋدە بولىپ، پرەزيدەنت پۋتين ەكەۋى جەڭىس شەرۋىن بىرگە تاماشالاعان-دى. سول كەزدە بىرقاتار باق پرەزيدەنت دودوننىڭ ماسكەۋدەگى شەرۋگە جالعىز بارعانىن جازىپ ەدى.

ايتپاقشى، بيىل ەستونيا ۇكىمەتى دە كرەمل كىرگىزگەن ديپلوماتتاردى ەلدەن قۋدى.

ەستونيا ءسىم  رەسەيدىڭ ەكى بىردەي كونسۋلىن ەل اۋماعىنان شىعارىپ جىبەرگەن. ەستوندىقتار دا كرەمل ساياساتكەرلەرىن تىڭشىلىقپەن اينالىستى دەپ ايىپتادى.

سولاي. ەسكى وداقتان شىققان كەي مەملەكەتتەر مەملەكەتتىك قاۋىپسىزدىككە، ۇلتقا، تەرريتورياعا قاۋىپتى كەز كەلگەن جاعدايدا وزگە ەلدىڭ (بۇل جاعدايدا رەسەيدىڭ. - رەد.) ديپلوماتتارىن دەپورتاتسيالاي الادى.  ال بىزدە شە؟

مەملەكەت شەكاراسىنىڭ بۇتىندىگىنە جاۋاپتى ۇقك جانىنداعى شەكارا قىزمەتىنىڭ ءوزى مەملەكەتتىك ءتىلدى ماسقارالادى. وعان قۇزىرلى ورگان قىڭق دەمەدى.

ودان قالسا، پارلامەنتتىڭ قاق تورىندە وتىرىپ كوكىگەن دەپۋتات كوسارەۆ كوسەمىنىڭ قۋ سۇيەگىن قازاقستانعا اكەلگىسى كەلەتىنىن اشىق ايتتى. سونى ارمانداپ، اڭساپ جۇرگەنىن جەتكىزدى. بۇعان دا كوز جۇما سالدىق. ودان كەپ، سميرنوۆا دەيتىن مارجا مەملەكەت باسشىسىنىڭ سوزىنە بۇلقان-تالقان بولدى. «لاتىن الىپبيىنە كوشسەك، ورىس الەمىنەن اجىراپ قالامىز» دەپ، ويبايعا باستى. قۇزىرلى ورگاننىڭ قۇلاعى كەرەڭ بە، ايتەۋىر سميرنوۆا دا سوزدەن سۇرىنگەنىن مويىنداپ، جازدىم جاڭىلدىمىمەن جاۋاپكەرشىلىكتەن قۇتىلىپ كەتتى.

بۇعان قوسا، رف-نىڭ قازاقستانداعى ەلشىلىگىنە بىرنەشە مارتە حابارلاسقانىمىزدا ۇققانىمىز – ول جەردە مەملەكەتتىك ءتىلدى جەتىك مەڭگەرگەن قىزمەتكەر جوق ەكەن. ءدال وسىنداي جاعداي اقش-تىڭ قازاقستانداعى ەلشىلىگىندە دە ورىن الدى. قازاق تىلىندە جاۋاپ قاتاتىن قىزمەتكەر تاپپادىق. قازاقستاننىڭ مەملەكەتتىك ءتىلىن مويىنداماي، رەسەيدىڭ مەملەكەتتىك تىلىندە قىزمەت كورسەتەتىن بۇل ەلشىلىكتەر تەكسەرىلۋى ءتيىس!

نۇرگەلدى ابدىعانيۇلى

Abai.kz

19 پىكىر