بەيسەنبى, 21 قاڭتار 2021
جاڭالىقتار 3292 3 پىكىر 30 مامىر, 2017 ساعات 10:57

تۇركىمەنستاندا «گۇلەنشىلەرگە» قاتىسى بار دەلىنگەن ەلۋدەن استام ادام ۇستالدى

تۇركىمەنستاننىڭ لەباپ وبلىسىندا سوڭعى ءبىر ايدا «گۇلەندىك قوزعالىسقا» قاتىسى بار دەلىنگەن ەلۋدەن استام ادام تۇتقىنعا الىنعان.

تۇركىمەنستاننىڭ قۇقىق قورعاۋ ورگاندارىنداعى دەرەككوز ارنايى قىزمەت ءساۋىر ايىنىڭ اياعىندا ايماقتاردا ءىرى رەيد جۇرگىزدى دەيدى.

ونىڭ سوزدەرىنشە، تۇرىك ليتسەيىنىڭ مۇعالىمدەرى مەن بارلىق تۇلەكتەرى ۇستالعان. «تۇنگى ساعات وندار شاماسىندا №2 مامانداندىرىلعان مەكتەپتىڭ مۇعالىمدەرى تۇراتىن جاتاقحاناعا باسىپ كىرگەن. سول ءتۇنى جەتى مۇعالىم مەن ءۇش قوناقتى الىپ كەتكەن. كەلەسى كۇنى تاعى كەلىپ، ەكى مۇعالىمدى تۇتقىنداعان. ال اتامىرات قالاسىندا ءبىلىم ورتالىعىنىڭ ءتورت قىزمەتكەرىن ۇستاپ الىپ كەتتى»،- دەيدى اتى-ءجونىن ايتۋدى ءجون كورمەگەن دەرەككوز.

بۇل اقپاراتتى بيلىك قۇرىلىمىندا ىستەيتىن شەنەۋنىكتىڭ ءبىرى راستاعان. ونىڭ سوزدەرىنشە، 23 ساۋىردەن بەرى لەباپ قالاسىندا بىرنەشە رەت «گۇلەنشىلەردى» ۇستاۋ وپەراتسياسى جۇرگەن. ول قۋعىن-سۇرگىننىڭ جاڭا تۇرىنە كاسىپكەرلەر، تانىمال تۇلعالار، اعارتۋ ءىسىنىڭ ماماندارى ءىلىندى دەيدى.

تۇركيا بيلىگى يسلام ءدىنىن ناسيحاتتاۋشى ابدۋللاح گۇلەندى ەلگە توڭكەرىس جاساماق بولدى دەپ ايىپتاپ، وعان قاتىسى بار دەلىنگەن بارلىق ازاماتتاردى جاپپاي تۇتقىنداپ جاتقان كەزدە، تۇركىمەن بيلىگى دە «گۇلەنشىلەرگە» قارسى ءىس قوزعاعان. تۇركىمەنستاندا وسى كۇنگە دەيىن بار-اياعى 150 ادام ۇستالعان. ولاردىڭ بىرقاتارى تەرگەۋدەن كەيىن بوساتىلسا، ەندى ءبىرى ۇزاق مەرزىمگە تۇرمەگە جابىلدى.

Abai.kz

3 پىكىر