دۇيسەنبى, 25 قاڭتار 2021
جاڭالىقتار 2777 5 پىكىر 30 مامىر, 2017 ساعات 10:36

اتىراۋدىڭ اباقتىسىندا ورازا ۇستاۋعا تىيىم سالىندى

 

اتىراۋداعى ۋگ 157/9 كولونياسىنداعى جازاسىن وتەۋشىلەر مۇسىلماندار قاسيەتتى سانايتىن رامازان ايىندا وزدەرىنە ورازا ۇستاۋعا تىيىم سالىنعانىنا شاعىمداندى دەپ حابارلادى قۇقىق قورعاۋشى اسەل نۇرعازيەۆا.

- بۇگىن ورازا تۇتقان ءتورت سوتتالۋشىنى ىشكى ءتارتىپتى ساقتامادى دەپ كارتسەرگە وتىرعىزعان. بىراق ولار ورازالارىن جالعاستىرىپ جاتىر. كولونيانىڭ قاتاڭ رەجيمىندە ءجۇرىپ ورازا ۇستاۋ وڭاي ەمەس، - دەيدى اسەل نۇرعازيەۆا.

ونىڭ سوزىنشە، سوتتالۋشىلار شاعىمىن جەتكىزگەن تۋىستارى "مۇسىلماندار ءۇشىن قاسيەتتى ايدا ولاردىڭ مۇسىلماندىق پارىزىنا تۇسىنىستىكپەن قاراۋعا بولار ەدى" دەپ رەنىشىن بىلدىرگەن.

قۇقىق قورعاۋشى بۇل تىيىمدى ازاماتتاردىڭ ءدىن ەركىندىگى مەن ار-ۇجدان بوستاندىعى قۇقىن شەكتەۋ دەپ سانايدى.

ۋگ 157/9 كولونياسىندا ورازاعا تىيىم سالىنعانىن اتىراۋ وبلىستىق قىلمىستىق اتقارۋ جۇيەسى دەپارتامەنتى باستىعىنىڭ ورىنباسارى جاستالاپ باساروۆ تا راستادى. ونىڭ سوزىنشە، سوتتالۋشىلاردىڭ ورىنداۋعا ءتيىستى كۇن ءتارتىبى، جاتتىعۋلار جاساۋ، الەۋمەتتىك تۇرمىستىق شارالار اتقارۋ سياقتى مىندەتتەرى بولعاندىقتان ورازا ۇستاۋعا كولونيالارداعى ىشكى ءتارتىپ ەرەجەسى مۇمكىندىك بەرمەيدى.

- ول جەردە كارتسەرگە قامالعاندار تۋرالى اقپارات كەلىپ تۇسكەن جوق، ءبىز ونى تەكسەرەمىز. سوتتالۋشىنىڭ ءبارى بىردەي مۇسىلمان ەمەس. ورازاعا بايلانىستى 8 ساعاتتىق ۇيقىنىڭ ساقتالماۋىنىڭ ءوزى باسقالاردىڭ كونستيتۋتسيالىق قۇقىعىن بۇزادى، - دەيدى پودپولكوۆنيك جاستالاپ باساروۆ.

حالىق اراسىندا "66-زونا" دەپ اتالىپ كەتكەن بۇل كولونيادا دەپارتامەنتتىڭ مالىمەتىنشە 412 ادام جازاسىن وتەپ جاتىر.

اباي-اقپارات

5 پىكىر