دۇيسەنبى, 23 مامىر 2022
الاڭ 5065 5 پىكىر 29 مامىر, 2017 ساعات 11:18

ۇلتتىق ەكونوميكا مينيسترلىگى حالىقتان اقىل سۇراپتى...

ۇلتتىق ەكونوميكا مينيسترلىگى حالىقتان ەل ەكونوميكاسىن قالاي كوتەرۋگە بولادى دەپ كەڭەس سۇراپتى...

ەكىۇشتى وي كەلدى. اۋەلى، ارينە، ەلمەن ساناسىپ، حالىق پىكىرىن بىلگىسى كەلسە – ءجون ەكەن دەدىك.

سوسىن، سوندا وزدەرى نە ءبىتىرىپ وتىر؟ بۇل نە، ولاردىڭ تۇيىققا تىرەلگەنى مە؟ ايتار وي، سىلتەر جولى بولماسا نەعىپ ءجۇر دەگەن ويعا قالدىق!..

سۇراعان سوڭ ايتپاسقا بولمايدى... ايتپەسە، سىناپ-مىنەگەندە بالەدەيسىڭدەر، بىلگىش بولساڭدار قايدا قالدىڭدار دەمەي مە؟ «انشەيىندە اۋزىن جاپپاستىڭ» كەبىن كيمەيىك. تىڭدار قۇلاق بولسا، ايتار ءسوز تابىلادى!..

سونىمەن، القيسسا!..

ۇلتتىق ەكونوميكا مينيسترلىگىنىڭ مىندەتى نە؟ ارينە، ۇلتتىق ەكونوميكا قۇرۋ. ال ءبىزدىڭ «اۋەلى ەكونوميكا، سوسىن ساياسات» دەگەن ۇران كوتەرىپ، وزىق وتىز ەلدىڭ قاتارىنا ەنۋدى مۇرات تۇتقان تاۋەلسىز ەل بيلىگى شيرەك عاسىردا شىنايى ۇلتتىق ەكونوميكا قۇرا الدى ما؟ ايتا المايمىن!..

سوڭعى دەرەكتەرگە قاراعاندا، ۇلتتىق ەكونوميكا ۇلەسى 20 پايىزعا جەتپەيدى. قالعانى... قالعانى، ءيا، جات قولىندا. بۇل نە؟ ءسوز جوق، وتە قاۋىپتى سۇراق. ءتىپتى ۇلت قاۋىپسىزدىگىنە قاتىستى، اسا ماڭىزدى كۇردەلى ماسەلە. بۇنى ءبىر دەڭىز!..

ال ەندى الەمدىك الپاۋىتتار توبىندا جۇرگەن بايلارىمىز بەن باعلاندارىمىز كىم؟ ءوزىڭىز دە بىلەسىز، ولار دا سول – وزگە جۇرت وكىلدەرى... نەمەسە سوعان جاقىن، ايتەۋىر قازاققا جانى اشىمايتىندار. بۇل قالاي؟!

داۋ جوق، بۇل دا – ماڭىزدى ساۋال. شەشىمىن تابۋدى تالاپ ەتەتىن قيىن شارۋا. سوندا ونى كىم شەشەدى؟!

ءسىز. ۇلتتىق ەكونوميكا مينيسترلىگى. ۇلتتىق ەكونوميكادا ۇلت ۇلەسى باسىم بولۋعا ءتيىستى، ونسىز ۇلتتىق ەكونوميكا ەشقاشان كوتەرىلمەيدى.

ماشكەەۆيچ پەن شوديەۆتىڭ، كيم مەن ءنيدىڭ، يۆانوۆ پەن كۋلاگيننىڭ بايلىعىن بىزدىكى دەپ ويلاما. بۇل تەك ۋاقىتشا. باستان جىعا قيسايعان كۇنى «ماڭعىت – اۋزىڭا ساڭعىت» دەپ، جوق بولادى. ءوزى تۇگىل ءىزىن دە تاپپايسىڭ. «ءىس ءبىتتى، قۋ كەتتى!..»

سوندىقتان، نە ىستەۋ كەرەك؟ جوعارىدا ايتتىق، تاعى دا ايتامىز – ۇلتتىق ەكونوميكا مەن بيزنەستىڭ بارلىق سالاسىندا ۇلت ۇلەسى، ۇلتتىق كاسىپكەرلەر باسىم بولۋعا ءتيىستى. سانى دا، ساپاسى دا!.. مينيسترلىك ەڭ الدىمەن سول ءۇشىن جۇمىس ىستەۋى كەرەك.

ايتپاقشى، بۇل مىندەت تاعى ءبىر ۇيىمعا تىكەلەي قاتىستى. ول – ۇلتتىق كاسىپكەرلەر پالاتاسى. پالاتا نە ءۇشىن قۇرىلدى؟!

ورىس اعايىندارىمىز ايتپاقشى، «ماحاببات پەن سوعىستا – بارلىق ءتاسىل قولايلى»... ۇلت مۇددەسى مەن بولاشاعى ءۇشىن، قاجەت بولسا، بارىنە بارۋعا بولادى.

اقىل سۇراعان سوڭ، ايتۋ – پارىز. ونىڭ ۇستىنە، كەڭەس سۇراپ وتىرعان – وزگە ەمەس، ءوزىمىزدىڭ ۇلتتىق ەكونوميكا مينيسترلىگى. قالاي ايتپايسىڭ؟!

راس، بۇل تەك – باعىت قانا... مەجە. ماقسات. سوندىقتان ەڭ باستى نارسە – سول مەجەگە قالاي جەتىپ، بۇل ماقساتتى قالاي جۇزەگە اسىرۋعا بولادى؟ ماسەلە – سوندا!..

وي – كوپ، يدەيا دا – جەتكىلىكتى... سۇراپ جاتسا ايتۋعا بولادى. ازىرگە وسى!..

P/S:   ايتپاقشى، ايتا كەتەر جايت – بىزدە جاقسى جوبا مەن جوسپارلار جەتىپ-ارتىلادى. گاپ تەك سولاردىڭ ورىندالۋىندا. ءتىپتى ەشتەڭە ويلاپ تابۋدىڭ قاجەتى جوق!..

تۇرماعانبەت كەنجەباەۆ

Abai.kz

5 پىكىر