«قازاقفيلم» كينوستۋدياسىنىڭ اتقارۋشى ديرەكتورى ليديا كليموۆانىڭ مالىمدەمەسى بويىنشا،  بۇگىن «فەنيكس» ءفيلمىنىڭ تۇسىرىلىمىنە بولىنگەن قارجىنى جىمقىردى دەپ ايىپتالعانداردىڭ ءبىرى - رەجيسسەر تالعاد جانىبەكوۆ اقشانى قايتارا باستادى.

بۇگىن «فەنيكس» ءفيلمىنىڭ رەجيسسەرى تالعاد جانىبەكوۆتىڭ جارى كۇيەۋىنىڭ كەلتىرگەن زيانىن قايتارۋ ماقساتىندا العاشقى ترانش - 200 مىڭ تەڭگەنى اۋداردى. ت.جانىبەكوۆتىڭ ءوزى تۇتقىندا ەكەنى بەلگىلى. ول 2014 جىلدىڭ 5 ماۋسىمى مەن 2015 جىلدىڭ 13 مامىرى ارالىعىندا «فەنيكس» ءفيلمىنىڭ تۇسىرىلىمىنە بيۋدجەتتەن بولىنگەن 1 ميلليون 655 مىڭ 276 تەڭگە قاراجاتتى جىمقىرىپ، جەكە مۇقتاجىنا جۇمسادى دەپ  ايىپ تاعىلعان بولاتىن.

وسى ورايدا ايتا كەتەتىن جايت، وسى ىسكە قاتىستى باسقا دا ايىپتالۋشىلار العان قاراجاتتى قايتارا باستادى. ۇستىمىزدەگى جىلدىڭ 16 قاراشاسىندا كارتينانىڭ پروديۋسەرى تۇڭعىشباي جامانقۇلوۆ 6 ميلليون تەڭگە قايتارعان بولاتىن. ال 3 ساۋىردە ءفيلمنىڭ اتقارۋشى پروديۋسەرى ناتاليا يۋدينانىڭ اتىنان 2 079 555 تەڭگە، 4 ساۋىردە دايىندىق كەزەڭدە ءتۇسىرۋ توبىن باسقارعان مارلەن ابىشەۆ ءۇشىن 500 مىڭ تەڭگە، كارتينانىڭ ەكىنشى رەجيسسەرى بيجان ابىشەۆ اتىنان 280 مىڭ تەڭگە قايتارىلعان.

سىبايلاس جەمقورلىققا قارسى  قىزمەتىنىڭ مالىمەتىنشە، جالپى العاندا «قازاقفيلم» اق  «فەنيكس» ءفيلمىنىڭ دايىندىق الدى جانە دايىندىق كەزەڭدەرىنە «ت.ك.TURAN UNIVERSAL BUSINESS» جشس-عا (تۇڭعىشباي جامانقۇلوۆ  قۇرىلتايشىسى) 79 ميلليون تەڭگە بولسە، ونىڭ 69 ميلليون تەڭگەسى جىمقىرىلعان بولىپ شىقتى.

2017 جىلدىڭ 9 ناۋرىزىندا وسى ىسكە قاتىستى سوت وتىرىسى باستالدى. سوت الدىنا 9 ادام كەلدى: ءفيلمنىڭ باس پروديۋسەرى تۇڭعىشباي جامانقۇلوۆ، رەجيسسەرى تالعاد جانىبەكوۆ، اتقارۋشى پروديۋسەرى ناتاليا يۋدينا، «قازاقفيلم» اق ەكونوميكا جانە قارجى جونىندەگى بۇرىڭعى اتقارۋشى ديرەكتورى گاۋھار ىسقاقوۆا، كارتينا رەداكتورى گيزات سۇلتانوۆ، جەكە كاسىپكەر يليا كوروبەينيكوۆ، كارتينانىڭ ەكىنشى رەجيسسەرى بيجان ابىشەۆ، ءفيلمنىڭ دايىندىق كەزەڭىندە ءتۇسىرىلىم توبىن باسقارعان ديرەكتور مارلەن ابىشەۆ پەن جشس وكىلى دانيار ابدىقادىروۆ. ولارعا ءفيلمدى تۇسىرۋگە بولىنگەن بيۋدجەتتىك قاراجاتتى جىمقىردى جانە جىمقىرۋعا كومەكتەستى دەگەن ايىپ تاعىلىپ وتىر.

اباي-اقپارات