بەيسەنبى, 6 قازان 2022
ەكونوميكا 6499 0 پىكىر 28 ءساۋىر, 2017 ساعات 15:06

«قتج» ۇك» اق كومپانيالارى توبى بيىل 20 اكتيۆىن باسەكەلەس ورتاعا شىعارادى

28 ساۋىردە 2016-2020 جىلدارعا ارنالعان جەكەشەلەندىرۋدىڭ كەشەندى جوسپارىنا سايكەس الماتىدا ينۆەستورلار  كۇنى وتكىزىلدى.

شاراعا «قازاقستان تەمىر جولى» ۇك» اق باسشىسى قانات الپىسباەۆ قاتىسىپ، ءسوز سويلەدى.

ق. الپىسباەۆتىڭ ايتۋىنشا، بيىلعى جولداۋدا بيزنەس ورتانى بارىنشا تۇبەگەيلى جاقسارتۋ تۋرالى تاپسىرما بەرىلدى. وسى ماقساتتا «قتج» ۇك» اق كومپانيالار توبى بىرقاتار اكتيۆتەردى باسەكەلەس ورتاعا شىعارۋ ءۇشىن بەلسەندى قىزمەت ەتقارۋدا. بۇل شارالار كومپانيانىڭ ستراتەگيالىق دامۋى مەن جەكەشەلەندىرۋدىڭ مەملەكەتتىك باعدارلاماسى اياسىندا جۇرگىزىلۋدە.          مەملەكەت باسشىسى مەن قر ۇكىمەتىنىڭ تاپسىرماسىنا وراي، «قتج» ۇك» اق تەمىرجول كومپانياسى كولىكتىك-لوگيستيكالىق حولدينگكە اينالدى. حولدينگتىڭ الدىندا ترانزيتتىك الەۋەتتى جۇزەگە اسىرا وتىرىپ، قازاقستاننىڭ جاڭا جىبەك جولى بويىنداعى لوگيستيكالىق حابى بولىپ قالىپتاسۋىنا قىزمەت ەتۋدە.

ق. الپىسباەۆتىڭ ايتۋىنشا، «قازىرگى تاڭدا قتج كومپانيالارى توبىندا ماقساتتى قۇرىلىمدىق توپتار قۇرىلۋدا. ولار بەيىندىك اكتيۆتەردى شوعىرلاندىرۋ مەن كولىك-لوگيستيكالىق بيزنەس سەگمەنتىن ءبىر باعىتقا بەيىمدەپ، سونىمەن قاتار بەيىندى ەمەس قوسىمشا اكتيۆتەردى جەكەشەلەندىرۋ كوزدەلەدى».          جەكەشەلەندىرۋگە تەمىرجول تەحنيكالارى مەن قۇرال جابدىقتارىن شىعاراتىن زاۋىتتار، جۇك جانە جولاۋشىلار تاسىمالداۋ سەگمەنتىندەگى اكتيۆتەر، كولىك-لوگيستيكالىق تەرمينالدار، قوسالىق بەيىندى ەمەس اكتيۆتەر شىعارىلادى.

ق. الپىسباەۆتىڭ ايتۋىنشا، (2014-2015) جەكەشەلەندىرۋدىڭ ءبىرىنشى كەزەڭىندە 21 اكتيۆ شىعارىلىپ، ودان 42,4 ميلليارد تەڭگە ءتۇستى. كومپانيانىڭ كوپتەگەن ەنشىلەس كاسىپورىندارى باستاپقى باعاسىنان جوعارى سوماعا ساتىلدى. بۇل ءوز كەزەگىندە جەكە سەكتوردىڭ قتج اكتيۆىنە دەگەن سۇرانىسىنىڭ جوعارى ەكەندىگىن كورسەتەدى.

2016 جىلى 11 اكتيۆ جەكە سەكتورعا شىعارىلىپ، 24 ملرد. تەڭگەگە باعالاندى. "لوكوموتيۆ قۇراستىرۋ زاۋىتى» اق 50% اكتسياسى Evolution سەرياسىنداعى لوكوموتيۆتەردىڭ تەحنولوگياسىنىڭ مەنشىك يەسى مەن نەگىزگى جابدىقتار جيناعىن جەتكىزۋشى «General Electric» كومپانياسىنا بەرىلدى.

2017 جىلى قتج كومپانيالارى توبىنىڭ 21 اكتيۆى شىعارىلادى. ولاردىڭ ىشىندە اقتاۋ حالىقارالىق تەڭىز ساۋدا پورتى مەن «قتج» ۇك» اق سەنىمدى باسقارۋىنداعى بىرقاتار وڭىرلىك اۋەجايلار باسەكەلەس ورتاعا شىعارىلادى.

«ءبىز مەملەكەتتىك جەكەشەلەندىرۋ باعدارلاماسىنا قازاقستاندىق جانە شەتەلدىك ينۆەستورلاردىڭ بەلسەندى قاتىسۋىن كۇتەمىز»،-دەيدى ق. الپىسباەۆ. بۇل ارينە ءوز كەزەگىندە بيزنەس ورتاداعى ينۆەستيتسيالىق احۋالدىڭ جاقسارىپ، ەلىمىزدە ورتا جانە شاعىن بيزنەستىڭ دامۋىنا سەرپىن بەرەتىندىگىنە ول ارقىلى ءىجو وسەتىندىگىنە سەنىم ءبىلدىردى.

اباي-اقپارات

0 پىكىر