دۇيسەنبى, 13 شىلدە 2020
«13 шілде – Ұлттық аза тұту күні»
جاڭالىقتار 4083 16 پىكىر 25 ءساۋىر, 2017 ساعات 19:32

مۇحتار ءابىليازوۆ ءوزىنىڭ قىزمەتكەرلەرىن قالاي «پايدالاندى»

الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا قاشقىن بانكير مۇحتار ءابىليازوۆ پەن ونىڭ سىبايلاستارىنا قاتىستى قىلمىستىق ءىستى قاراۋ ودان ءارى جالعاسۋدا. سوتتىڭ بۇگىنگى وتىرىسىندا پروكۋرورلار بتا بانكتىڭ قىزمەتكەرلەرىنىڭ اتىنا تىركەلگەن وففشورلىق كومپانيالاردى نەسيەلەۋگە قاتىستى قىلمىستىق ارەكەتتەر سۇلباسىن جاريا ەتتى.

بتا بانكتەگى زاڭسىز ايلا-شارعىلار، نەگىزىنەن العاندا، تىكەلەي بانكتىڭ ديرەكتورلار كەڭەسىنىڭ توراعاسى مۇحتار ءابىليازوۆتىڭ ءوز قولىمەن جاسالعان ستسەناري بويىنشا جۇزەگە اسىرىلعان. اتاپ ايتقاندا، 2007 جىلى بانك باسشىلىعىنىڭ تىكەلەي نۇسقاۋىمەن «ليتەر م» جاۋاپكەرشىلىگى شەكتەۋلى سەرىكتەستىگى قۇرىلادى. بۇل كومپانيا اكتسيالارىنىڭ ءبىر پايىزدىق ۇلەسى №6 كورپوراتيۆتىك بيزنەس باسقارماسىنىڭ زاڭگەرى ماكسيم حابلوۆتىڭ اتىنا تىركەلەدى. اتاپ ايتارلىعى، كۋاگەرلەردىڭ سوتتا جاريا ەتكەنىندەي، بىرنەشە ميلليونداعان نەسيەلەر ەشقانداي كەدەرگىسىز بەرىلىپ وتىرعان رەزيدەنت بولىپ تابىلمايتىن كومپانيالاردى تىركەۋمەن وسى باسقارما اينالىسقان. سايىپ كەلگەندە، ماكسيم حابلوۆ جاڭادان قۇرىلعان كومپانيانىڭ ديرەكتورى بولىپ كورسەتىلگەن.

ال، «ليتەر م» جاۋاپكەرشىلىگى شەكتەۋلى سەرىكتەستىگىنىڭ قالعان 99 پايىزدىق اكتسياسىنىڭ ۇلەسى سەيشەل ارالدارىندا تىركەلگەن «Steiman Corp» كومپانياسىنا تيەسىلى بولعان. ايتا كەتەرلىگى، وففشورلىق كومپانيانىڭ مۇددەسىن قازاقستاندا سەنىمحاتپەن قورعاۋ №6 كورپوراتيۆتىك بيزنەس باسقارماسىنىڭ قىزمەتكەرى ەلەونورا سەرگوعا جۇكتەلەدى. الايدا، بتا بانكتىڭ نەسيە بەرۋ ءبولىمىنىڭ قىزمەتكەرلەرىنىڭ ەشقايسىسى مۇنداي «ءبىر كۇندىك» وففشورلىق كومپانيالاردىڭ قوجايىندارىن ومىردە كورمەگەن.

«2007 جىلدىڭ شىلدە ايىندا ماكسيم حابلوۆ بتا بانككە 20,5 ميلليون اقش دوللارى كولەمىندە نەسيە بەرۋگە ءوتىنىش جازادى. نەسيە الۋداعى نەگىزگى ماقسات رەتىندە اينالىمداعى قاراجاتتىڭ قورىن تولىقتىرۋ دەپ كورسەتەدى»،- دەپ اڭگىمەلەدى سوت وتىرىسىندا بتا بانكتىڭ وكىلى تالعات امانتاي. بۇل جولى دا ادەتتەگىدەي ەشقانداي قاجەتتى تالداۋلار جاسالماستان، ءوتىنىش قاناعاتتاندىرىلادى. تىكەلەي مۇحتار ءابىليازوۆتىڭ باقىلاۋىنداعى نەسيە كوميتەتى تۇراقتى نەسيەلىك قۇجاتتاردىڭ جانە ءتيىستى مۇلىكتىك كەپىلدىڭ جوقتىعىنا قاراماستان، مۇنداي نەسيەلىك وتىنىشتەردى ماقۇلداپ وتىرعان. بۇل جولى سولاي بولعان. باستىسى، «اينالىمداعى قاراجاتتى تولىقتىرۋعا» دەپ بەرىلگەن نەسيەلەردىڭ ەشقايسىسى بانككە قايتارىلماعان.

«ارادا ەكى اي ۋاقىت وتكەندە «ليتەر م» جشس-ءنىڭ قارجىلاندىرۋ شەگى 22,5 ميلليون اقش دوللارىنا دەيىن كوبەيتىلگەن. بۇعان كەپىل رەتىندە «مونتاجينجينيرينگ» جاۋاپكەرشىلىگى شەكتەۋلى سەرىكتەستىگىنىڭ جارعىلىق قورىنىڭ 75 پايىزدىق ۇلەسى قويىلۋى كەرەك بولعان»،- دەپ جالعاستىردى ءسوزىن تالعات امانتاي. تۇپتەپ كەلگەندە، «مونتاجينجينيرينگ» جاۋاپكەرشىلىگى شەكتەۋلى سەرىكتەستىگىنىڭ جارعىلىق قورىنىڭ 75 پايىزدىق ۇلەسىن م. ءابىليازوۆتىڭ باقىلاۋىنداعى «ليتەر  I» جاۋاپكەرشىلىگى شەكتەۋلى سەرىكتەستىگى وزىنە مەنشىكتەيدى. سوڭعى كومپانيا م. ءابىليازوۆتىڭ كۇزەتشىسىنىڭ اتىنا تىركەلەدى. بۇل جەردە «مونتاجينجينيرينگتىڭ» الماتى قالاسىنداعى اباي جانە فۋرمانوۆ كوشەلەرىنىڭ قيىلىسىنداعى قۇنى قىمبات جىلجىمايتىن مۇلىك كەپىلگە قويىلۋى ءتيىس بولعان.

الايدا، سايىپ كەلگەندە نە «ليتەر م» جشس-ءىنىڭ، نە «ليتەر  I» جشس-ءىنىڭ تاراپىنان بتا بانككە ەشقانداي كەپىلدىك قويىلماعان. بانكتەن بەرىلگەن نەسيە قايتارىلماعان، ءتىپتى ونى ەشكىم دە قايتارۋعا نيەت تانىتپاعان.

«سترويگرۋپپ LTD» جاۋاپكەرشىلىگى شەكتەۋلى سەرىكتەستىگىنە دە وسىنداي كەستەمەن نەسيە بەرىلگەن. ايتا كەتەلىك، بۇل كومپانيانىڭ اكتسياسىنىڭ 80 پايىزدىق ۇلەسى مۇحتار ءابىليازوۆتىڭ سىبايلاستارىنىڭ ءبىرى بانكتىڭ بۇرىنعى باسقارۋشى ديرەكتورى، سوتتالۋشى قايرات سادىقوۆتىڭ اتىنا تىركەلىپتى. سوت وتىرىسىندا سوتقا تۇسىنىك بەرگەن سادىقوۆ اتالعان كومپانيانىڭ نومينالدى قوجايىنى بولعانىن، بىراق ەشقانداي ماسەلەلەردى شەشۋمەن اينالىسپاعانىن ايتتى. بتا بانكتىڭ نەسيە كوميتەتى ءوتىنىشتى ءوزى تىركەپ،   «سترويگرۋپپ LTD» جشس-نە 45 ميلليون اقش دوللارى كولەمىندەگى كەپىلسىز نەسيەنى اۋدارادى. تۇپتەپ كەلگەندە، بۇل نەسيە دە بانككە قايتارىلماعان.

Abai.kz

16 پىكىر