قازاقستان رەسپۋبليكاسىنىڭ مەملەكەتتىك حاتشىسى گ.ن.ابدىقالىقوۆا قازاقستان حالقى اسسامبلەياسى كەڭەسىنىڭ كەڭەيتىلگەن وتىرىسىنا قاتىستى.

وتىرىسقا قر پارلامەنتىنىڭ دەپۋتاتتارى، اكىمدەردىڭ ورىنباسارلارى مەن وڭىرلىك اسسامبلەيا حاتشىلىقتارىنىڭ مەڭگەرۋشىلەرى، مينيسترلىكتەر مەن ۆەدومستۆولاردىڭ، رەسپۋبليكالىق جانە وڭىرلىك ەتنومادەني بىرلەستىكتەردىڭ وكىلدەرى، قحا عىلىمي-ساراپتامالىق كەڭەسىنىڭ مۇشەلەرى، باق وكىلدەرى قاتىستى.

گۇلشارا ابدىقالىقوۆا ءوز سوزىندە ەلباسى ن.ءا.نازارباەۆتىڭ ەلىمىزدىڭ ساياسي، ەكونوميكالىق جانە رۋحاني جاڭعىرۋى بويىنشا العا قويعان مىندەتتەرىن ىسكە اسىرۋدا وراسان زور جاسامپازدىق الەۋەتكە يە قازاقستان حالقى اسسامبلەياسىنىڭ ءرولىن اتاپ ءوتتى.

مەملەكەتتىك حاتشى اتاپ ايتقانداي، بۇگىن ۇلت تابىسىنىڭ نەگىزگى فاكتورى ادامنىڭ باسەكەگە قابىلەتتىلىگى بولىپ تابىلادى. اسسامبلەيا زاماناۋي قوعام مادەنيەتىنىڭ قالىپتاسۋىنا، وتانسۇيگىشتىكتى تاربيەلەۋدىڭ، ۇلتتىڭ مادەني-گەنەتيكالىق كودىن ساقتاۋدىڭ، ۇلتتىق بىرەگەيلىكتى نىعايتۋدىڭ نەگىزى بولىپ تابىلاتىن «تۋعان جەر» باعدارلاماسى، «قازاقستانداعى 100 جاڭا ەسىم»، «قازاقستاننىڭ كيەلى جەرلەرىنىڭ گەوگرافياسى» جوبالارىن ىسكە اسىرۋدا ءوز ۇلەسىن قوسۋى كەرەك.

وتىرىس بارىسىندا قوستاناي وبلىسىندا اسسامبلەيا قىزمەتىنىڭ جاڭا باعىتتارىن ىسكە اسىرۋ تاجىريبەسى، قر پارلامەنتى ماجىلىسىندەگى قحا دەپۋتاتتىق توبىنىڭ جانە قازاقستان وزبەكتەرىنىڭ «دۋستليك» قوعامدىق بىرلەستىكتەر قاۋىمداستىعىنىڭ جۇمىسى تالقىلاندى.

الماستىرۋ قاعيداتىنا سايكەس، قحا كەڭەسى قحا سەسسياسىنىڭ قاراۋىنا اسسامبلەيا توراعاسىنىڭ قوعامدىق ورىنباسارلارىنىڭ كانديداتۋرالارىن ۇسىندى، قحا-نىڭ «جومارت جان» توسبەلگىسىن بەكىتۋ تۋرالى حاتشىلىقتىڭ ۇسىنىسىن ماقۇلدادى جانە قازاقستان حالقى اسسامبلەياسىنىڭ قوعامدىق ماراپاتتارى تۋرالى ەرەجەنى بەكىتتى.

اباي-اقپارات