سانكت-پەتەربۋرگتا حابارسىز كەتكەن، وسى قالادا وقيتىن قازاقستاندىق ستۋدەنت ماكسيم ارىشەۆ مەترودا بولعان جارىلىستان قازا تاپقان بولىپ شىقتى دەپ حابارلادى قازاقستان سىرتقى ىستەر مينيسترلىگى.

مينسترلىكتىڭ Facebook-تەگى پاراقشاسىندا "رەسەي تەرگەۋ كوميتەتىنىڭ ناقتىلانعان مالىمەتى بويىنشا، بۇعان دەيىن ءىز-ءتۇزسىز جوعالعان قازاقستان ازاماتى ماكسيم ارىشەۆ سانكت-پەتەربۋرگتە 3 ساۋىردە بولعان تەراكت سالدارىنان قازا تاپقانىن حابارلايمىز" دەلىنگەن. ارىشەۆتىڭ ءمايىتى سانكت-پەتەربۋرگتەگى اۋرۋحانالاردىڭ بىرىندە جاتىر. بۇگىن تاڭەرتەڭ سانكت-پەتەربۋرگكە ۇشىپ كەتكەن مارقۇمنىڭ اتا-اناسى تەراكت قۇرباندارى اراسىنان ۇلدارىن تانىعان.

بۇعان دەيىن ءسىم 3 ءساۋىر كۇنى سانكت-پەتەربۋرگتەگى قازاقستان كونسۋلدىعىنا الماتىدان ماكسيم ارىشەۆتىڭ تۋىستارى تەلەفون سوعىپ، ۇلدارىمەن تەراكت بولعان ۋاقىتتان بەرى بايلانىسا الماي وتىرعانىن ايتقانىن حابارلاعان. ءسىم مالىمەتىنشە، ارىشەۆ سانكت-پەتەربۋرگ مەملەكەتتىك ەكونوميكا ۋنيۆەرسيتەتىندە ءۇشىنشى كۋرس ستۋدەنتى بولعان.

سوڭعى مالىمەت بويىنشا، سانكت-پەتەربۋرگتەگى تەراكتىدەن قازا تاپقاندار سانى 14 ادامعا جەتتى.

اباي-اقپارات