سارسەنبى, 21 ءساۋىر 2021
قاينايدى قانىڭ... 4988 0 پىكىر 25 اقپان, 2015 ساعات 14:18

...لەنين وتىر، لەنين نەعىپ وتىر؟

مىنا سۋرەتتەگى لەنين جولداستىڭ ەسكەرتكىشى بۇرىنعى زاماننىڭ رەترو-فوتوسى ەمەس، بۇگىن عانا تۇسىرىلگەن سۋ جاڭا دايەك.

ەسكەرتكىشتىڭ تۇرعان ورىنى - الماتى قالاسىنىڭ تۇرىكسىب اۋدانىنىنداعى دەمالىس ساياباعى. سەيفۋللين داڭعىلى مەن شولوحوۆ كوشەسىنىڭ قيىلىسىندا ورنالاسقان دەمالىس ساياباعىنداعى «كۇنكوسەمنىڭ» كىتاپ وقىپ وتىرعان تاس بەينەسى 1980 جىلدارى ورناتىلعان بولۋى كەرەك. بىلتىرعى جىلى بۇل ساياباققا كۇردەلى جوندەۋ جۇمىستارى جاسالىپ، اباتتاندىرۋ مەن جاڭالاۋ جۇرگىزىلگەن.

«لەنيننىڭ ءداۋىرى ءوتتى عوي، قازىر ەل بولعانىمىزعا دا 25 جىل بولىپ قالدى. ەسكەرتكىشتى الىپ تاستاۋ تۋرالى اۋدان اكىمىنىڭ قايبىر جىلعى حالىقپەن كەزدەسۋىندە ايتىلعان. سول كەزدە كۇردەلى جوندەۋ جاسالاتىن بولدى، ەسكەرتكىش تۋرالى ماسەلەنى سول كەزدە شەشەمىز دەپ ەدى... ءالى تۇر عوي، مىنە!» - دەيدى ساياباقتا دەمالىپ وتىرعان قارتتاردىڭ ءبىرى. وكىنىشتىسى، قاريا اتى-ءجونىن ايتۋدان ات-تونىن الا قاشتى. ايتۋىنشا، بالاسى اكىمدىكتە قىزمەتتە ەكەن، زيانى ءتيىپ كەتۋى عاجاپ ەمەس...

نە دەگەنمەن دە، اتى تۇگىلى ەلەسى جوعالعان كوممۋنيستىك پارتيا كوسەمىنىڭ ەسكەرتكىشىن ورنىنان الىپ تاستاۋدىڭ اسا ءبىر قيىن ءىس ەكەنىن ايتۋدىڭ ءوزى ىڭعايسىز بولار ەدى. الدە، الماتىنىڭ، ونىڭ ىشىندە تۇرىكسىب اۋدانىنىڭ اكىم-قارالارى قاي بۇرىشتا كىمنىڭ ەسكەرتكىشى تۇرعاندىعىن باقىلاۋدان قالدى ما ەكەن؟ ولاي بولعان جاعدايدا، قالا اكىمى احمەتجان ەسىموۆ پەن اۋدان اكىمى ۆلاديمير ۋستيۋگوۆتىڭ قۇلاعىنا التىن سىرعا. ەسكەرتكىشتىڭ تۇرعان جەرىن نۇسقادىق...

ەلباسى ن.نازارباەۆ ء«بىز ءۇشىن كسرو وتكەن تاريحىمىز. ەندى كوممۋنيستىك يدەولوگياعا قايتىپ ورالمايمىز... ءبىز اتا-بابا اڭساعان تاۋەلسىز ەل بولۋ جولىنا تۇستىك...» دەگەن ءسوزى ارقىلى كەشەگى كوڭىل-كۇيدەن ارىلۋعا شاقىرعالى دا 20 جىلدان اسىپ كەتتى، ال ءبىز تەرەزەمىزدەن لەنينگە قاراپ ءالى وتىرمىز...

قالماحانبەت مۇقامەتقالي.

Abai. kz

0 پىكىر