سارسەنبى, 21 ءساۋىر 2021
جاڭالىقتار 3018 0 پىكىر 25 اقپان, 2015 ساعات 19:21

ەلباسى سپيكەرلەرمەن كەڭەستى

«ەلباسى نۇرسۇلتان نازارباەۆ پارلامەنت سەناتىنىڭ توراعاسى قاسىم-جومارت توقاەۆ جانە ءماجىلىس توراعاسى قابيبوللا جاقىپوۆپەن كونسۋلتاتسيا وتكىزدى»، - دەپ حابارلايدى اقوردانىڭ ءباسپاسوز قىزمەتى.

كەزدەسۋ بارىسىندا قازاقستان رەسپۋبليكاسى پرەزيدەنتىنىڭ سايلاۋىن وتكىزۋ تۋرالى قازاقستان حالقى اسسامبلەياسىنىڭ باستاماسى قارالدى. مەملەكەت باسشىسى بۇل باستامانى ەل-جۇرت، سونىڭ ىشىندە ەڭبەك ۇجىمدارى مەن قوعامدىق بىرلەستىكتەر مۇشەلەرى، زيالى قاۋىم، جاستار جانە اعا بۋىن تالقىلاپ جاتقانىنا توقتالدى.

«باستامانى پارلامەنت پالاتالارى دا قاراپ، قولداۋ ءبىلدىردى جانە ماعان تيىسىنشە ۇندەۋ جولدادى. پارلامەنت سەناتىنىڭ سۇراۋى بويىنشا كونستيتۋتسيالىق كەڭەس وسى ماسەلە جونىندە نورماتيۆتىك قاۋلى قابىلدادى»، - دەدى قازاقستان پرەزيدەنتى.

نۇرسۇلتان نازارباەۆ ەلدەگى نەگىزگى سالالاردى دامىتۋعا باعىتتالعان بىرقاتار مەملەكەتتىك ۇزاقمەرزىمدى باعدارلامالاردىڭ بەلسەندى تۇردە جۇزەگە اسىرىلىپ جاتقانىنا نازار اۋداردى.

«مەنىڭ ويىمشا، قازاقستاندىقتار اتالعان باعدارلامالاردى جۇزەگە اسىرۋ ىسىنە جۇمىلۋ ءۇشىن سايلاۋ وتكىزۋ قاجەت دەپ سانايدى. سونداي-اق تۇرعىندار الەمدە بولىپ جاتقان وقيعالارعا جانە ەل ىشىندەگى تۇراقتىلىقتى ساقتاۋعا بايلانىستى الاڭدايدى. بۇدان ارعى جۇمىس ءۇشىن حالىقتىڭ قولداۋى قاجەت»، - دەدى مەملەكەت باسشىسى.

ق.توقاەۆ كونستيتۋتسيا ەرەجەلەرىنە ساي كەلەتىن پرەزيدەنت سايلاۋىن وتكىزۋدى قولدادى. ول قازىرگى ۋاقىتتا، الەمدە قالىپتاسقان تۇراقسىزدىق جاعدايىندا بۇكىل ەلىمىزگە مەملەكەت باسشىسىنىڭ بەدەلى قاجەت ەكەنىن اتاپ ءوتتى.

ق.جاقىپوۆ ءماجىلىس دەپۋتاتتارى مەن قازاقستان قوعامىنىڭ ءتۇرلى توپتارى ەلدىڭ جەتىستىكتەرى مەن الەمدەگى احۋالدى ەسكەرە كەلىپ، سايلاۋ وتكىزۋدى قولداپ وتىرعانىن ايتتى.

اباي-اقپارات.

0 پىكىر