مەملەكەت باسشىسى نۇرسۇلتان نازارباەۆ پرەمەر-مينيستر كارىم ءماسىموۆتى قابىلداپ، پرەزيدەنت سايلاۋىن وتكىزۋگە بايلانىستى كونسۋلتاتسيا وتكىزدى. بۇل تۋرالى اقوردانىڭ ءباسپاسوز قىزمەتى حابارلايدى.

كەزدەسۋ بارىسىندا مەملەكەت باسشىسى بيلىكتىڭ زاڭ شىعارۋشى جانە اتقارۋشى تارماقتارى باسشىلارىمەن كونسۋلتاتسيالار ەل تۇرعىندارى مەن ءتۇرلى ۇيىمداردىڭ پرەزيدەنت سايلاۋىن وتكىزۋگە قاتىستى وي-پىكىرلەرىنە بايلانىستى وتكىزىلىپ وتىرعانىن ايتتى.

- حالىق مەملەكەت جۇزەگە اسىرىپ جاتقان باعدارلامالار جالعاستىرىلىپ، ءوز مارەسىنە جەتكىزىلەدى، ال ولاردىڭ ناتيجەلەرى جۇرتتىڭ ءومىرىن جاقسارتۋعا مۇمكىندىك بەرەدى دەپ كۇتىپ وتىر. بۇل ماسەلە ينۆەستورلار ءۇشىن سەنىمدىلىك بەرىپ، جاڭا پەرسپەكتيۆالارعا جول اشاتىندىقتان ماڭىزدى مانگە يە، - دەدى نۇرسۇلتان نازارباەۆ.

ءوز كەزەگىندە ك.ءماسىموۆ قوعامدا پرەزيدەنت سايلاۋىن وتكىزۋ ماسەلەسى بەلسەندى تالقىلانىپ جاتقانىن راستادى.

- ۇكىمەت سايلاۋ وتكىزۋ ءۇشىن زاڭدىق تۇرعىدان كەدەرگى كورىپ تۇرعان جوق. ءىس جۇزىندەگى قيسىندىلىق جونىنەن، ءسىزدىڭ «نۇرلى جول» جولداۋىڭىز دەر كەزىندە جاسالىپ، ەل ىشىندە جانە سىرتىندا جوعارى باعالاندى. سونداي-اق ءسىز «قازاقستان-2050» ستراتەگياسىندا ۇزاقمەرزىمدى ءىس-قيمىل جوسپارىن ۇسىندىڭىز. وسىعان بايلانىستى سايلاۋ وتكىزۋ ماسەلەسى دەر كەزىندە كوتەرىلدى، ويتكەنى ول اتالعان شارالاردىڭ ءبارىن جۇزەگە اسىرۋ ءۇشىن قوسىمشا ماندات بەرەدى. جالپى العاندا، سايلاۋ قازاقستاننىڭ تۇراقتى دامۋى ءۇشىن قاجەتتى سەنىمدى ەسەلەي تۇسەدى، - دەدى پرەمەر-مينيستر.

اباي-اقپارات.