تۇرعىن ءۇي قۇرىلىس جيناق بانكى «قولجەتىمدى تۇرعىن ءۇي–2020» باعدارلاماسى اياسىندا 60 ميللياردقا جۋىق تەڭگەنى بيۋدجەتكە مەرزىمىنەن بۇرىن قايتاردى.

«بايتەرەك» ۇلتتىق باسقارۋ حولدينگىنىڭ ەنشىلەس كومپانياسى – «قازاقستاننىڭ تۇرعىن ءۇي قۇرىلىس جيناق بانكى» اق بيىل «2020 جىلعا دەيىن وڭىرلەردى دامىتۋ» – «قولجەتىمدى تۇرعىن ءۇي–2020» بادارلاماسى بويىنشا ءوز باعىتىن تولىق كولەمدە ىسكە اسىرماق. بانكتىڭ ءباسپاسوز قىزمەتى حابارلاۋىنشا، سالىنىپ جاتقان نىسانداردى قارجىلاندىرۋ تولىق ساقتالاتىن بولادى. قتقجب «جاس وتباسىعا ارنالعان تۇرعىن ءۇي» جانە «حالىقتىڭ بارلىق ساناتىنا ارنالعان تۇرعىن ءۇي» اتتى ەكى باعىتىن ءارى قاراي دا جۇزەگە اسىرا بەرەدى.

ءبىرىنشى سانات بويىنشا 2 164 پاتەر پايدالانۋعا بەرىلسە، ال ەكىنشى سانات بويىنشا بانكتىڭ 5 923 سالىمشىسى پاتەر الدى. بيىل جالپى اۋدانى 540 مىڭ شارشى مەتر بولاتىن تۇرعىن ۇيلەر پايدالانۋعا بەرۋ جوسپارلانىپ وتىر (تۇرعىن ءۇيدى پايدالانۋعا بەرۋدىڭ جىلدىق جوسپارى – 300 مىڭ شارشى م.). قولجەتىمدى تۇرعىن ۇيلەردىڭ ءبىر شارشى مەترىنىڭ باعاسى بۇرىنعى كۇيىندە قالادى.

2014 جىلى بانك «قولجەتىمدى تۇرعىن ءۇي–2020» باعدارلاماسىن جۇزەگە اسىرۋ قارقىنىن تومەندەتكەن جوق. جىل قورىتىندىسى بويىنشا، جالپى اۋدانى 429,3 مىڭ شارشى مەتر بولاتىن تۇرعىن ءۇي نەمەسە 7033 پاتەر پايدالانۋعا بەرىلگەن.

«قولجەتىمدى تۇرعىن ءۇي – 2020» باعدارلاماسى اياسىندا تۇرعىن ءۇي قۇرىلىس جيناق جۇيەسىنىڭ قارجىسى ءتيىمدى پايدالانىلىپ كەلەدى. بۇل مەملەكەت بيۋدجەتىنە تۇسەتىن سالماقتى ازايتادى. ماسەلەن، تۇرعىزىلعان ۇيلەردىڭ تولەمى رەتىندە تۇرعىن ءۇي قۇرىلىس جيناق بانكى 2014 جىلى جەرگىلىكتى اتقارۋ ورگاندارىنا 34 ميلليارد تەڭگە اۋداردى. باعدارلاما جۇزەگە اسا باستاعاننان بەرى، ياعني 2012 جىلدان بەرى وتكەن تۇرعىن ۇيلەر ءۇشىن بانك اكىمدىكتەرگە 59,9 ميلليارد تەڭگە اۋداردى.

ەستەرىڭىزگە سالا كەتسەك، «قازاقستاننىڭ تۇرعىن ءۇي قۇرىلىس جيناق بانكى» اق – «بايتەرەك» ۇلتتىق باسقارۋشى حولدينگى» اق-نىڭ ەنشىلەس كومپانياسى. حولدينگ ەكونوميكانى دامىتۋ جانە ارتاراپتاندىرۋعا ىقپال ەتۋ، ينۆەستيتسيا تارتۋ، كلاستەرلەردى دامىتۋ جانە ونىڭ ەنشىلەس ۇيىمدارىندا كورپوراتيۆتىك باسقارۋ جۇيەسىن جەتىلدىرۋ ماقساتىمەن قۇرىلعان.

اباي-اقپارات.