«قر پرەزيدەنتتىگىنە كانديداتتاردى تىركەۋ بۇگىن باستالدى. بۇل تۋرالى بۇگىن قر پرەزيدەنتى جانىنداعى ورتالىق كوممۋنيكاتسيالار قىزمەتىندەگى بريفينگتە قر ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆ ءمالىم ەتتى» - دەپ حابارلايدى inform.kz.

«بۇگىن ورتالىق سايلاۋ كوميسسياسىنىڭ وتىرىسىندا سايلاۋ قۇجاتتارىنىڭ ۇلگىلەرى مەن سايلاۋدى دايىنداۋ جانە وتكىزۋ جونىندەگى نەگىزگى ءىس-شارانىڭ كۇنتىزبەلىك جوسپارى بەكىتىلدى. اتالعان جوسپارعا سايكەس پرەزيدەنتتىككە كانديداتتاردى ۇسىنۋ 26 اقپاندا باستالىپ، 15 ناۋرىزدا اياقتالادى»، - دەدى قر ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆ .

كوميسسيا توراعاسىنىڭ ايتۋىنشا، پرەزيدەنتتىككە كانديداتتاردى قر ورتالىق سايلاۋ كوميسسياسى تىركەيدى. «كانديداتتاردى تىركەۋ 25 ناۋرىزدا اياقتالادى. كانديداتتاردى تىركەۋ مەرزىمى اياقتالعاننان كەيىن ولاردىڭ ۇگىت ناۋقانى باستالادى. ول 26 ناۋرىزدا باستالىپ، 24 ساۋىرگە دەيىن جۇرگىزىلەدى»، - دەدى ق.تۇرعانقۇلوۆ.

اباي-اقپارات.