س.تورايعىروۆ اتىنداعى پاۆلودار مەملەكەتتىك ۋنيۆەرسيتەتىندە قازاقستان حالقىنىڭ بىرلىگى كۇنى قارساڭىندا ەتنيكالىق مادەنيەتتەر فەستيۆالى ءوتتى.

فەستيۆالگە س.تورايعىروۆ اتىنداعى پمۋ تاربيە جۇمىسى جانە الەۋمەتتىك ماسەلەلەر جونىندەگى دەپارتامەنت، «بىرلىك» ستۋدەنتتىك اسسامبلەياسى مەن جاستار ءىسى جونىندەگى كوميتەتى مۇرىندىق بولدى. مەرەكەگە قۇرمەتتى قوناقتار رەتىندە پاۆلودار وبلىسى قازاقستان حالقى اسسامبلەياسىنىڭ مۇشەلەرى كەلدى.

حالىقتار اراسىنداعى دوستىقتى تۋ ەتكەن مەرەكەنى اشۋ سالتاناتىندا س.تورايعىروۆ اتىنداعى پمۋ ستۋدەنتتىك فيلارمونيانىڭ باسشىسى اينۇر ءازىمحان ۇلتتار اراسىنداعى دوستىقتىڭ قادىر-قاسيەتى ىنتىماق پەن بىرلىكتە ەكەنىن اتاپ ءوتتى. «س.تورايعىروۆ اتىنداعى پمۋ قابىرعاسىندا 30-عا جۋىق ۇلت وكىلدەرى ءبىلىم الىپ ءجۇر. ىنتىماعى جاراسقان شاڭىراق استىندا ولاردىڭ ارقايسىسى ءبىر ءۇيدىڭ بالاسىنداي تاتۋ-ءتاتتى ءومىر كەشۋدە. سوندىقتان كوپ ۇلتتى وقۋ وردامىز – ءبىزدىڭ بايلىعىمىز، ماقتانىشىمىز» دەدى اينۇر ازىمحانقىزى.

س.تورايعىروۆ اتىنداعى پمۋ «بىرلىك» ستۋدەنتتىك اسسامبلەياسىنىڭ توراعاسى راميل سمايلوۆتىڭ ايتۋىنشا، بۇل شارا ۋنيۆەرسيتەتىمىزدەگى ستۋدەنتتىك جاستاردىڭ اراسىندا بىرلىك پەن دوستىقتى نىعايتۋ مۇراتىن كوزدەگەن. «بۇل مەيرام ءار ۇلتتىڭ اراسىنداعى دوستىقتى بەرىك ەتۋگە، ءبىر-ءبىرىنىڭ اراسىنداعى بىرلىكتى ودان دا مىعىم ەتۋگە ۇيىتقى بولادى دەپ ەسەپتەيمىن. ال بۇگىنگى فەستيۆالدە ءار ۇلتتىڭ وكىلى ءوز مادەنيەتىنىڭ باي مۇراسىن پاش ەتۋ مۇمكىندىگىنە يە بولدى» دەيدى راميل.

فەستيۆال اياسىندا تاربيە جانە الەۋمەتتىك جۇمىس دەپارتامەنتى مەن ستۋدەنتتىك فيلارمونيانىڭ ۇيىمداستىرۋىمەن ۇلتتىق تاعامدار كورمەسى مەن وبلىستىق دوستىق ءۇيى شىعارماشىلىق ۇجىمدارىنىڭ مەرەكەلىك كونتسەرتى ءوتتى.  كورەرمەندەر كونتسەرتتىك باعدارلامادا ۋكراين، تاتار-باشقۇرت، كورەي، ۇيعىر، قازاق، ورىس ۇلتتارىنىڭ ونەرىنە ءتانتى بولدى. ۇلتتىق اۋەزدى اندەر مەن اسەم بيلەر ءار ۇلت وكىلىن شابىتتاندىرىپ، ماقتانىش سەزىمىن سىيلادى. 

ء«بىز فەستيۆالدىڭ ءار ستۋدەنتكە، ءار وقىتۋشىعا قىزىقتى دا تانىمدى بولۋىنا، كوتەرىڭكى كوڭىل-كۇي سىيلاۋعا جانە ءار ۇلتتىڭ ەشكىم بايقاي بەرمەيتىن كەرەمەت ەرەكشىلىگىن كورسەتۋگە تىرىستىق» دەيدى س.تورايعىروۆ اتىنداعى پمۋ جاستار ءىسى جونىندەگى كوميتەت ءتورايىمى اقبوتا سارىباي.

اباي-اقپارات.