«كيىكتەر قىرعىنىنا سەبەپشى بولۋى مۇمكىن «پروتون» زىمىرانىن ۇشىرۋدى توقتاتۋدى جانە ەلىمىزدەگى رەسەي فەدەراتسياسىنىڭ  اسكەري-جاتتىعۋ پوليگوندارىن شۇعىل جابۋدى تالاپ ەتەمىز» دەپ باستالاتىن «انتيگەپتيلشىلەردىڭ» اشىق حاتى ەلباسى  نۇرسۇلتان نازارباەۆقا باعىتتالىپتى.

انتيگەپتيلشىلەر قوستاناي، اقمولا جانە اقتوبە وبلىستارىندا قىرىلعان بوكەندەردىڭ سانى 85 000 نان اسقانىن العا تارتا وتىرىپ،  قوستاناي وبلىسىندا ەڭ كوپ كيىك قىرىلعان (40 000نان اسا) اۋماقتان عارىش زىمىرانى بولشەكتەرىنىڭ تابىلعانىن جانە ول تۋرالى قوستاناي وبلىستىق پروكۋراتۋراسىنىڭ ماماندارىنىڭ حابارلاعانىن اتاپ ءوتتى.

«كيىكتەر قىرعىنىنا گەپتيلدىڭ قاتىسى بولۋى ابدەن مۇمكىن. وسى جىلدىڭ 16-مامىرى كۇنى بايقوڭىردان ۇشقان رەسەيدىڭ پروتون زىمىرانى جەردەن كوتەرىلگەن سوڭ 500 سەكۋنتتان كەيىن اپاتقا ۇشىرادى.

ال قر اۋىل شارۋاشىلىق مينيسترلىگىنىڭ رەسمي اقپاراتى بويىنشا 17-مامىر كۇنى، ياعني زىمىران قۇلاعاننىڭ ەرتەسى  بەتپاقدالاداعى "ىرعىز-تورعاي" تابيعي رەزەرۆاتىندا العاشقى 4 كيىكتىڭ ولىگى تابىلعان» دەيدى قوزعالىس مۇشەلەرى.

سونىمەن بىرگە، قوزعالىس مۇشەلەرى قاراعاندى وبلىسىنىڭ تۇرعىندارىنىڭ مالىمدەۋى بويىنشا كيىكتەردىڭ جاپپاي قىرىلۋىنا  قاراعاندى وبلىسى بالقاش كولىنىڭ باتىسى مەن بەتپاقدالا اۋماعىن قامتىپ جاتقان سارىشاعان اسكەري- جاتتىعۋ پوليگونىندا جاسالعان سىناقتىڭ سەبەبى بولۋى مۇمكىن ەكەنىن مالىمدەگەن. 

«وسى جاعدايلارعا قاراپ، 85 000 كيىكتىڭ قىرىلۋىنا «پروتون» زىمىرانىنىڭ قۇلاۋى نەمەسە اقتوبە وبلىسىندا جانە قاراعاندى وبلىسىنداعى بەتپاقدالادا ورنالاسقان رەسەيدىڭ اسكەري-جاتتىعۋ پوليگونىنىڭ اسەرى بولۋى ابدەن مۇمكىن دەپ ويلايمىز.

سول سەبەپتى، «بايقوڭىر» عارىش ايلاعىنان «پروتون» زىمىرانىن ۇشىرۋدى تەز ارادا، ءۇزىلدى-كەسىلدى توقتاتۋدى جانە ەلىمىزدەگى رەسەي فەدەراتسياسىنىڭ  اسكەري-جاتتىعۋ پوليگونىن شۇعىل جابۋدى تالاپ ەتەمىز» دەيدى اشىق حاتتا.   

«انتيگەپتيل» قوزعالىسى

Abai.kz