نازارباەۆ ۋنيۆەرسيتەتى - ماڭگىلىك ەلدىڭ ماڭداي الدى ءبىلىم بەرۋ وشاعى. بۇل تۋرالى بۇگىن نازارباەۆ ۋنيۆەرسيتەتىنىڭ العاشقى تۇلەكتەرىنە ديپلوم تاپسىرۋ راسىمىندە ەلباسى نۇرسۇلتان نازارباەۆ ايتتى.

قر پرەزيدەنتى نازارباەۆ ۋنيۆەرسيتەتىنىڭ تۇلەكتەرى قازاقستاندى بولاشاقتا تۇبەگەيلى جاڭارتۋعا، «100 ناقتى قادام» باعدارلاماسىن جۇزەگە اسىرۋعا ات سالىساتىندىعىنا سەنىم ارتتى.

«بارشاڭىزدى وسىناۋ تاريحي ساتپەن جانە ۋنيۆەرسيتەتتىڭ العاشقى مەرەيتويى بەس جىلدىعىمەن شىن جۇرەگىممەن قۇتتىقتايمىن. بولاشاقتا سان مىڭداعان تۇلەكتەر ءۇشىن سان عاسىرلىق مەرەكەلەرى جاسالاتىن بولادى. سەبەبى، نازارباەۆ ۋنيۆەرسيتەتى - ماڭگىلىك ەلدىڭ ماڭداي الدى ءبىلىم بەرۋ وشاعى»، - دەدى ەلباسى.

ايتا كەتەيىك، 2010 جىلى قازاقستان پرەزيدەنتىنىڭ باستاماسىمەن قۇرىلعان بۇل وقۋ ورنى وتاندىق ءبىلىم بەرۋدىڭ ۇزدىك ۇلگىسى بولىپ تابىلادى. بيىل ۋنيۆەرسيتەتتى 446 ستۋدەنت ءتامامداپ وتىر. تاراتىلعان مالىمەتتەرگە قاراعاندا، جالپى وقۋ ورنى اشىلعاننان بەرى جەتى مەكتەپتەگى ستۋدەنتتەر سانى 2 800-گە دەيىن جەتتى. جىل سايىن 500 ادام وقۋ گرانتىنا يە بولۋدا. ماگيسترانتتار مەن دوكتورانتتار دا مەملەكەتتىك ءبىلىم بەرۋ تاپسىرىسى بويىنشا ءبىلىم الادى.

اباي-اقپارات