بەيسەنبى, 24 قىركۇيەك 2020
COVID-19 قازاقستاندا. جۇقتىرعاندار — 107529. جازىلعاندار — 102323. قايتىس بولعاندار — 1699
قوعام 5587 0 پىكىر 28 مامىر, 2015 ساعات 14:35

ايمان ساعيدۋللاەۆا فەنومەنى

ءبىراز كۇن بولدى، Abai.kz اقپاراتتىق پورتالىندا (http://abai.kz/post/view?id=3515) مۇعالىمدەر ماسەلەسى تالقىلانىپ جاتىر. وعان العاشقى تۇرتكى بولعان ۇستاز ايمان ساعيدۋللاەۆا (سۋرەتتە). مەن مۇنى "فەنومەن" دەپ سانايمىن. سول تۋرالى ويلارىم مىناۋ:

بارلىق جەردە شىندىقتى اشىپ ايتاتىن كەز كەلدى. ەلباسىنىڭ ءوزى ونى قولداپ وتىر. سوندىقتان "ۇستاز" اتى بار بىلىكتى مۇعالىمدەر ەندى بۇرىنعىداي ديرەكتورىنىڭ الدىندا جاسقانشاقتاي بەرمەگەنى دۇرىس. مىڭداعان ديرەكتورلار دا وزدەرىنىڭ جۇمىستارىن "قايتا قاراپ", كوررۋپتسيا دەگەن پالەنى ءوز مەكتەپتەرىنەن "قۋىپ شىعۋعا", ونىڭ ورنىنا بىلىكتى ۇستازدار ۇجىمىن توپتاستىرۋعا ۇمتىلۋلارى قاجەت، ءارى، سونىمەن ءبىر مەزەتتە ديرەكتورلاردىڭ "باسقاشا قىزمەت ەتۋىنە" مۇمكىندىك بولمايتىنداي جاعدايلار الدىن الا رەتتەلىپ قويىلۋى ءتيىس! مەكتەپ - ديرەكتور جانە ونىڭ ماڭايىنداعى شاپقىلاعان ورىنباسارلارى مەن وزگە دە تامىر-تانىستارىنىڭ كۇنكورىس كوزى ەمەس. مەكتەپ - مەملەكەتتىڭ بولاشاعىنا قىزمەت ەتۋشى، بەلسەندى، ءبىلىمدى، ادامگەرشىلىكتى، ادىلەتتى ازامات تاربيەلەۋشى، ەلىمىز ءۇشىن ستراتەگيالىق ماڭىزى بار "تاربيە-ءبىلىم كەشەنى" ەكەنىن - مەكتەپ باسشىلارىنىڭ جادىنا جاتتاپ العانى وڭدى. كەيبىر ديرەكتورلار ءوز مىنەزىندەگى "اپەرباقاندىقتى" ۇمىتىپ، "پەداگوگتاردىڭ پەداگوگى" بولۋعا ۇمتىلسا - تاماشا كورسەتكىشتەرگە جەتەدى: قۇرمەت تە، اتاق تا، بايلىق تا، باقىت تا ونداي "ۇستاز-باسشىنى" ءوزى ىزدەپ تاباتىن بولادى. ال، ۇكىمەت عىلىم مەن بىلىمگە دەپ بولىنەتىن اقشا ەسەلەنىپ ارتىپ جاتىر دەيدى. ونىڭ قوماقتى بولىگىن مەكتەپ مۇعالىمدەرىنىڭ جالاقىسىن كوبەيتۋگە بۇرۋ قاجەت. سەبەبى، قازىرگى شەكتەۋلى وندىرىسكە عىلىم "پورتسيالى" تۇردە عانا قاجەت. سوندىقتان، ول سالاعا قارجىنى ديفەريانتسيالدى تۇردە ءبولىپ وتىرماسا، كوپ قارجى "عىلىم اتىن جامىلعان قاسقىرلاردىڭ" كوررۋپتسيالىق قۇلقىنىندا بوسقا تالان-تاراج بولادى. ال، نەگىزگى قارجىنى "فۋندامەنتالدى ءبىلىم پوتەنتسيالىنا", ياعني، مەكتەپتەگى بىلىمگە جۇمساعان ماڭىزدى. سەبەبى، ەرتەڭ ءوندىرىس دامىعاندا (دامىماي قايدا بارادى) - ونى عىلىممەن ۇشتاستىرىپ العا سۇيرەپ اكەتەتىن "كۇشتىڭ" عىلىمي پوتەنتسيالى مەكتەپتە جاتىر. سول ءۇشىن دە سولاي جاساۋ قاجەت. ۇستازدار قاۋىمىنىڭ بۇگىندەگى عبم-ءنىڭ قۇلاعىنا تاعار "التىن سىرعاسى" - وسى!

ءابدىراشيت باكىرۇلى

Abai.kz

0 پىكىر