پاۆلودار. 27 قىرقۇيەك. قازتاگ – پاۆلودار وبلىسى بويىنشا ەكونوميكالىق قىلمىسپەن جانە سىبايلاس جەمقورلىقپەن كۇرەس دەپارتامەنتى (ەقسجكد) اسا ءىرى كولەمدە بيۋدجەت قارجىسىن جىمقىرعانى ءۇشىن وبلىستىڭ قازىناشىلىق دەپارتامەنتىنىڭ قىزمەتكەرلەرىن قاماۋعا الدى جانە ەكىباستۇز قالاسىنىڭ الەۋمەتتىك باعدارلامالار جانە حالىقتى جۇمىسپەن قامتۋ ءبولىمىنىڭ باستىعىن پارا الدى دەگەن كۇدىكپەن ۇستادى، دەپ حابارلايدى وبلىستىق ەكسجكد ءباسپاسوز قىزمەتى.

«تەرگەۋ بارىسىندا اقشا جىمقىرۋ ماقساتىمەن اتالعان مەكەمەدە جۇمىس ىستەمەگەن ادامدار - ءوز تۋىستارىنىڭ بانك كارتوچكالارىنا جالاقى سالىنعانى انىقتالدى. جىمقىرۋ مەكەمە قىزمەتكەرلەرىنىڭ جالاقى قورىن، سالىق، زەينەتاقى جانە ت.ب. سالىمدارىن ۇنەمدەۋ ەسەبىنەن جۇزەگە اسىرىلعان. 2001 جىلدىڭ 1 قاڭتارىنان 2010 جىلدىڭ 1 اقپانىنا دەيىنگى كەزەڭدە 262 ملن تەڭگە كولەمىندە اقشا جىمقىرىلعان»، -دەلىنگەن دەپارتامەنتتىڭ ءباسپاسوز حابارلاماسىندا.

قازىر كۇدىكتىلەردىڭ ەكەۋىنەن ەشقايدا كەتپەۋ تۋرالى قولحات الىندى، ءبولىم باستىعى بولعان ايەل سوت سانكتسياسىمەن قاماۋعا الىندى.

«سونداي-اق، ەكىباستۇز قالاسىندا جشس باسشىسىنان مەملەكەتتىك ساتىپ الۋلار بويىنشا تەندەردە جەڭىسكە جەتۋ مۇمكىندىگىن بەرۋ ءۇشىن 220 مىڭ تەڭگە پارا الدى دەگەن كۇدىكپەن ەكىباستۇز اكىمدىگىنىڭ الەۋمەتتىك باعدارلامالار جانە حالىقتى جۇمىسپەن قامتۋ ءبولىمىنىڭ باستىعى جانە وسى مەكەمەنىڭ سەكتور مەڭگەرۋشىسى ۇستالدى. ءبولىم باستىعى قاماۋعا الىندى، تەرگەۋ جۇرگىزىلىپ جاتىر»، - دەپ حابارلايدى وبلىستىق قارجى پوليتسياسىنىڭ ءباسپاسوز قىزمەتى.