اكتريسا “جەلىدە” فيلمىندەگى كەيىپكەرى تۋرالى ايتىپ بەردى. مۇنىمەن قاتار، ادام بالاسىنىڭ وزىنە لايىق جانداردى جولىقتىراتىنىن تىلگە تيەك ەتتى. بۇل تۋرالى نتك ارناسىنىڭ “رەۆيۋ” باعدارلاماسىندا ايتىلدى.

دينارا باقتىباەۆا جۋىردا كورەرمەنگە جول تارتاتىن “جەلىدە” فيلمىندە باستى رولدەردىڭ ءبىرىن سومدادى. ول اتالعان تۋىندىدا جاعىمسىز كەيىپكەردىڭ ءرولىن وينادى. دەسە دە، اكتريسا شىنايى ومىردە بۇل كەيىپكەرمەن ەش بايلانىسىنىڭ جوق ەكەنىن ايتىپ جاتىر.

- دينارا، سەن ادالدىقتى اسا ءپىر تۇتپايتىن كەيىپكەردىڭ ءرولىن سومداپ كوردىڭ. “جەلىدە” فيلمىندە سەنىڭ كەيىپكەرىڭ ءوزىنىڭ قۇربىسىنىڭ جىگىتىمەن توسەكتەس بولادى. مۇنىمەن قاتار، ءوزىنىڭ دە جىگىت بار ەدى.

– پسيحواناليتيك  فرەيد ايتپاقشى، مەنىڭ كەيىپكەرىمنىڭ بويىندا بالا كۇنىنەن كەلە جاتقان كومپلەكستەرى بولدى. ياعني ءومىر ونى ءدال وسىنداي جامان ادام بولۋعا ۇيرەتتى. كەز كەلگەن ارەكەتتى تۇسىندىرۋگە بولادى.

– مەنىڭشە، سەنىڭ كەيىپكەرىڭ ويدان شىعارىلماعان. بۇگىنگى تاڭدا ار-ۇيات ماسەلەسى كومەسكىلەنىپ قالعان سىڭايلى. سەن قالاي ويلايسىڭ؟

– ءيا، مەن كەلىسەمىن. قازىرگى زامان قىزدارىندا بەلگىلى ءبىر كومپلەكستەر بار سىڭايلى. ونىڭ ۇستىنە بەلگىلى ءبىر سۇلۋلىق ستاندارتتارى، ءمىنسىز قىزدار سىندى ۇعىمدار بار. ءار ادام ءدال وسىنداي بولعىسى كەلەدى. “مەن بۇدان دا جاقسىعا لايىقپىن” دەپ ءوزىنىڭ سۇيىكتىسىن كەلەسى ءبىر اداممەن سالىستىرا باستايدى.

– مۇنداي جاعداي سەنىڭ باسىڭنان وتكەن بە؟

– مۇنىڭىز جىمىسقى سۇراق بولدى. (كۇلدى.) جوق، مۇنداي جاعدايعا تاپ بولعان ەمەسپىن. مەنى قورشاعان ورتادا ءدال وسىنداي ادامداردىڭ جوق بولعانى ءۇشىن جاراتقانعا شۇكىرشىلىك ەتەمىن. بىراق شىنايى ومىردە بولعان وقيعالاردى كوپ ەستىدىم.

– بۇعان جىگىتتەردىڭ دە بەلگىلى ءبىر ۇلەسى بار ەكەنىن مويىنداۋىمىز كەرەك ەمەس پە؟ ولار قىز-كەلىنشەكتەردى اسا باعالامايتىن بولىپ كەتتى. بالكىم بۇعان ءبىزدىڭ “تاۋەلسىزبىز، مىقتىمىز” دەپ كەۋدە قاققانىمىز سەبەپ بولعان شىعار؟

– مەنىڭشە، وسىندايدا “اپاما جەزدەم ساي” دەگەن ماتەل ورىندى ايتىلعان. جان-دۇنيەڭ قانداي بولسا، سوعان لايىق ادامدارمەن جولىعاسىڭ. تاربيەلى، ادال ادام بولۋعا تىرىسساڭ، سەنىڭ دە سەرىگىڭ ءدال وسىنداي ادام بولارى انىق.

 سايتقا ازىرلەگەن نۇرسۇلۋ نايمانوۆا.

Abai.kz