جاس قازاقستاندىق ءانشى ديماش قۇدايبەرگەن قر مادەنيەت جانە سپورت مينيسترلىگىنىڭ قولداۋىمەن قىتايدىڭ حۋنان پروۆينتسياسىندا ءوتىپ جاتقان «I am a singer» تەلەۆيزيالىق مۋزىكالىق-ۆوكالدىق كونكۋرسىندا ونەر كورسەتىپ جۇرگەنىن ءبارى بىلەدى.

22 جاستاعى ءانشى فرانتسۋز تىلىندە گرەگوري لەمارشتىڭ SOS d'un terrien en détresse» كومپوزيتسياسىن ورىنداپ، ءبىرىنشى كەزەڭنىڭ جەڭىمپازى اتاندى.       

- وسىنداي اۋقىمدى حالىقارالىق جوباعا مەنىڭ ۇلىمنىڭ قاتىسۋىنا قولداۋ كورسەتكەن قر مادەنيەت جانە سپورت مينيسترلىگىنە العىس سەزىمىمىم زور. سونداي-اق وسى يگىلىكتى ىسكە تىكەلەي جاناشىرلىق تانىتىپ، ونىڭ تەلەۆيزيالىق نۇسقاداعى كونكۋرسىنىڭ ەكىنشى تۋرىنان ءوتىپ، ءۇشىنشى تۋرعا داڭعىل جول اشۋعا ۇيىتقى بولىپ جۇرگەن مينيستر ارىستانبەك مۇحامەديۇلىنا ەرەكشە ىقىلاسىمدى بىلدىرگىم كەلەدى. ديماشتىڭ ءۇشىنشى تۋرداعى جەڭىسى – بۇل ەندى بارلىعىمىزعا ۇلكەن جەتىستىك بولار ەدى! الدا 14 كەزەڭ بار، بىزگە تابىس تىلەپ، قولداۋ كورسەتىپ جاتقان بارلىق جاناشىرعا العىس ايتامىز، - دەپ اعىنان جارىلادى ءانشىنىڭ اكەسى قانات ايتباەۆ.  

ديماش قۇدايبەرگەن - كونكۋرسقا قاتىسۋشىلاردىڭ ىشىندەگى ەڭ جاسى. ەرەكشە داۋىسقا يە قازاقستاندىق ءانشى ونەردى مەيلىنشى قادىرلەي بىلەتىن  قىتايلىق كورەرمەندى بىردەن-اق باۋراپ الدى.   

اكەسى قانات ايتباەۆتىڭ ايتۋىنشا، كوپتەگەن جەرگىلىكتى باسىلىمدار ديماش تۋرالى كەسەك-كەسەك جاعىمدى ماقالالار جاريالاپ ۇلگەرگەن. ال قىتايلىق جانكۇيەرلەر الەۋمەتتىك جەلىلەردە «قىتايدى تامساندىرعان قازاق» دەگەن تاقىرىپتا ماقالالار جازىپ، تەلەحابارلار تاراتىپ جاتىر ەكەن.

مۇنداي جوبانىڭ ماقساتى مەملەكەتتەر مادەنيەتىن بىرىكتىرۋ مەن الەمدىك قاۋىمداستىق قۇرۋ  بولىپ تابىلادى. وسى كونكۋرس اياسىندا كوپتەگەن كورمەلەر، تەاترلىق قويىلىمدار، ەسترادالىق مۋزىكا ورىنداۋشىلارىنىڭ حالىقارالىق كونكۋرسى وتكىزىلەدى.  

تەلەۆيزيالىق كونكۋرس ەرەجەسىنە سايكەس، ءبىرىنشى ىرىكتەۋ تۋرىنا ديماش قۇدايبەرگەن ۆيدەو نۇسقاسىن جىبەرىپ، ەكىنشى تۋرعا وتكەن. ول التى ءان، اعىلشىن تىلىندە ءۇش، الەمنىڭ باسقا تىلدەرىندە ءۇش ءان ورىنداپ ىرىكتەۋ تۋرىنان ءوتتى. ءۇشىنشى ىرىكتەۋ تۋرىن قىتاي تەلەارنالارى ىشىندە رەيتينگىسى جوعارى - Hunan TV تەلەارناسى ءتۇسىردى.    

Abai.kz