بەيسەنبى, 6 قازان 2022
جاڭالىقتار 2583 0 پىكىر 25 قاڭتار, 2017 ساعات 20:24

ۋنيۆەرسيادا الاۋىنىڭ ەستافەتاسى قاراعاندى وبلىسىندا جالعاسادى

استانادان كەيىن ۋنيۆەرسيادا الاۋىن ءبىرىنشى بولىپ تۇتاتىن وبلىستاردىڭ ءبىرى قاراعاندى وبلىسى بولماق. الاۋ تەمىرتاۋ قالاسىندا 26 قاڭتاردا تۇتاتىلادى.

ەستافەتا ەكى باعىتقا ءبولىنىپ وتكىزىلەدى

ساعات 10:00-دە مەتاللۋرگيا كومبيناتىنىڭ اۋماعىندا الاۋدى تۇتاتۋ سالتاناتى وتكىزىلىپ، تەمىرتاۋ قالاسىنداعى قاراعاندى مەملەكەتتىك يندۋستريالىق ۋنيۆەرسيتەتى اۋماعىندا توستاعان جاعىلادى. ءوڭىردىڭ جاس ماماندارى قىزمەت جاسايتىن مەتاللۋرگيا كومبيناتى دومناسىنان جانە شاحتالار كومىرىنەن الىنعان وت قالا توستاعانىندا بىرىكتىرىلەدى. ەكىنشى كەزەڭ ساعات 16:00-دە رەسپۋبليكا سارايىندا باستالىپ، «قاراعاندى-ارەنا» مۇز سارايىندا مارەسىنە جەتەدى. قاراعاندى وبلىسى بويىنشا وتەتىن جول باعىتىنىڭ جالپى ۇزىندىعى 12 شاقىرىمدى قۇراماق.

بوكستان حالىقارالىق دارەجەدەگى سپورت شەبەرى، 2013 جىلعى قازاقستان جانە ازيا چەمپيونى، 2013 جىلعى جاسوسپىرىمدەر اراسىنداعى الەم چەمپيونى ابىلايحان ءجۇسىپوۆ الاۋ كوتەرۋشىلەردىڭ ءبىرى بولىپ تاڭدالدى. سپورتشى جىگىت 2014 جىلعى جاسوسپىرىمدەر اراسىنداعى وليمپيادا جەڭىمپازى بودى. ريو-دە-جانەيروداعى وليمپيادا ويىندارىنا قاتىستى.

ا. ءجۇسىپوۆ ۋنيۆەرسيادا ەلىمىز ءۇشىن اسا ايتۋلى وقيعا بولعاندىقتان، وتانداستارىمىزعا جانكۇيەر بولۋ ءۇشىن ۋنيۆەرسياداعا مىندەتتى تۇردە بارامىن دەپ وتىر. ء«بىزدىڭ ءاربىر سپورتشىمىز مەدال جەڭىپ الا الادى دەپ ويلايمىن. كوپتەگەن قازاقستاندىقتار سەكىلدى مەن دە جارىستارعا بارىپ، ويىنشىلاردى قولداپ، جانكۇيەرلەر قاتارىنان تابىلامىن. ساتتىلىك ارقاشان ولارعا سەرىكتەس بولسىن دەپ تىلەيمىن»، - دەدى ول.

ابىلايحان ءجۇسىپوۆ قاراعاندى وبلىسى اتىنان ەستافەتاعا قاتىساتىن باستى الاۋ كوتەرۋشى رەتىندە الماتىعا ۋنيۆەرسيادا الاۋىن جەتكىزەتىن بولادى. ەستەرىڭىزگە سالىپ وتەيىك، 29 قاڭتاردا «الماتى ارەنا» مۇز سارايىنىڭ ساحناسىنا 16 الاۋ كوتەرۋشى الاۋدى ءبىر ۋاقىتتا توستاعانعا كوتەرىپ الىپ بارادى. كونسترۋكتسيانىڭ ءاربىر كۇلتەسىنە الاۋدى تيگىزگەن سوڭ، توستاعانداعى وت جاعىلادى.

اباي-اقپارات

0 پىكىر