قازاقستاندا ۇكىمەتتى جاساقتاۋدا پارلامەنتتىڭ ءرولى كۇشەيتىلەدى. بۇل تۋرالى بۇگىن وتاندىق تەلەارنالار ارقىلى قازاقستان حالقىنا ۇندەۋ جولداعان ەلباسى نۇرسۇلتان نازارباەۆ ءمالىم ەتتى، دەپ حابارلايدى قازاقپارات.

«قازىر زاماننىڭ ديدارى وزگەردى. ءبىز دە وزگەرۋگە ءتيىسپىز. سول سەبەپتى مەملەكەتتىڭ باسقارۋ جۇيەسىن دە جاڭعىرتاتىن كەز  كەلدى. مەن ەلدىڭ مۇددەسى مەن زاماننىڭ تالابىن، ۇرپاقتىڭ بولاشاعى ويلاي وتىرىپ وسىنداي بايلام جاسادىم.  ارنايى قۇرىلعان جۇمىس توبى اتقارىلعان ىستەردى باياندادى. رەفورما ەكى نەگىزگى باعىت بويىنشا ىسكە اسادى. بىرىنشىدەن،  پرەزيدەنتتىڭ  الەۋمەتتىك-ەكونوميكالىق پروتسەستەردى رەتتەۋدەگى ءبىرشاما وكىلەتتەرىن ۇكىمەتكە جانە باسقا دا اتقارۋشى ورگاندارعا بەرگەن ءجون دەپ سانادىم»، - دەدى قر پرەزيدەنتى.

مەملەكەت باسشىسىنىڭ ايتۋىنشا، اتالعان سالاعا ۇكىمەت، مينيسترلىكتەر جانە اكىمدىكتەر تولىقتاي جاۋاپ بەرەتىن بولادى. وكىلەتتىكتەردى بەرۋ ءتيىستى زاڭداردى وزگەرتۋ ارقىلى ىسكە اسادى. بۇل وزگەرىستەردى ۇكىمەت قازىرگى كەزدە پارلامەنتتىڭ سەسسسياسىنىڭ اياعىنا دەيىن ەنگىزۋى ءتيىس.

«ەكىنشىدەن، ودان دا كۇردەلى مىندەت بيلىك تارماقتارى اراسىنداعى قارىم-قاتىناستاردى كونستيتۋتسيالىق دەڭگەيدە تەڭگەرىمدى ەتۋ. وسى رەفورمانىڭ اياسىندا ۇكىمەتتى جاساقتاۋداعى پارلامەنتتىڭ ءرولىن كۇشەيتەمىز. پارلامەنت سايلاۋىندا جەڭگەن پارتيا ۇكىمەت قۇرامىن انىقتاۋدا تۇبەگەيلى ىقپال ەتەتىن بولادى. بۇل مينيسترلەر كابينەتىنىڭ وكىلەتتى بيلىك الدىنداعى جاۋاپكەرشىلىگىن ارتتىرادى. تيىسىنشە بيلىكتىڭ زاڭ شىعارۋشى تارماعىنىڭ اتقارۋشى بيلىككە باقىلاۋىن كۇشەيتەتىن بولادى. ايتىلعان وسى ەكى باعىتتىڭ قاي-قايسىسىنا دا جاۋاپكەرشىلىك پەن كاسىبيلىكتى ارتتىرۋ ارقىلى  مەملەكەتتىك باسقارۋدىڭ تيىمدىلىگىن كۇشەيتەدى. جۇمىس توبى بارلىق سۇراقتاردى جان-جاقتى زەرتتەپ  قوعامدىق تالقىلاعا شىعارۋ ءۇشىن  ۇسىنىستار جيىنتىعىن ازىرلەۋى قاجەت»، - دەدى نازارباەۆ.  

Abai.kz