سەنبى, 16 قازان 2021
دەپ جاتىر 3004 0 پىكىر 28 قاڭتار, 2017 ساعات 20:41

قىتايلىقتار ساپارباەۆتان كومپانيالارىنىڭ جابىلىپ قالماۋىن سۇرادى.

قىتايدان كەلگەن 3-ءشى دəرەجەلى قىزمەتكەرلەرىن ۇستاپ، قازاقستاندىق جۇمىسشىلاردى قىسقارتقان چجان تسزيۋن جاۋاپ بەرە الماي ساستى. بۇگىن اقتوبە وبلىسىنىڭ əكىمى بەردىبەك ساپارباەۆ "ۇلى قابىرعا" مۇناي كومپانياسىنىڭ باس ديرەكتورى چجان تسزيۋن جاساعان جۇمىس ەسەبىن تىڭداۋعا باردى. وتكەن جىلى قۇردىمعا كەتكەلى تۇرعاندىعى ايتىلعان كومپانيا تاعى  ءبىر جىل  ىشىندە ەشتەڭە جاساماعان بولىپ شىقتى.

 Əكىم ەش جۇمىس جاساماي، قىزمەتكەرلەرىن قاڭعىتىپ جىبەرگەن كومپانيا باسشىسىن سىنعا الدى.

"جۇمىستى جاقسارتۋ، جۇمىسشىلار جالاقىسىن كوتەرۋگە قاتىستى كەلىسىمشارتقا وتىردىق. كەلىسىمدەگى 10 ءبولىمنىڭ 6-ۋى ورىندالماعان. كومپانيا باسشىسىنا بىرنەشە رەت ەسكەرتۋ جاسالىندى. وتكەن جىلعى شىعىن 1 ميللياردتان اسقان. شىعىنداردى تالداۋ كەرەك. كەلىسىم-شارتتى ورىنداماسا،  وندا موينىنا نەگە الادى؟ ءۇش جاقتى كەلىسىمنىڭ 60 پايىزى ورىندالماعان. بىزدە "داعدارىس" دەگەن جاقسى سىلتاۋ بار. داعدارىس تەك سىزدەرگە كەلدى مە؟ قالعان مەكەمەلەر جولىن تاۋىپ جاتىر. بۇرعىلاۋ جۇمىسىنا قاراپ وتىرۋعا بولمايدى.

ەگەر بۇل كومپانيا وسىنداي قيىندىقتار تۋعىزاتىن بولسا، بىزگە كەرەك ەمەس. اقتوبە بۇل كومپانياسىز قۇلاپ قالمايدى. ەكونوميكالىق جاعدايىن جاقسارتپاسا، جابۋ كەرەك. ءبىز جىلدا وسى كومپانيادان قىسقارعان ادامداردى جۇمىسپەن قامتاماسىز ەتىپ وتىرمىز. كومپانيا جۇمىسشى جاعدايىن جاقسارتپاسا، بىزگە كەرەك ەمەس", - دەدى وبلىس əكىمى.

 

 وبلىس əكىمى ناقتى سۇراقتارعا جاۋاپ بەرە الماي ساسقالاقتاپ، كۇمىلجىپ قالعان قىتاي كومپانياسىنىڭ باسشىسىنا ەسكەرتۋ جاسادى. كومپانيادا جۇمىسشىلاردى قىسقارتۋ ەكى ەسەگە ازايعان. مىڭداعان قازاقستاندىق مۇنايشىلار قىسقارتۋعا ۇشىراپ جاتقاندا، كومپانيادا ءۇشىنشى دəرەجەلى قىتايلار ءəلى جۇمىس جاساپ جۇرگەن بولىپ شىقتى.

"قازاقستاندىق جۇمىسشىلار قىسقارتىلىپ جاتقاندا، نەگە شەتەلدەن ءۇشىنشى، ءتورتىنشى دəرەجەلى جۇمىسشىلار əكەلىنەدى؟ مۇنى قويۋ كەرەك.  ەگەر اقتوبەدە جۇمىس جاساعىلارىڭ كەلسە، جۇمىسشىلاردى قىسقارتۋدى قويىڭىزدار", - دەدى وبلىس باسشىسى. 

 

سايتقا ازىرلەگەن نۇرcۇلۋ نايمانوۆا.

Abai.kz

0 پىكىر