عىلىمدا ادامداردى سولاقاي جانە وڭقاي دەپ بولۋگە قاتىستى كوپتەگەن بولجامدار مەن جورامالدار بار. كوبىنە عالىمدار ادامنىڭ بۇل قابىلەتىن مي قىرتىسىنىڭ قىزمەتىنە بايلانىستى دەگەن تۇجىرىمدا بولدى. جاقىندا رۋر ۋنيۆەرسيتەتىنىڭ زەرتتەۋشىلەرى ەرەكشە زەرتتەۋلەرىنىڭ قورىتىندىسىن جاريالاپ، ءوز تۇجىرىمدارىن ۇسىندى.

ەرتەدە سولاقايلاردى ادام رەتىندە باعالاماي، ولارعا كۇن كورسەتپەي، اۋىر جازالايتىن بولعان. قيمىلعا بەلسەندى سول قولدارىن كۇيدىرىپ، ءتۇرلى قۇرالدارمەن جارالاپ، دەنەلەرىنە قىسىپ بايلاپ تاستاعان. كەيدە سول قولدارىنا ارنايى قاپتى كيىپ جۇرۋگە دە ماجبۇرلەگەن. كەيىننەن بارىپ بۇل تۇسىنىك جويىلعان. عالىمدار ادامداردىڭ وڭقاي نەمەسە سولاقاي بولۋىنىڭ سىرىن تابۋعا ۇزاق ۋاقىت تالپىندى. بالانىڭ بۇلاي تۋىلۋىنىڭ جۇمباعىن اشۋعا تىرىستى. ناتيجەسىندە كوپشىلىگى ادامنىڭ وڭقاي نەمەسە سولاقاي بولۋىنا مي قىرتىسىنىڭ قىزمەتى اسەر ەتەدى دەگەن قورىتىندىعا كەلدى. الايدا رۋر ۋنيۆەرسيتەتىنىڭ عالىمدارى بۇل قورىتىندىنى جوققا شىعارىپ وتىر. بالانىڭ وڭقاي نەمەسە سولاقاي بولۋى اناسىنىڭ 13 اپتالىق جۇكتىلىك كەزىندە انىقتالادى ەكەن. ول كەزدە بالا ساۋساعىن سوراتىنداي جەتىلۋ دارەجەسىندە بولادى. ناتيجەسىندە وڭ قولىنىڭ ساۋساعىن سوراتىن بولسا وڭقاي، سول قولىنىڭ ساۋساعىن سوراتىن بولسا سولاقاي بولاتىن كورىنەدى. ال وڭقاي نەمەسە سولاقاي بولۋىنا مي ەمەس، ومىرتقا تىكەلەي بايلانىستى ەكەن. سەبەبى 13 اپتادا بالانىڭ ميى مەن ومىرتقاسى تىعىز بايلانىستا بولمايدى. سونداي-اق عالىمدار ادام ومىرتقاسىنىڭ وڭ جانە سول جاق بولىكتەرىنىڭ بىرىندە گەندىك اسەر ەتۋ جوعارى بولاتىنىن العا تارتىپ وتىر. وسى گەندىك اسەر ەتۋ نەگىزىندە ادام وڭقاي نەمەسە سولاقاي بولادى ەكەن.

نۇرسۇلۋ نايمانوۆا

Abai.kz