"مەنىڭ پىكىرىمشە، يسلام كارىموۆتىڭ ەسىمىن ۇلىقتاۋ تۋرالى قۇجات اسىعىس قابىلدانعان", - دەپ جازدى 77 جاستاعى اقىن. كارىموۆتىڭ ەسىمى بەرىلەتىن نىساندار سانى وتە كوپ - "مۇراجايلار، ساياباقتار، جوعارعى وقۋ ورىندارى، ەسكەرتكىشتەر، ۇيىمدار مەن كوشەلەر".

"وسى ورىندى ما؟ ونىڭ ەسىمىن تاشكەنت حالىقارالىق اۋەجايىنا بەرۋ - ارتىق كەتكەندىك بولار", - دەدى ول Eltuz.com سايتىنا.

وزبەكستان پرەزيدەنتى شاۆكات ميرزياەۆ 25 قاڭتاردا رەسپۋبليكانىڭ العاشقى پرەزيدەنتى يسلام كارىموۆتىڭ ەسىمىن ۇلىقتاۋ تۋرالى جارلىققا قول قويدى. قۇجات بويىنشا، ەلدەگى بىرقاتار نىسان مەن مەكەمەگە سونىڭ اتى بەرىلەدى. ولاردىڭ اراسىندا تاشكەنت تەحنيكالىق ۋنيۆەرسيتەتى، اساكتاعى اۆتوموبيل زاۋىتى، فەرعاناداعى ونەر سارايى، تاشكەنتتەگى حالىقارالىق اۋەجاي بار.

ونىڭ ۇستىنە، پرەزيدەنت جارلىعىنا سايكەس، وزبەكستاندا جىل سايىن كارىموۆتىڭ تۋعان كۇنى (30 قاڭتار) اتاپ وتىلەدى، ال 2 قىركۇيەك - ءبىرىنشى پرەزيدەنتتى ەسكە الۋ كۇنى دەپ جاريالاندى.

وزبەكستاندى 26 جىل بيلەگەن يسلام كارىموۆ 2016 جىلى 2 قىركۇيەكتە 78 جاسىندا قايتىس بولدى.

اباي-اقپارات