استانا اكىمى اسەت يسەكەشەۆ جاستاردى ەگدە ادامداردىڭ ۇيلەرىن جيناسۋدا جاردەمدەسۋگە شاقىردى، - دەپ حابارلايدى Tengrinews.kz قالالىق ىشكى ساياسات باسقارماسىنا سىلتەمە جاساپ. 

"نۇر وتان" پارتياسىنىڭ ەلوردالىق فيليالىنىڭ ەسەپتىك-سايلاۋ كونفەرەنتسياسى بارىسىندا استانا اكىمى 1 جانە 31 جەلتوقسان ارالىعىندا "مەيىرىمدى قالا" اكتسياسى وتكىزىلەتىنىن ءمالىم ەتتى.

"جىل سايىن ەلباسى ءوز جولداۋىندا الەۋمەتتىك ساياساتتى ىسكە اسىرۋ ساپاسىن ەرەكشە باقىلاۋدا ۇستاۋدى تاپسىرادى. ارينە، مەملەكەت ءوزىنىڭ بارلىق الەۋمەتتىك مىندەتتەرىن ورىندايدى. 2016 جىلى قالا اكىمدىگىمەن 130 مىڭنان اسا ادام الەۋمەتتىك قولداۋمەن قامتىلدى. اتاپ ايتقاندا، مۇگەدەكتەر مەن زەينەتكەرلەرگە مەديتسينالىق كومەك كورسەتۋ، دارىلىك زاتتارمەن قامتاماسىز ەتۋ، تەگىن جانە جەڭىلدىكتى ساناتوريالىق-كۋرورتتىق ەمدەۋ جانە تاعى باسقا جاردەم تۇرلەرى.

سونىمەن قاتار، تاۋەلسىزدىكتىڭ 25 جىلدىعىنا وراي قازىرگى الەۋمەتتىك باعدارلامالارعا قوسىمشا "مەيىرىمدى قالا" قايىرىمدىلىق اكتسياسى قولعا الىندى. وسى باستاما اياسىندا اكىمدىك قىزمەتكەرلەرى مەن ۆەدومستۆوعا قاراستى ۇيىمدار بۇل اكتسياعا ءبىرىنشى بولىپ قاتىسادى. بۇل باستامانى بيزنەس-قوعامداستىق تا قولدايدى دەپ ۇمىتتەنەمىن", - دەدى استانا اكىمى.

اكتسيانىڭ ماقساتى جالعىز تۇرىپ جاتقان زەينەتكەرلەر، ۇوس ارداگەرلەرى، بارلىق توپتاعى مۇگەدەكتەر، مۇگەدەك بالالار، تۇرمىسى تومەن وتباسىلار، كوپ بالالى وتباسىلار، جەتىم بالالار، ونكولوگيالىق اۋرۋعا شالدىققان بالالار، دتسپ-عا شالدىققان بالالار جانە تۋبەركۋلەزبەن اۋىراتىن بالالار سياقتى ازاماتتاردىڭ جەڭىلدىكتى ساناتتارىنا كوڭىل اۋدارۋ جانە قامقورلىق كورسەتۋ.

كومەك ازاماتتاردىڭ ءتۇرلى باعىتتار بويىنشا، ياعني كيىم، ازىق-تۇلىك الۋ، جەڭىلدىكتى ءدارى-دارمەكتەر الۋ ءۇشىن دارىحاناعا ارنالعان سەرتيفيكاتتار، قاتتى وتىن جانە باسقا دا تۇرىندە كورسەتىلەدى.

"قوعامدا اعا بۋىنعا دەگەن قۇرمەت پەن ىنتىماقتاستىق سەزىمىن كۇشەيتۋ ماقساتىندا جاستاردى - جاسوتاندىقتاردى، وقۋ ورىندارىنداعى جاستار ىستەرى جونىندەگى كوميتەتتەردى جانە باسقا دا جاستار ۇيىمدارىن اكتسياعا اتسالىسۋعا شاقىرامىن. قارتتارعا قامقورلىق كورسەتۋىمىز كەرەك.

جالعىز تۇراتىن زەينەتكەرلەردىڭ ءۇيىنىڭ اۋلاسىنداعى قاردى تازالاۋ مەن پاتەرلەرىن جيناۋعا، ازىق-تۇلىك ساتىپ الۋعا كومەك كورسەتسەڭىزدەر – بۇل وسكەلەڭ ۇرپاققا جاقسى ۇلگى بولادى دەپ ويلايمىن", -دەپ اتاپ ءوتتى اسەت يسەكەشەۆ.

وزەكتىلىگى مەن ماڭىزدىلىعىن ەسكەرە كەلە، وسىنداي اكتسيالاردى الداعى ۋاقىتتا تۇراقتى تۇردە وتكىزۋ جوسپارلانعان. 

Abai.kz