وڭتۇستىك قازاقستان وبلىسىنىڭ اكىمى جانسەيىت تۇيمەباەۆ تۇركيا رەسپۋبليكاسى ۇكىمەتى جانىنداعى تۇرىك ىنتىماقتاستىق جانە ۇيلەستىرۋ اگەنتتىگىنىڭ (ودان ءارى - TIKA) قازاقستانداعى وكىلى ءالي يحسان چاگلارمەن كەزدەستى.

باسقوسۋدا تاراپتار باۋىرلاس قازاق-تۇرىك قارىم-قاتىناسىن ودان ءارى جاقسارتۋ جايىن تالقىلاپ، الداعى كۇندەرى قولعا الىناتىن ناقتى جوسپارلى جۇمىستارعا كوشتى.

اتاپ ايتقاندا، تاياۋدا TIKA ۇيىمىنىڭ ۇيىمداستىرۋىمەن وڭتۇستىك قازاقستان وبلىسىنداعى مەديتسينا ماماندارى ارنايى وقىتۋ كۋرسىنان ءوتىپ، بىلىكتىلىگىن جەتىلدىرمەك. شىمكەنتتە وسى جىلدىڭ 2-5 جەلتوقسان كۇندەرى وتەتىن تاجىريبە الماسۋ سەمينارىنا 75 دارىگەر قاتىسىپ، وندا انا مەن بالا دەنساۋلىعىن ساقتاۋ، ونىڭ ىشىندە، انا مەن بالا ءولىمىن ازايتۋ تاقىرىبىندا ءدارىس الماقشى. ال تاجىريبە الماسۋ كۋرسىندا بەلسەندىلىك تانىتقان دارىگەرلەر تۇركياعا جىبەرىلىپ، ول ماماندار ەلگە كەلگەن سوڭ وزگە دە ارىپتەستەرىنىڭ ءبىلىمىن شىڭداۋعا اتسالىساتىن بولادى.

كەزدەسۋ بارىسىندا، ايماق باسشىسى وڭىرىمىزگە ارنايى كەلگەن مارتەبەلى مەيمانعا العىسىن ءبىلدىرىپ، اتالعان جوبا اياسىندا جان-جاقتى قولداۋ كورسەتۋگە دايىن ەكەنىن جەتكىزدى.

قازاقستان تاۋەلسىزدىگىنىڭ 25 جىلدىق مەرەيتويىنا ورتاقتاسىپ، قۋانىشىمەن بولىسۋدە وسىنداي جۇمىستاردى ۇيىمداستىرۋدى كوزدەگەن اتالعان ۇيىمنىڭ قازاقستانداعى وكىلى ءالي يحسان چاگلار بۇل جوبانىڭ بۇعان دەيىن وزگە دە مەملەكەتتەردە ۇيىمداستىرىلىپ، وڭ ناتيجە كورسەتكەنىن ايتتى.

ايتا كەتۋ كەرەك، تۇركيا رەسپۋبليكاسى ۇكىمەتى جانىنداعى تۇرىك ىنتىماقتاستىق جانە ۇيلەستىرۋ اگەنتتىگىنىڭ الەمنىڭ 56 ەلىندە فيليالدارى بار. جەر-جاھاننىڭ 150 ەلىمەن ىنتىماقتىق جوبالارىن جاساسقان TIKA ۇيىمى سوڭعى 3 جىلدا ىنتىماقتاستىق جۇمىستارى مەن گۋمانيتارلىق كومەكتەردىڭ ارقاسىندا الەمدە ءبىرىنشى ورىنعا شىققان. دەنساۋلىق ساقتاۋ سالاسىنداعى اتالعان جوبا ۇيىمنىڭ قىرۋار جۇمىستارىنىڭ ءبىر عانا بولىگى بولىپ تابىلادى.

Abai.kz