سارسەنبى, 21 قازان 2020
COVID-19 قازاقستاندا. جۇقتىرعاندار — 109766. جازىلعاندار — 105301. قايتىس بولعاندار — 1796
جاڭالىقتار 3398 0 پىكىر 30 قاراشا, 2016 ساعات 12:37

قازاقستان مەن وزبەكستان اراسىندا جەڭىل اۆتوكولىكتەردى وتكىزۋ ماسەلەسى شەشىلدى

كەشە وڭتۇستىك قازاقستان وبلىسىنىڭ اكىمى جانسەيىت تۇيمەباەۆ جۇمىس ساپارىمەن سارىاعاش اۋدانىندا بولىپ، بىرقاتار شارۋا قوجالىقتار مەن الەۋمەتتىك نىسانداردىڭ جۇمىسىمەن تانىستى.

ەڭ الدىمەن، ءوڭىر باسشىسى اقجار اۋىلدىق وكرۋگىندە ورنالاسقان «اگروفۋد-قازاقستان» جشس-ءنىڭ باۋ-باقشا القابىن كورىپ، العاشقى كوشەتتى وتىرعىزدى.بيىلعى جىلى 280 گەكتار جەرگە جاڭا تەحنولوگيامەن قارقىندى باۋ ءوسىرۋدى قولعا العان سەرىكتەستىك كەلەر جىلى ءونىم الۋدى جوسپارلاپ وتىر. جوبانىڭ  ينۆەستيتسيا كولەمىنىڭ جالپى قۇنى 3 ملرد. 400 ملن. تەڭگە.

سەرىكتەستىك  باسشىسىنىڭ ايتۋىنشا، ءبىرىنشى جىلى گەكتارىنا 10 توننا ءونىم الۋ كوزدەلىپ، 4 جىلدان كەيىن 1 گەكتارىنا 40-50 ءتوننا  ونىم جيناۋ جوسپارلانىپ وتىر. سونىمەن قاتار، كاسىپكەر الداعى جىلدارى وسىرىلگەن جەمىستەردى ساقتايتىن توڭازىتقىش قويما سالۋدى جانە ونىمدەردى قايتا وڭدەۋ جۇمىستارىن قولعا الماق. تامشىلاتىپ سۋارۋ ءادىسى قولدانىلاتىن باۋدا جەرگىلىكتى 200-گە تارتا ازامات جۇمىسپەن قامتىلاتىن بولادى.

مۇنان سوڭ، ايماق باسشىسى «جىبەك جولى» كەدەن بەكەتىنىڭ جۇمىسىمەن تانىستى. وندا اۋدان اكىمى ق.ابدۋاليەۆ اۋدانداعى بارلىق كەدەن بەكەتتەرى ماڭىندا جۇرگىزىلىپ جاتقان اباتتاندىرۋ جۇمىستارىن باياندادى. كۇنىنە 10-15 مىڭ جولاۋشى وتەتىن كەدەن بەكەتىندە كەلۋشىلەر ءۇشىن بارلىق جاعداي جاسالۋ قاجەتتىگىن ايتقان وبلىس اكىمى كورشى ەلمەن قارىم-قاتىناستىڭ ودان ءارى جاقسارىپ كەلە جاتقانىن اتاپ ءوتتى. سونداي-اق، ول «جىبەك جولى» كەدەن بەكەتى ارقىلى جەڭىل اۆتوكولىكتەر وتكىزۋ ماسەلەسى شەشىلگەنىن، الداعى ۋاقىتتا اۆتوبۋستار قاتىناسى دا شەشىمىن تاباتىنىن جەتكىزدى.

جۇمىس ساپارى بارىسىندا اكىم باستاعان جۇمىسشى توپ «جاباي اتا» شارۋا قوجالىعىنا قاراستى جىلىجاي جۇمىسىن كوردى. زاماناۋي وزىق تەحنولوگيالاردى پايدالانا وتىرىپ، تۇرعىنداردى ساپالى كوكونىسپەن قامتاماسىز ەتىپ وتىرعانىن ايتقان شارۋا قوجالىق يەسى جەرگىلىكتى 75 ازاماتتى جۇمىسپەن قامتىعان.

ونىڭ ايتۋىنشا، بۇگىندە مۇندا 450 مىڭ كوشەت وتىرعىزىلىپ، ونىڭ ءار ءتۇپ كوشەتىنەن 4-6 كەلىگە دەيىن ءونىم الىنۋدا. كولەمى 15 گەكتەر بولاتىن جىلىجايدا قىزاناق پەن قيار وسىرىلەدى. وندىرىلگەن جالپى ءونىم 2250 توننا، ال ونىمدەر قازاقستان نارىعى مەن  رەسەي فەدەراتسياسىنا جىبەرىلۋدە.

وسى كۇنى ج.تۇيمەباەۆ قازاقستان رەسپۋبليكاسى تاۋەلسىزدىگىنىڭ 25 جىلدىق مەرەكەسىنە وراي، پايدالانۋعا بەرىلگەن سىيىمدىلىعى  100 مىڭ تومعا دەيىن جەتەتىن ورتالىق كىتاپحانانىڭ اشىلۋ راسىمىنە قاتىستى. تۇرعىنداردىڭ قۋانىشىمەن بولىسە كەلگەن اكىم بارشا سارىاعاشتىقتاردى مەرەيلى مەرەكەمەن قۇتتىقتادى.

اتالعان مادەنيەت نىسانىندا وقىرماندار مەن قىزمەتكەرلەرگە بارلىق جاعداي جاسالعان. 7 مىڭعا جۋىق وقىرمانى بار كىتاپحانادا بۇگىندە 47 مىڭ كىتاپ قورى بار. جاڭا كىتاپحانا عيماراتى ەكى قاباتتى. ءۇش وقۋ زالى مەن كىتاپ قورىن ساقتايتىن 1 زال جانە قىزمەتكەرگە ارنالعان 7 بولمە بار. ايتا كەتەيىك، جالپى اۋدان بويىنشا كىتاپ قورى 632 مىڭ بولاتىن 57 كىتاپحانا حالىققا قىزمەت ەتۋدە.

سارىاعاش اۋدانىنا جاساعان ساپارىنىڭ سوڭىندا وبلىس اكىمى جەرگىلىكتى اكتيۆپەن كەزدەسىپ، اۋداننىڭ دامۋ باسىمدىقتارىن تالقىلادى. وندا اۋدان اكىمى ق.ابدۋاليەۆ سارىاعاشتىڭ الەۋمەتتىك-ەكونوميكالىق دامۋ كورسەتكىشتەرى بويىنشا اتقارىلعان جۇمىستاردى اتاپ ءوتىپ، حالىقتىڭ الەۋمەتتىك جاعدايىن كوتەرۋ ماقساتىنداعى جوبالارىمەن ءبولىستى.

جيىندا جانسەيىت قانسەيىتۇلى شەشىمىن تاپپاي وتىرعان ماسەلەلەردىڭ دە بار ەكەنىن اتاپ ءوتىپ، ونى اشىق ايتىپ، شەشۋ جولدارىن قاراستىرۋدى ەسكەرتتى. ماسەلەن، يندۋستريالاندىرۋ كارتاسى اياسىندا اۋداندا 1,7 ملرد.تەڭگەنى قۇرايتىن 5 ينۆەستيتسيالىق جوبا ىسكە قوسىلسا، ونىڭ ىشىندە«سارىاعاش قۇس» كاسىپورىنى توقتاپ قالعان. ال قۇرىلىس زاتتارىن شىعاراتىن «س-دەم» كاسىپورنى 50 پايىز قۋاتتىلىقپەن عانا جۇمىس ىستەپ تۇر.اۋدان اكىمدىگى تاراپىنان كاسىپورىندارعا مونيتورينگ جۇرگىزۋ جۇمىستارى ءوز دەڭگەيىندە اتقارىلماعانىن ايتقان ايماق باسشىسىبيىل اۋدانداعى ونەركاسىپ ءونىمىنىڭ كولەمى  9 پايىزعا، وندەۋ ونەركاسىبى 14 پايىزعا كەمىگەنىن اتاپ ءوتتى.

سونىمەن قاتار، اكىم ءبىلىم، دەنساۋلىق ساقتاۋ، قۇقىق بۇزۋشىلىق باعىتتارىندا دا ءتيىستى جۇمىستاردىڭ جۇرگىزىلمەگەندىگىنەن كورسەتكىشتەردىڭ تومەن ەكەنىن، وسى سالاداعى جۇمىستاردى بارىنشا جانداندىرۋ قاجەتتىگىن ەسكەرتتى. شيپالى سۋىمەن تانىمال اۋدانعا ەلىمىزدىڭ بارلىق وبلىستارىنان جانە شەتەلدەردەن كوپتەگەن تۋريستەر مەن دەمالۋشىلار كەلەتىنىن مىسال رەتىندە كەلتىرگەن ج.تۇيمەباەۆ ونداعى سانيتارلىق تازالىق پەن رەتسىز ساۋداعا جانە كوگالداندىرۋ جۇمىستارىنا باسا نازار اۋدارۋ قاجەتتىگىنە توقتالدى.

«اۋداندا قوقىس تاستايتىن 26 ورىن بەلگىلەنگەن، الايدا، اۋدان اكىمدىگى تاراپىنان جۇمىستىڭ دۇرىس ۇيىمداستىرىلماۋىنا بايلانىستى، ەلدى مەكەندەردە  بەي-بەرەكەت قوقىس ورىندارى كوپتەپ ورىن الۋدا. سونىمەن قاتار، مۇنداعى پروبلەمالاردىڭ ءبىرى رەتسىز ورنالاسقان بازارلار.  ماسەلەن، اۋدانداعى 13 بازاردىڭ 7-ءۋى زاڭ تالاپتارىنا سايكەس كەلمەيدى»،- دەدى وبلىس اكىمى.

جيىندى قورىتىندىلاعان ج.تۇيمەباەۆ سارىاعاش اۋدانىنىڭ مۇمكىندىگى كەيبىر اۋداندارمەن سالىستىرعاندا وتە جوعارى ەكەنىن ايتىپ، وسى الەۋەتتى بارىنشا پايدالانا وتىرىپ، اۋدان ەكونوميكاسىن كوتەرۋ بويىنشا بىرقاتار ناقتى تاپسىرمالار جۇكتەدى.

Abai.kz

0 پىكىر