«سامۇرىق-قازىنا» قورى اتىراۋ مۇناي-حيميا كلاستەرى ءۇشىن بەلسەندى تۇردە ينۆەستور ىزدەستىرۋدە. بۇل تۋرالى جۋرناليستەرگە بەرگەن سۇحباتىندا قوردىڭ باسقارما توراعاسى ومىرزاق شوكەەۆ مالىمدەدى.

«اتىراۋ مۇناي-حيميا كلاستەرى كومىرسۋتەكتى شيكىزاتتاردى تەرەڭ وڭدەي وتىرىپ، بازالىق ونىمدەرى - پوليپروپيلەن مەن پوليەتيلەن شىعارۋدى قامتاماسىز ەتەدى. جوبالاردىڭ جالپى قۇنى 10 ملرد دوللارعا دەيىن باعالانادى. ءبىز جوبانى ءتيىمدى باسقارۋدى قامتاماسىز ەتە الاتىن، تەڭ ينۆەستورلاردى تارتۋ بويىنشا بەلسەندى جۇمىس اتقارۋدامىز»، - دەپ «بىرىككەن حيميالىقلىق كومپانيا» جوبالارىن جۇزەگە اسىرۋ تۋرالى اڭگىمەسى كەزىندە ومىرزاق شوكەەۆ ويىمەن ءبولىستى.

«سامۇرىق-قازىنا» قورىنىڭ ەنشىلەس كومپانياسى «بىرىككەن حيميالىق كومپانيا» جشس قازاقستاندا حيميا ونەركاسىبىن جاڭعىرتۋ جانە وسى سالاداعى يننوۆاتسيالىق جوبالاردى ىسكە اسىرۋ ءۇشىن ارنايى قۇرىلعان.

قازىرگى ۋاقىتتا كومپانيا 600 ادامدى تۇراقتى جۇمىس ورنىمەن قامتاماسىز ەتكەن ەكى زاۋىتتى ىسكە قوستى – ستەپنوگورسك قالاسىنداعى كۇكىرت قىشقىلى زاۋىتى جانە اتىراۋ وبلىسىنداعى پوليمەرلىك ونىمدەردى شىعارۋ زاۋىتى.

قازىرگى ۋاقىتتا بحك ەكى كلاستەرلەردىڭ قۇرىلىسىنا شوعىرلانعان: اتىراۋ وبلىسىندا ورگانيكالىق حيميا جانە جامبىل وبلىسىندا بەيورگانيكالىق حيميا. كلاستەرلەردى دامىتۋدىڭ نەگىزى - ينفراقۇرىلىم قالىپتاستىرۋ بولىپ تابىلادى، ونىڭ ىشىنە «نۇرلى جول» مەملەكەتتىك باعدارلاماسى اياسى دا جاتادى.

abai.kz