قازاقستان رەسپۋبليكاسى مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتىنىڭ تاپسىرىسىمەن              «ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعى» رمكق «قازاقستان  رەسپۋبليكاسىندا تىلدەردى دامىتۋ مەن قولدانۋدىڭ  2011-2020 جىلدارعا ارنالعان مەملەكەتتىك باعدارلاماسى» اياسىندا ورالحان بوكەي اتىنداعى كوركەمسوز وقۋ شەبەرلەرىنىڭ XVIII ءداستۇرلى رەسپۋبليكالىق بايقاۋىن وتكىزدى.

بايقاۋدىڭ ماقساتى – جۇرتشىلىقتىڭ رۋحاني ساۋاتتىلىعىن كوتەرۋ، كوركەمسوز وقۋ مادەنيەتىن جانداندىرۋ، ەل ىشىنەن تالاپتى، تالانتتى جاستاردى ىزدەپ تابۋ. قازاق ادەبيەتىنىڭ قۇندى مۇرالارىن ەل اراسىنا ناسيحاتتاۋدى كوزدەيتىن ءداستۇرلى بايقاۋ ارقىلى كوركەم شىعارمانىڭ وقىرماندار جۇرەگىنەن جول تابۋىنا، ءسوز ونەرىنە دەگەن جاستاردىڭ قىزىعۋشىلىعىن ارتتىرۋىنا ىقپال ەتۋ.

بايقاۋعا وبلىستىق جانە قالالىق ىرىكتەۋ كەزەڭدەرىنىڭ جەڭىمپازدارى قاتىستى. بايقاۋدىڭ ەكى شارتى (پروزالىق شىعارمالاردان ءۇزىندى وقۋ جانە پوەتيكالىق تۋىندىنى مانەرلەپ وقۋ) بويىنشا سايىسقا تۇسكەن قاتىسۋشىلار كوركەم تۋىندىنى مانەرلەپ جاتقا وقۋدان ءوز شەبەرلىكتەرىن تانىتىپ، جۇلدەلى ورىندارعا قول جەتكىزدى.

الماتى وبلىسىنان كەلگەن قاتىسۋشىمىز قادىرجان سەرىكبەكۇلى ءوزىنىڭ ءسوز ونەرىن بيىك باعالايتىنىن بايقاۋ بارىسىندا تانىتىپ، كوركەمسوز وقۋدىڭ شەبەرى اتانىپ، باس جۇلدەنى (180 000 تەڭگە) قانجىعاسىنا بايلادى.

قوستانايلىق كامەل ايدانا قايدارقىزى جۇلدەلى 1-ورىندى  (150 000 تەڭگە), قاراعاندىلىق نۇرتاي ايسۇلۋ ەلامانقىزى جۇلدەلى 2-ورىندى (120 000 تەڭگە), سولتۇستىك قازاقستان وبلىسىنان كەلگەن حەحناي اقمارال كوكەنايقىزى جۇلدەلى 3-ورىندى (100 000 تەڭگە) يەلەندى.

بەلسەندى قاتىسقاندىعى ءۇشىن العىسحات جانە  ىنتالاندىرۋ سىيلىعىمەن (50 000 تەڭگە) 4 قاتىسۋشى ماراپاتتالدى. ولار: قۇلشاروۆ ەلدوس (اتىراۋ وبلىسى), ماقسۇتبەك ابىلاي (شىعىس قازاقستان وبلىسى), مىڭباي باقىت (وڭتۇستىك قازاقستان وبلىسى), قاپانوۆا اينۇر (پاۆلودار وبلىسى).

ال قالعان 7 ۇمىتكەرگە بايقاۋعا قاتىسقانى ءۇشىن 20000 تەڭگە كولەمىندەگى ىنتالاندىرۋ سىيلىعى بۇيىردى.

اباي-اقپارات