اقتوبە وبلىستىق ىشكى ىستەر دەپارتامەنتى قالانىڭ ورتالىق بازارى ماڭىنان ءبىر توپ ادامنىڭ ۇستالۋىنا وراي تۇسىنىك بەردى، - دەپ حابارلايدى اباي-اقپارات قازاقپاراتاگەنتتىگىنە سىلتەمە جاساپ.

«102» پۋلتىنە اقتوبە قالاسىنىڭ ورتالىق بازارى جانىندا جاپپاي توبەلەس ورىن الۋى مۇمكىن دەگەن اقپارات ءتۇستى. شاقىرتۋ تۇسىسىمەن تاياۋ ماڭداعى پوليتسيا كەزەكشىلىگى بىردەن وقيعا ورنىنا جىبەرىلىپ، جاپپاي توبەلەستىڭ الدى الىندى»، - دەپ ءمالىم ەتتى دەپارتامەنت ءباسپاسوز قىزمەتىنەن. 

ۆەدومستۆو اقپاراتىنا قاراعاندا، قابىلدانعان جەدەل شارالاردىڭ ارقاسىندا پوليتسيا قىزمەتكەرلەرى 15 كۇدىكتى ادامدى ۇستادى. ولاردى قولعا ءتۇسىرۋ بارىسىندا ارنايى قۇرالدار مەن قارۋ قولدانىلماعان.

«كۇدىكتىلەردى ءتىنتۋ بارىسىندا ولاردان سۋىق قارۋ جانە مىلتىق تابىلعان جوق. قازىر بارلىق تەرگەۋ امالدارى جۇرگىزىلۋدە. قالادا اتىس بولدى دەگەن اقپارات شىندىققا جاناسپايدى. قاساقانا جالعان اقپارات تارتقانى ءۇشىن جاۋاپكەرشىلىك كوزدەلگەندىگىن ەستەرىڭىزگە سالامىز»، - دەدى اقتوبە وبلىستىق ءىىد-نەن.

ايتا كەتەرلىگى، ۇستالعان ازاماتتاردىڭ ۇستىنەن اكىمشىلىك قۇقىق بۇزۋشىلىق تۋرالى كودەكستىڭ 449 بابى بويىنشا ءىس قوزعالعان. اتالعان باپقا سايكەس، قوعامدىق ورىنداردا زاتتاردى وزگەشە تاسىلمەن ساتىپ الۋ، ساتۋ، ايىرباستاۋ نەمەسە يەمدەنۋ ماقساتىندا كاسىپكەرلىك سۋبەكتىسى بولىپ تابىلمايتىن ادام جاساعان، سونداي-اق بال اشۋ، قايىرشىلىق، سەكسۋالدىق سيپاتتا قىزمەتتەر كورسەتۋ نە وزگە دە قىزمەتتەر كورسەتۋدى كۇشتەپ تاڭۋ ماقساتىندا ءتيىسۋ، ياعني مازالاپ ءوتىنىش ءبىلدىرۋ جەكە تۇلعالارعا بەس ايلىق ەسەپتىك كورسەتكىش مولشەرىندە ايىپپۇل سالۋعا اكەپ سوعادى.

سونىمەن قاتار وسى باپتىڭ ءبىرىنشى بولىگىندە كوزدەلگەن، اكىمشىلىك جازا قولدانىلعاننان كەيىن ءبىر جىل ىشىندە قايتالاپ جاسالعان ارەكەتتەر ون ايلىق ەسەپتىك كورسەتكىش مولشەرىندە ايىپپۇل سالۋعا نە بەس تاۋلىككە دەيىنگى مەرزىمگە اكىمشىلىك قاماققا الۋعا اكەپ سوعادى.

اباي-اقپارات