قازاقستان رەسپۋبليكاسىنىڭ ورتالىق مەملەكەتتىك مۋزەيى قىزمەتكەرلەرى كەيكى باتىردىڭ باس سۇيەگى قالاي ساقتاۋلى تۇرعانىن كورسەتتى. بۇل تۋرالى Tengrinews.kz حابارلادى. مۋزەي ديرەكتورىنىڭ ورىنباسارى بەيبىتقالي قاقاباەۆتىڭ ايتۋىنشا، مۋزەيدەگىلەر كەيكى باتىر جەتكىزىلگەن ارنايى كونتەينەردى اشپاعان.

سونىمەن قاتار، مۋزەيدە كەيكى باتىردىڭ باسسۇيەگىن قوياتىن ارنايى بولمەنىڭ بولىنگەنى بەلگىلى بولدى. دوڭگەلەگى بار كونتەينەر بولمەنىڭ ورتاسىندا ورنالاسقان. كونتەينەر قىزىل ماتامەن ورالىپ، مايشام قوسىلعان.

“كونتەينەردىڭ ءىشىن ءبىز ەشكىمگە كورسەتكەن جوقپىز. ول بارلىعىنا كورسەتۋگە بولاتىن قانداي دا ءبىر زات ەمەس، ول – ادامنىڭ باسسۇيەگى. سوندىقتان ءبىز ونى اشپاۋعا تىرىسامىز. جۋىردا، ياعني 1-2 كۇننىڭ ىشىندە ءبىز كەيكى باتىردىڭ باسسۇيەگىن ۆەنگرياعا ساراپتاماعا جىبەرەمىز. قازىر قاجەتتى قۇجاتتار راسىمدەلىپ جاتىر”، – دەدى بەيبىتقالي قاقاباەۆ.

“ۆەنگريادا ءبىزدىڭ ماقساتىمىز – عىلىمي جانە گەنەتيكالىق زەرتتەۋلەر جۇرگىزۋ. كەيىن ەلەكتروندىق تەحنولوگيالارمەن سۇيەكتەردى قايتا قالپىنا كەلتىرىپ، كەيكى باتىردىڭ ءپىشىنىن كورۋگە بولەدى. ۆەنگريادا عالىمدار مۇنداي زەرتتەۋلەرمەن جاقسى اينالىسادى. ولارعا بۇل زەرتتەۋ قىزىق بولادى، سەبەبى ولار وزدەرىن قىپشاق سانايدى”، – دەدى قاقاباەۆ. سونداي-اق، ول زەرتتەۋلەردىڭ بەس ايعا سوزىلۋى مۇمكىن ەكەنىن ايتتى. ال كەيىنىرەك كەيكى باتىردىڭ باسسۇيەگى قايتارىلىپ، قوستاناي وبلىسىندا جەرلەنەتىن بولادى.

سونىمەن قاتار، انتروپولوگيا جانە ەتنوگرافيا مۋزەيىنىڭ قىزمەتكەرلەرى تۇسىرگەن جادىگەرلەردىڭ سۋرەتتەرى پايدا بولدى. ول سۋرەتتەر كۋنستكامەراداعى مۇراعاتتا 90 جىلدان اسا ۋاقىت ساقتالعان ەكەن.

سونداي-اق، مەملەكەتتىك مۋزەي قىزمەتكەرلەرى كۋنستكامەراداعى جادىگەرلەردى قالاي العاندارىن ايتىپ بەردى.

“باستاپقىدا رەسەيدەگى مۋزەيدىڭ مۇراعاتىندا ساقتاۋلى تۇرعان باسسۇيەكتى تاريحي-مادەني قۇندىلىعى جوق دۇنيە دەپ سانالدى. سول ۋاقىتتان بەرى ول جادىگەر رەتىندە ەمەس، ادامنىڭ باسسۇيەگى ەسەبىندە ساقتاۋلى تۇرعان. كەيىننەن ساقتاۋلى تۇرعان باسسۇيەك بىزگە جەتكىزىلدى”، – دەدى قر ورتالىق مەملەكەتتىك مۋزەيدىڭ قىزمەتكەرلەرى.

مۇنىڭ الدىندا ورتالىق مەملەكەتتىك مۋزەيدىڭ ديرەكتورى نۇرسان ءالىمباي 12 قازان كۇنى كەيكى باتىردىڭ باس سۇيەگى انتروپولوگيالىق ساراپتاما ۇشىن ۆەنگرياعا جەتكىزىلەتىنىن مالىمدەگەن بولاتىن. 

اباي-اقپارات