الەمدىك رەيتينگتە قازاقستان قۇقىقتىق ەرەجەلەردىڭ ساقتالۋى جونىنەن 73-ورىندا.

World Justice Project حالىقارالىق ۇيىمى تۇزەتىن جىل سايىنعى قۇقىقتىق (زاڭ) ەرەجەلەردىڭ ساقتالۋى جونىندەگى رەيتينگتە قازاقستان بيىل 8 ساتىعا تومەندەپ، 113 ەلدىڭ ىشىنەن 73-ورىنعا جايعاسىپتى.

بۇرىنعى وداق شەڭگەلىنەن شىققان ەلدەر ىشىندە قۇقىقتىق ادىلەتتىلىك ءام كونستيتۋتسيالىق ەركىندىك جونىنەن گۇرجىستان مەن بەلورۋسسيا كوش باستاپ تۇر.

بۇل تىزىمدە رەسەي فەدەراتسياسى بىلتىرعى جىلعى كورسەتكىشتەن 17 ساتى تومەن سىرعىپ، 92-ورىنعا تۇراقتاعان. 

زەرتتەۋدىڭ قورىتىندىسى بويىنشا، كونستيتۋتسيالىق ەرەجەلەردىڭ ساقتالۋى ەڭ تومەن ەل – ۆەنەسۋەللا بولعان.

ال زەرتتەۋدىڭ «شىعىس ەۋروپا جانە ورتالىق ازيا» بلوگىندا گۇرجىستان 34-ساتىدان كورىنىپ، كوش باستاپ تۇر. گۇرجىستاننان كەيىن بوسنيا جانە گەرتسەگوۆينا مەن ماكەدونيا دا ۇزدىك كورسەتكىشكە يە بولعان.

زەرتتەۋ جۇمىسىنىڭ قورىتىندىسى بويىنشا قۇقىقتىق (زاڭدىق قۇقىق جانە زاڭ ورگاندارىنىڭ ەركىندىگى) جونىندەگى رەيتينگتى دانيا باستاپ تۇر. ەكىنشى – نورۆەگيا، ءۇشىنشى – فينليانديا. سونداي-اق، العاشقى بەستىككە شۆەتسيا مەن نيدەرلاندى كىرگەن.

زاڭ ەرەجەلەرىنىڭ ساقتالۋى جونىندەگى زەرتتەۋ يندەكسى – 8 اتالىمنان تۇرادى. ولار: بيلىك ينستيتۋتتارىنىڭ مانساپتىق ۇستەمدىگىن شەكتەۋ، سىبايلاس-جەمقورلىقتىڭ جويىلۋى، اشىق ساياسي قاتىناس، ءتارتىپ پەن قاۋىپسىزدىك، نەگىزگى قۇقىقتىق قورعاۋ، نورماتيۆتىك قورعاۋ، ازاماتتىق جانە قىلمىستىق ادىلەتتىلىك.

ايتا كەتەيىك، قازاقستان بىلتىرعى جىلى بۇل تىزىمدە تم ەلدەرى قاتارىندا كوش باستاپ، 65-ورىنعا كوتەرىلگەن بولاتىن.

نۇرزات توعجان

Abai.kz