پارلامەنت سەناتى الەۋمەتتىك-مادەني دامۋ جانە عىلىم كوميتەتىنىڭ مۇشەلەرى اقان بيجانوۆ پەن ءالي بەكتاەۆ شىمكەنتتە ءوتىپ جاتقان «2016 جىلى قازاقستاندا جۇزەگە اسىرىلعان ۇزدىك الەۋمەتتىك جوبالار» رەسپۋبليكالىق كورمەسىنە قاتىستى. بۇل تۋرالى «Abai.kz» پورتالى حابارلايدى.

كورمەنىڭ ماقساتى مۇمكىندىگى شەكتەۋلى جانە ءومىرى قيىن جاعدايدا جۇرگەن ادامداردىڭ ومىردەگى احۋالىن جاقسارتۋدى كوزدەيتىن الەۋمەتتىك جوبالاردى تانىستىرۋ بولىپ تابىلادى.

كورمەنىڭ اشىلۋىندا سويلەگەن سوزىندە سەناتور ا.بيجانوۆ پارلامەنت وتكەن سەسسيادا ەڭبەك كودەكسى مەن «حالىقتى جۇمىسپەن قامتۋ تۋرالى» زاڭىن قابىلداعانىن، وعان سايكەس مۇمكىندىگى شەكتەۋلى ادامدارعا ارنايى جۇمىس ورىندارى اشىلىپ جاتقانى، بۇل رەتتە مەملەكەت جۇمىس بەرۋشىلەردىڭ شىعىستارى سۋبسيديالاناتىنىن اتاپ ءوتتى. «100 ناقتى قادام» ۇلت جوسپارى اياسىندا اتاۋلى الەۋمەتتىك كومەكتى كۇشەيتۋ كوزدەلىپ وتىر.

ا. بيجانوۆ سونداي-اق كونكۋرستىق تاڭداۋدان وتكەن جوبالار بۇكىل حالىقتان، ونىڭ ىشىندە جەرگىلىكتى بيلىك ورگاندارىنان، الەۋەتتى دەمەۋشىلەردەن، ەرىكتى كومەكشىلەر مەن قولدان كەلگەن كومەگىن ايامايتىن قاراپايىم ىزگى ادامداردان قولداۋ تابۋى ءتيىس ەكەنىن ايتتى.

شارا بارىسىندا مۇقتاج جاندارعا شىن جۇرەكتەن كومەك بەرەتىن بەلسەندى ازاماتتىق كوزقاراستاعى جۇرتشىلىق وكىلدەرى اتالىپ ءوتىلدى.

Abai.kz