قازاقستان تاۋەلسىزدىكتەن كەيىن 5 جازعى وليمپيادا ويىندارىنا قاتىسىپ، 52 مەدال، ونىڭ ىشىندە 16 التىن، 17 كۇمىس جانە 19 قولا جۇلدەگە يە بولدى،-دەپ جازادى قازاقپارات پورتالى.

قازاقستان كوپ ۇلتتى مەملەكەتتەردىڭ ءبىرى. سوندىقتان، وسى وليمپيادادا جەڭىپ العان مەدالداردا وزگە دە ۇلت وكىلدەرىنىڭ ۇلەسى بار ەكەنى انىق. بىراق، ءبىز بۇگىن وزگە ۇلت وكىلدەرى ەمەس، 5 وليمپيادادا قانشا قازاق بالاسى جۇلگەگە قول جەتكىزگەنى تۋرالى ايتا كەتۋدى ءجون كوردىك.

قازاقستان تاۋەلسىز ەل رەتىندە العاش قاتىسقان 1996 جىلعى اتلانتا وليمپياداسىندا 11 مەدال جەڭىپ الدى.

بۇل مەدالداردىڭ تورتەۋى قازاق بالاسىنىڭ ەنشىسىنە بۇيىردى. ولار: بوكستان كۇمىس جۇلدە جەڭىپ العان بولات ءجۇمادىلوۆ (بوكس، 51 كەلى),  قولا جۇلدە يەگەرى اتانعان بولات نيازىمبەتوۆ (بوكس، 63,5 كەلى), ەرماحان يبرايىموۆ (بوكس، 71 كەلى) جانە ماۋلەن مامىروۆ (ەركىن كۇرەس، 52 كەلى).

ال 2000 جىلى سيدنەي وليمپياداسىندا وتانداستارىمىز 7 مەدال جەڭىپ الدى. ونىڭ تورتەۋى قازاق ۇلاندارىنىڭ ەنشىسىنە بۇيىردى. ەكى ساڭلاعىمىز تاۋەلسىز ەل تاريحىنداعى تۇڭعىش وليمپيادا چەمپيوندارى اتاندى.

ولار: چەمپيون اتانعان بەكزات ساتتارحانوۆ (بوكس، 57 كەلى), ەرماحان يبرايىموۆ (بوكس، 71 كەلى). ال بولات ءجۇمادىلوۆ (بوكس، 51 كەلى) ەكىنشى مارتە وليمپيادانىڭ كۇمىس جۇلدەگەرى اتاعىنا قول جەتكىزدى. سونداي-اق، مۇحتارحان دىلدابەكوۆتە (بوكس، +91 كەلى) كۇمىس مەدال جەڭىپ الىپ، جەڭىس تۇعىرىنا كوتەرىلدى.

2004 جىلى افينا وليمپياداسىندا جەرلەستەرىمىز جالعىز التىنعا قول جەتكىزگەنىمەن 8 رەت جەڭىس تۇعىرىنان كورىندى. بۇل بايراقتى باسەكەدە ەكى قازاق بالاسىنىڭ باعى جاندى. ولاردىڭ ءبىرى - جالعىز التىنعا يەلىك ەتكەن باقتيار ارتاەۆ (بوكس، 69 كەلى) بولسا، ەكىنشىسى تاعى ءبىر بوكسشى باۋىرىمىز سەرىك ەلەۋوۆ (60 كەلى).

2008 جىلى بەيجىڭدە وتكەن وليمپيادا ويىندارىندا قازاقستاندىق سپورتشىلارى 13 مەدالعا قول جەتكىزدى. بۇل مەدالداردىڭ التاۋى قاراكوز قازاق بالاسىنا بۇيىردى.

وندا باقىت سارسەكباەۆ (بوكس، 69 كەلى) التىن مەدال جەڭىپ السا، اسقات جىتكەەۆ (دزيۋدو، 100 كەلى), كۇمىستى قانجىعاسىنا بايلادى. ال ەركەبۇلان شىناليەۆ (بوكس، 81 كەلى), نۇرباقىت تەڭىزباەۆ (گرەك-ريم كۇرەسى، 60 كەلى), اسەت مامبەتوۆ (گرەك-ريم كۇرەسى، 96 كەلى), ارمان شىلمانوۆتار (تاەكۆوندو، 80 كەلى) جەڭىس تۇعىرىنىڭ ءۇشىنشى ساتىسىنان كورىنە ءبىلدى.

2012 جىلى لوندوندا دا ەل نامىسىن قورعاعان سپورتشىلارىمىز جالپى 13 مەدالعا قول جەتكىزدى. سونىڭ ۇشەۋىن قازاق سپورتشىلارى جەڭىپ الدى. ولار وليمپيادا چەمپيونى اتانعان سەرىك ساپيەۆ (بوكس، 69 كەلى), كۇمىس جۇلدەنى ۇتىپ العان ادىلبەك نيازىمبەتوۆ (بوكس، 81 كەلى) جانە قولا جۇلدەنى قانجىعاسىنا بايلاعان اقجۇرەك تاڭاتاروۆ (ەركىن كۇرەس، 66 كەلى).

مىنە، جوعارىداعى مالىمەتتەرگە قاراپ وتىرساڭىز تاۋەلسىزدىكتەن بەرى قازاق سپورتشىلارى وليمپيادادان 19 مەدال جەڭىپ العان. ونىڭ 5-ەۋى التىن، 5-ەۋى كۇمىس، 9-ى قولا مەدال.

ەندى ساناۋلى كۇننەن كەيىن برازيليادا ريو-دە-جانەيرو وليمپياداسىنىڭ الاۋى تۇتانادى. بۇل جولى قاراكوز قازاق قىز-جىگىتتەرىنەن كىمنىڭ باعى جانار ەكەن؟!

Abai.kz