قر مادەنيەت جانە سپورت مينيسترلىگى ءۇش تىلگە جەتىك جاستاردىڭ بىلىكتىلىگىن شىڭدايتىن بايقاۋ جاريالايدى، - دەپ حابارلايدى اباي-اقپارات مينيسترلىكتىڭ ءباسپاسوز قىزمەتىنە سىلتەمە جاساپ.

ءبىز بايقاۋعا قاتىسۋعا نيەت تانىتۋشىلاردى اقپاراتتاندىرۋ ءۇشىن بايقاۋ شارتىن تولىق جاريالاۋدى ءجون ساناپ وتىرمىز.

قازاقستان رەسپۋبليكاسى مادەنيەت جانە سپورت مينيسترلىگىنىڭ تىلدەردى دامىتۋ جانە قوعامدىق-ساياسي جۇمىس كوميتەتى (بۇدان ءارى – كوميتەت) مەملەكەتتىك قىزمەتتەگى جاستار اراسىندا ء«تىل شەبەرى» رەسپۋبليكالىق بايقاۋىن (بۇدان ءارى - بايقاۋ) جاريالايدى. 

ماقساتى: ءۇش ءتىلدى – قازاق، ورىس جانە اعىلشىن تىلدەرىن جەتىك مەڭگەرگەن مەملەكەتتىك قىزمەتشى جاستاردى  انىقتاپ، قولداۋ. ۇشتىلدىلىكتى ناسيحاتتاۋ،  ىسكەرلىك جانە حالىقارالىق قارىم-قاتىناس قۇرالى رەتىندەگى تىلدەردى جاستاردىڭ مەڭگەرۋ دەڭگەيىن انىقتاۋ.

مىندەتتەرى: قازاقستان رەسپۋبليكاسىنىڭ ءتىل ساياساتىن جۇزەگە اسىرۋ; ءتىلدى مەڭگەرۋگە دەگەن قىزىعۋشىلىقتى ىنتالاندىرۋ; جان-جاقتى دامىعان، باسەكەگە قابىلەتتى تۇلعا تاربيەلەۋ; ءتىل مادەنيەتىن جەتىلدىرۋ.

شارتى: كونكۋرسقا ۇلتىنا قاراماستان 21 مەن 29 جاس ارالىعىنداعى  جاستار قاتىسا الادى.

كونكۋرس ءۇش اتالىمنان تۇرادى:

«مادەنيەتتانىم» – قازاق حالقىنىڭ سالت-ءداستۇرى، ءدىلى مەن ءتىلى جونىندەگى سۇراقتارعا قازاق تىلىندە جاۋاپ بەرۋ;

«ۇلتتانىم» – قازاق ەلى تاريحى مەن ۇلى تۇلعالارى، ەلىمىزدىڭ ايماقتارى جونىندەگى سۇراقتارعا ورىس، اعىلشىن تىلدەرىندە جاۋاپ بەرۋ;         

«ونەرتانىم» – 3 ءتۇرلى جاڭىلتپاشتى جاڭىلماي 3 رەت ايتۋدان جارىسقا ءتۇسۋ.

كيىم كيۋ ءتارتىبى: I اتالىمدا – قازاق حالقىنىڭ ۇلتتىق كيىمى; II اتالىمدا – كلاسسيكالىق ستيل;  III اتالىمدا – ەركىن.     

ۇمىتكەرلەر ونەرىن باعالاۋ كەزىندە: تىلدەردى مەڭگەرۋ دەڭگەيى; جاۋاپتىڭ ورامدىلىعى مەن ساپاسى; جاۋاپتىڭ مازمۇندىلىعى مەن ەرەكشەلىگى; ءۇش تىلدە ورفوەپيالىق تۇرعىدان تازا سويلەۋى; ساحنالىق مادەنيەتى ەسكەرىلەدى.

بايقاۋعا قاتىسۋشىلاردىڭ جۇمىسىن باعالاۋ جانە جەڭىمپازداردى انىقتاۋ ءۇشىن قازىلار القاسى قۇرىلادى. قازىلار القاسىنىڭ قۇرامىن كوميتەت انىقتايدى. قازىلار القاسىنىڭ قۇرامى ءتىل مەن ادەبيەت، پەداگوگيكا  سالالارىنىڭ  عالىمدارى، زيالى قاۋىم وكىلدەرى، مادەنيەت جانە ونەردىڭ بەدەلدى قايراتكەرلەرىنەن تۇرادى. ساندىق قۇرامى 5 ادامنان اسپاۋى ءتيىس. قازىلار القاسىنىڭ قۇرامى توراعادان جانە مۇشەلەرىنەن تۇرادى. قازىلار القاسىنىڭ جۇمىسىنا توراعا باسشىلىق جاسايدى، شەشىم شىعارادى جانە شىعارىلعان شەشىم ءۇشىن جاۋاپتى بولادى. حاتشى قازىلار القاسىنىڭ شەشىمى بويىنشا حاتتامانى رەسىمدەيدى.

بايقاۋ جەڭىمپازدارى قازىلار القاسىنىڭ شەشىمىنە سايكەس ديپلومدارمەن، العىسحاتتارمەن جانە دە اقشالاي سىيلىقتارمەن ماراپاتتالادى.

مەكەنجاي: استانا قالاسى،  ورىنبور كوشەسى 8-ءۇي، 15-كىرەبەرىس، قازاقستان رەسپۋبليكاسى مادەنيەت جانە سپورت  مينيسترلىگىنىڭ تىلدەردى دامىتۋ جانە قوعامدىق-ساياسي جۇمىس كوميتەتى. بايلانىس تەلەفوندارى: 8(7172) 74-05-10, 74-04-56, 74-05-09 (تەل/فاكس)

اباي-اقپارات