تۇركىستاندىقتار قۇرىلىسشىلار كۇنىن اتاپ ءوتتى. تۇركىستان قالاسىنىڭ اكىمى الىپبەك وسەرباەۆ وڭىردەگى قۇرىلىسشىلاردىڭ باسىن قوسىپ، كاسىبي مەرەكەلەرىمەن قۇتتىقتادى، دەپ حابارلايدى «Abai.kz» پورتالى تۇركىستان قالاسى اكىمدىگىنىڭ ءباسپاسوزى قىزمەتىنە سىلتەمە جاساي وتىرىپ.

مەرەكەلىك جيىننىڭ رەسمي بولىگى قالا اكىمدىگىنىڭ كىشى ءماجىلىس زالىندا ءوتتى. قۇتتىقتاۋ راسىمىمەن باستالعان شاراعا قۇرىلىس ارداگەرلەرى دە قاتىسىپ، باسشىلىق تاراپىنان كورسەتىلگەن قۇرمەتكە شەكسىز ريزالىقتارىن جەتكىزدى.

ايتا كەتەرلىگى، بيىل قۇرىش قولدى قۇرىلىسشىلاردىڭ مەرەكەسىنىڭ تويلانىپ كەلە جاتقانىنا 60 جىل تولىپ وتىر. وسىعان وراي، قۇرىلىسشىلاردىڭ ەڭبەگىن – ەل ەكونوميكاسىنىڭ قوزعاۋشى كۇشىنە بالاعان شاھار باسشىسى ارداگەر قۇرىلىسشىلاردى ارنايى ماراپاتتاپ، سالاداعى جاس ماماندارعا دا العىسحاتتار تاپسىردى.

ايتا كەتەيىك، 1955 جىلدان باستاپ كسرو-دا تامىزدىڭ ەكىنشى جەكسەنبىسى «قۇرىلىسشىلار كۇنى» دەپ بەلگىلەندى. 966 جىلدان بەرى وسى مەرەكە جىل سايىن اتالىپ وتەدى. كسرو تاراعاننان كەيىن وسى مەرەكەنى قازاقستان، رەسەي، بەلارۋس، قىرعىز رەسپۋبليكاسى، ارمەنيا مەن ۋكراينا اتاپ وتەتىن بولدى.قۇرىلىسشىلار جەر بەتىندەگى بەيبىت، جاسامپاز ماماندىقتىڭ يەسى. ەلباسىمىز «قۇرىلىس - ەل ەكونوميكاسىنىڭ لوكوموتيۆى» دەپ اتاپ كورسەتكەن ەدى. بۇل - قۇرىلىسشىلارىمىزدىڭ ەڭبەگىنە بەرىلگەن زور باعا. بۇگىن قازاقستاننىڭ 700 مىڭنان استام قۇرىلىسشىسى وزدەرىنىڭ كاسىبي مەرەكەسىن اتاپ وتەدى. ەل ەكونوميكاسىن دامىتۋدا قۇرىلىسشىلاردىڭ ەڭبەگى ەرەن. قۇرىلىس ول – جاڭا ۇيلەر، كوز سۇيسىندىرەر عيماراتتار، ونەركاسىپ جانە الەۋمەتتىك نىساندار. وسى ورايدا ايتا كەتەرى، ەلدەگى جالپى ىشكى ءونىمنىڭ 7 پايىزى قۇرىلىس سالاسىنا تيەسىلى.   يندۋستريالدى-يننوۆاتسيالىق دامۋ باعدارلاماسىنىڭ العاشقى بەسجىلدىعىندا سالاعا ءبىر جارىم ميلليارد دوللاردان استام ينۆەستيتسيا تارتىلدى. قۇرىلىس سالاسىنىڭ بيىلعى كورسەتكىشتەرى كوڭىلدى مارقايتادى.  ءبىرىنشى جارتى جىلدا 4 ملن شارشى مەتردەن استام تۇرعىن ءۇي سالىندى. ياعني ول 37 مىڭعا جۋىق وتباسى قونىس تويىن تويلادى دەگەن ءسوز.  بۇل وتكەن جىلعى جۇمىس اۋقىمىنان 25 پايىزعا كوپ. مەملەكەت قۇرىلىس سالاسىنا 227 ميلليارد تەڭگە باعىتتاعان. 

Abai.kz