تاۋەلسىز Numbeo پورتالى الەم بويىنشا ءومىر ءسۇرۋ ءسۇرۋ دەڭگەيى مەن ساياحاتتاۋ ءۇشىن ەڭ ارزان جانە ەڭ قىمبات 122 مەملەكەتتىڭ رەيتينگىن جاريالادى،-دەپ حابارلايدى Kaz.tengrinews.kz سايتى.

ءتىزىم 50 ەلدەگى تاۋارلار مەن قىزمەت كورسەتۋلەردىڭ - ازىق-تۇلىكتىڭ باعاسى، جىلجىمايتىن مۇلىكتى جالعا الۋ، مەيرامحانالارداعى ورتا باعا، تاكسي مەن قوعامدىق كولىكتىڭ باعاسى، سونىمەن قاتار بوس ۋاقىتتى وتكىزەتىن ورىنداردىڭ باعاسى، كوممۋنالدىق تولەمدەر مەن ۇيالى تەلەفون باعالارىنىڭ نەگىزىندە جاسالدى. 

ءومىر سۇرۋگە ەڭ ارزان مەملەكەت ءۇندىستان بولىپ شىقتى. ەكىنشى جانە ءۇشىنشى ورىنداردا - مولدوۆا مەن پاكىستان. ال قازاقستان بولسا تىزىمدە ءتورتىنشى تۇر. سونىمەن قاتار، ەڭ ارزان 10 مەملەكەتتىڭ تىزىمىنە نەپال، ۋكراينا، گرۋزيا، الجير، ءازىربايجان مەن كولۋمبيا مەملەكەتتەرى ەندى.

زەرتتەۋدىڭ مالىمەتىنشە، نەپالدا ازىق-تۇلىك پەن تۇرعىن ءۇيدى جالداۋ وتە ارزان بولسا، كۋبادا كينوتەاتر، قوعامدىق كولىك پەن جارىقتىڭ باعاسى ارزان. ال ۋكراينادا ەڭ ارزان McDonalds ەكەن.

ايتا كەتەيىك، ەڭ قىمبات مەملەكەتتەردىڭ قاتارىنا، Numbeo پورتالىنىڭ مالىمەتىنشە، بەرمۋد ارالى، شۆەيتساريا مەن باگام ارالدارى كىرەدى. سونىمەن قاتار، ەڭ قىمبات ون ەلدىڭ تىزىمىندە نورۆەگيا، يسلانديا، دانيا، سينگاپۋر، ليۋكسەمبۋرگ، كۋۆەيت جانە گونكونگ ەلدەرى بار.

ايتا كەتەيىك، قازاقستاننىڭ ەڭ ارزان ون مەملەكەتتىڭ قاتارىنا ەنۋى العاش رەت ەمەس. بۇعان دەيىن وسى جىلدىڭ اقپان ايىندا GOBankingRates قارجى پورتالى قازاقستاندى ەڭ ارزان مەملەكەتتەردىڭ تىزىمىندە بەسىنشى ورىنعا قويعان بولاتىن.
Abai.kz