"ۇستالعان 25 جاستاعى جىگىتكە ءوز ۇيىنەن باستالىپ شەكارالاس وزبەكستان اۋماعىنا شىعاتىن جەراستى جولىن قازىپ، سول ارقىلى كورشى رەسپۋبليكاعا كونتراباندا تاۋارلارىن جولداعان دەگەن ايىپ تاعىلدى", - دەلىنگەن سوت حابارلاماسىندا. ۇستالعان ازاماتقا كوشى-قون زاڭنامالارىن بۇزىپ، كەدەن سالىقتارىنان جالتارعان دەگەن ايىپتار قوسا تاعىلدى.

ەسكە سالساق، 25 ناۋرىزدا "وزودليك" وزبەك شەكاراشىلارى 17 ناۋرىزدا قىرعىزستاننىڭ باتكەن وبلىسى قادامجاي اۋدانىنا قاراستى "قىرعىز-قىشلاق" اۋىلىنداعى ۇيدەن باستالىپ، وزبەكستاننىڭ فەرعانا وبلىسى التىارىق اۋدانىنىڭ "بوربالىق" اۋىلى تۇرعىنىنىڭ اۋلاسىنان بىراق شىعاتىن جەراستى توننەلىن انىقتاعانىن حابارلاعان ەدى.

سول كەزدە وزبەك شەكاراشىلارى قىرعىز ارىپتەستەرىنە جەراستى جولىنىڭ ءدىني-ەكسترەميستىك ادەبيەت، كونتراباندالىق جۇك جانە قارۋ تاسىمالداۋ ءۇشىن قازىلعان بولۋى مۇمكىن دەپ حابارلاعان ەدى.

قىرعىزستان قۇقىققورعاۋ قۇرىلىمدارى توننەلدىڭ شىعار جولىن جىلدام تاپقانىمەن، ونى قازعان ازاماتتىڭ ءوزى ۇستالماي، كۇدىكتى ىزدەستىرىلە باستاعان. بۇنىڭ الدىندا وزبەكستان تاراپى زاڭسىز وتكەل ارقىلى فەرعانا القابىنا ەكسترەميستەر ءوتىپ كەتكەن بولۋى مۇمكىن دەپ مالىمدەگەن ەدى.

اباي-اقپارات