استانا كۇنى قارساڭىندا تالدىقورعان قالاسىندا جاستارعا قىزمەت كورسەتۋ ورتالىعى اشىلدى. ونىڭ قۇرىلىسىنا جەرگىلىكتى بيۋدجەتتەن ءبىر ميلليارد تەڭگەدەن استام قارجى ءبولىندى. بۇل تۋرالى بۇگىن ورتالىقتىڭ اشىلۋ سالتاناتىندا بەلگىلى بولدى. جاڭا عيماراتتىڭ اشىلۋىمەن جاستاردى وبلىس اكىمى اماندىق باتالوۆ قۇتتىقتادى.

ءوز سوزىندە وبلىس اكىمى جاستار ساياساتىن جۇزەگە اسىرۋ ماسەلەلەرىنە توقتالىپ ءوتتى:

- ەلباسى نۇرسۇلتان ءابىشۇلى نازارباەۆ: ء«بىلىمدى، ەڭبەكقور، باستاماشىل، بەلسەندى بولۋعا قازىردەن باستاپ داعدىلانىڭدار. ەرىنبەي ەڭبەك ەتكەن، تالماي عىلىم ىزدەگەن، جالىقپاي تەحنيكا مەڭگەرگەن ادام وزادى. تۇرمىسى جاقسى، ابىرويى اسقاق بولادى» - دەپ قازاقستاننىڭ گۇلدەنۋىن جاس ۇرپاقپەن تىكەلەي بايلانىستىرادى. سوندىقتان تاۋەلسىزدىگىنە 25 جىل تولعان ەلىمىزدى قۇرىپ، ۇلى ءىستى باستاپ بەرگەن الدىڭعى تولقىننىڭ ءىزىن لايىقتى جالعاستىرۋ – سىزدەر، جاستاردىڭ مىندەتى.

بۇگىنگى اشىلىپ وتىرعان جاستارعا قىزمەت كورسەتۋ ورتالىعى جاستاردىڭ جاڭا يدەيالارى مەن جوبالارىنا باعىت بەرەدى، كۇش-جىگەرىن بىرىكتىرىپ، ءتۇرلى ماسەلەلەرى بويىنشا كومەك كورسەتەدى. جاستاردىڭ ءارى دەمالاتىن، ءارى ءبىلىمىن جەتىلدىرەتىن، ءارى پىكىر الىساتىن، ولاردى جان-جاقتى قولداۋعا بارلىق مۇمكىندىكتەر جاسايتىن ورتاق شاڭىراق بولادى دەپ سەنەمىز، - دەدى ا. باتالوۆ.

مۇنان سوڭ الماتى وبلىسىنىڭ قۇرمەتتى ازاماتى، اكتەر الىمعازى رايىمبەكوۆ جاستارعا دەگەن تىلەگىن اق باتامەن جەتكىزدى.

اتالمىش عيماراتتىڭ قۇرىلىسىن جۇرگىزگەن «ازياەنەرگوپروەكتمونتاج» جشس باسشىسى ايدار قيالباي ورتالىقتىڭ سيمۆوليكالىق كىلتىن جاستار رەسۋرستارى ورتالىعىنىڭ ديرەكتورى ايدىن نۇرمۇحانبەتوۆكە سالتاناتتى تۇردە تاپسىردى.

جاستار وكىلدەرى اتىنان ءسوز العان جاس مامان، تالدىقورعان پوليتەحنيكالىق كوللەدجىنىڭ وقىتۋشىسى نۇرلىبەك اۋباكەروۆ مەملەكەت تاراپىنان جاس بۋىنعا وسىنداي ۇلانعايىر جاعداي جاسالىپ وتىرعاندا جاستار دا وزدەرىنىڭ بىلىمىمەن، بەلسەندىلىگىمەن، ىسكەرلىگىمەن قوعام دامۋىنا ايتۋلى ۇلەس قوساتىنىن جەتكىزىپ، ريزاشىلىعىن ءبىلدىردى.

عيماراتتىڭ لەنتاسى قيىلعاننان كەيىن قوناقتار ورتالىقتىڭ ىشىمەن تانىسىپ، ءتۇرلى كابينەتتەردى، ستۋديالاردى، ينتەرنەت-كىتاپحانانى، كوۆوركينگ، فيتنەس-ورتالىقتى، انتيكافە، سول سياقتى ءبىلىم بەرۋ، جۇمىسپەن قامتۋ، جاستاردىڭ جوبالارىن قولداۋ باعىتتارىنداعى كونسۋلتاتسيالىق ورتالىقتاردى ارالاپ كوردى.

جالپى، جاستارعا قىزمەت كورسەتۋ ورتالىعى بىرنەشە باعىتتا قىزمەت كورسەتەتىن بولادى. اتاپ ايتقاندا، «جۇمىسپەن قامتۋ جول كارتاسى - 2020»، «قولجەتىمدى تۇرعىن ءۇي - 2020»، «سەرپىن - 2050»، «ديپلوممەن اۋىلعا» باعدارلامالارى بويىنشا جاستار اراسىندا ءتۇسىندىرۋ-ناسيحاتتاۋ باعىتىندا جۇمىس جۇرگىزبەك. ول ءۇشىن ورتالىق وسىدان ءبىر جىل بۇرىن باعدارلامالاردىڭ اكىمشىسى سانالاتىن مەملەكەتتىك ورگاندارعا جاستاردى ارنايى تاعىلىمدامادان وتكىزىپ، تاجىريبە جيناقتاۋىنا جاعداي جاساعان. قازىرگى كەزدە سول ماماندار جاستارعا مەملەكەتتىك باعدارلامالار بويىنشا باعىت بەرەتىن بولادى.

ەكىنشىدەن، جاستاردىڭ بوس ۋاقىتىن ءتيىمدى دە پايدالى ۇيىمداستىرۋ جۇمىسىن ۇيلەستىرىپ وتىرماق. وعان عيماراتتا اتاپ وتكەن زاماناۋي قۇرىلعىلار مەن بولمەلەردە بارلىق مۇمكىندىكتەر بار.

Abai.kz