جۇما, 20 مامىر 2022
46 - ءسوز 8174 2 پىكىر 2 ناۋرىز, 2016 ساعات 09:32

انا ماحابباتى

ءپالى، مىنا ەرجان ءتالىپ دەگەن ء"بىزدىڭ" اۋىلدىڭ قۋى "وسى كۇنى ىلعي جىرتقىشتاردىڭ اراسىندا ادام كورسەك قۋانامىز" دەپ ونسىز دا شىعايىن دەپ تۇرعان كوزدى وربيتاسىنان يتەرىپ جىبەردى. تاماشا ايتتىڭ! اقيقاتتىڭ اۋىلى قايدا ەكەنىن كورسەتىپ.

وتكەندە وڭشەڭ ءبىر جان-جانۋارلار تۋرالى كورسەتەتىن تەلەارنادان فيلم كوردىم./قازىر سولاردى قىزىقتاۋدان باسقا دۇنيە قالعان جوق قوي/. افريكاداعى جاعداي: ءبىر اش ارىستان گنۋ انتيلوپاسىنىڭ بۇزاۋىن اسىراپ الىپتى. ارىستاننىڭ بالاسىن نە دەۋشى ەدى، ءيا، ايتەۋىر كۇشىكتەرىنەن ايرىلعان انالىق بولسا كەرەك. انالىق سەزىم اشتىقتان دا كۇشتى بولا ما دەيمىن؟ الگى ارىستاننىڭ قابىرعاسى ىرسيىپ، بۇراڭداعان ساۋىرىن سۇيرەتىپ ارەڭ ءجۇر. كۇنى ساناۋلى. قۇدايى بەرىپ قالادى اياق استىنان. انتيلوپانىڭ جاڭا تۋعان بۇزاۋىنا تاپ بولادى. كەز-كەلگەن جالقاۋ ارىستاننىڭ ارمانى! ءبىر توق باسىپ الاتىن مۇمكىندىك. جوق، ءبىزدىڭ اش ارىستان انالىق سەزىمدى بارىنەن جوعارى قويادى ەكەن.

ءبىزدىڭ توق قىزدار اڭ قۇساپ، پەرزەنتىن ايدالاعا لاقتىرىپ كەتىپ جاتقان جوق پا؟ اش ارىستان - ادام ەكەن! مىناۋ دۇنيەنىڭ قۋلىق-سۇمدىعىنان بەيحابار، بەيكۇنا بۇزاۋدى تۇمسىعىمەن ءتۇرتىپ وياتادى، يتەرمەلەپ جۇرگىزەدى، باۋىرىنا باسىپ ۇيىقتايدى. تۇرتپەكتەپ سۋاتقا اپارادى. ارىستاننىڭ ءيىسى شىققان جەرگە ۇساق-تۇيەك سۇيەك-ساياق جەپ، ءالسىزدى تالايتىن قورقاۋلار جاقىنداۋشى ما ەدى؟! ءارى-بەرىدەن سوڭ اش ارىستاننىڭ انالىق ماحابباتىنا ولار دا الىستان قاراپ تاڭقالۋمەن بولعان شىعار؟! جىرتقىشتىڭ ماحابباتىنا اڭ تۇرماق ادامدار دا تاڭقالسىن!

افريكانىڭ اڭدارى دا، ادامدارى دا قىزىق قوي، ءبىرتۇرلى! سول جەردە ادامنان اۆتومات كوپ-اۋ دەيمىن. قازاق سياقتى ءبىر حالىق ەمەس، رۋ مەن تايپاعا ءبولىنىپ اتىسادى دا جاتادى عوي ايتەۋىر. قانداي پەرى بولسا دا انا ماحابباتىنىڭ الدىندا باس يەدى ەكەن. ءبىز كەيدە انالارىمىزدان يمەنبەي وڭمەڭدەپ تە كەتە الامىز عوي. ال افريكالىقتار، ارىستاننىڭ قاسيەتى دارىعان با، قانشا اتىسىپ، الىسىپ جۇرسە دە اسىل ماحابباتتىڭ الدىندا توقتاي الادى ەكەن. اۆتوماتتارىن تاستاي سالىپ، بالا-شاعاسىن ارتىپ الىپ، الگى انا-ارىستاندى ىزدەپ جوڭكىلسىن! افريكانىڭ جارتىسى ءجۇر سول جەردە. ءتاۋ ەتكەنى - ماحاببات! كادىمگى انانىڭ ماحابباتى! و، انا، قۇدىرەتىڭنەن اينالدىم، ءسىزدىڭ ماحابباتىڭىزعا ادامزات بالاسى اماندا، ەلجىرەۋمەن بولاتىن شىعار؟!

سودان، دۇنيە پالەنىڭ ءبارى ەركەكتەن شىعادى ەمەس پە؟ كۇشى دە كوپ، كوزى دە تويمايتىن قوماعاي. انانىڭ كوڭىلى - بالادا، بالانىڭ كوڭىلى - دالادا. اپتالاپ ءنار سىزباعان ءالسىز ارىستان-انا كوز شىرىمىن الىپ جاتادى. اڭقاۋ بۇزاۋ اڭقىلداپ، ورمان ارالاماق بولادى. اجالىنا كورىنگەن ەكەن، ايۋداي اقىرعان ارىستاننىڭ ايعىرىنا تاپ بولادى. نەشە كۇن بويى نارەستەنى باعامىن دەپ تەرىسى سۇيەگىنە جابىسقان ارىستان-انا اڭىراپ قالا بەرەدى. وسى وقيعانى انا-ارىستاننىڭ ىزىنەن قالماي، نەشە كۇنى بويى كامەراعا تارتىپ، اڭگىمەلەپ وتىرعان كۋانىڭ كۇڭىرەنىپ وتىرىپ ايتۋىنا قاراعاندا، ارىستان-انا ورمانعا ءسىڭىپ كەتىپتى. سودان كەيىن بەس بۇزاۋ اسىراپ الىپتى دەيدى اڭىزدار. سەنگىڭ كەلەدى، سەنەسىڭ. ويتكەنى ءبىزدىڭ دە انامىز بار، قۇدايعا شۇكىر.

انانىڭ ماحابباتىنا تەڭ كەلەتىن دۇنيەدە ەشنارسە جوق! بولماعان! بولمايدى دا! ءبىز انانىڭ ماحابباتىنا ءتانتى بولۋمەن وتەمىز. مۇمكىن، تەحنولوگيانىڭ جاڭارۋى - دۇنيەنىڭ ءبارىن قايتا تۋعىزادى. ءاي، بىراق، انانىڭ ماحابباتىن تۋعىزا المايدى-اۋ! تابيعي تۇيسىكپەن تىرشىلىك ەتەتىن اڭ ەكەش اڭ دا انالىق ماحابباتىن جوعالتپايدى ەكەن، ءبىز شە؟ قۋ ءتىلدى ەرجان ءتالىپ باۋىرىم، قوزعاپ جىبەردىڭ عوي. ايتەۋىر، ماحابباتتان ايىرىلىپ قالمايىقشى دەپ ايتىپ جاتقانىم عوي. بارشى ءارى، ءوزىڭ دە ءبىر ادامدى تۇرتپەكتەپ قويمايدى ەكەنسىڭ!

سەرىك جانبولات

Facebook-تەگى پاراقشاسىنان

2 پىكىر